শনিবাৰে পুৰণি ফৰিদাবাদ ৰেলৱে ষ্টেচনৰ সমীপত এক আশ্চৰ্যজনক ঘটনা সংঘটিত হয়। এখন চলন্ত ৰেলত এগৰাকী মহিলাই এটি কন্যাসন্তান জন্ম দিবলগীয়া হয়। ৰেলখনত উপস্থিত থকা আন মহিলা যাত্ৰীসকলৰ তৎপৰতা আৰু সহায়ৰ বাবে মাতৃ আৰু নৱজাতক দুয়ো বৰ্তমান সুৰক্ষিত হৈ আছে। ৰেল কৰ্তৃপক্ষই জানিবলৈ দিয়া মতে, ঘটনাটোৰ পিছত ফৰিদাবাদ ষ্টেচনত ৰেলখন ৰখাই দুয়োকে ততাতৈয়াকৈ চিকিৎসালয়লৈ প্ৰেৰণ কৰা হয়।
আৰক্ষীৰ পৰা জানিব পৰা মতে, মধ্যপ্ৰদেশৰ পান্না জিলাৰ বাসিন্দা অভিলাষা নামৰ মহিলাগৰাকীয়ে তেওঁৰ স্বামী জৱাহৰলালৰ সৈতে জম্মুৰ কাট্ৰাৰ পৰা ঘৰলৈ উভতি আহিছিল। তেওঁলোক শ্ৰী মাতা বৈষ্ণো দেৱী কাট্ৰা-জবলপুৰ এক্সপ্ৰেছেৰে ভ্ৰমণ কৰি আছিল। অহা মাহতহে মহিলাগৰাকীৰ প্ৰসৱৰ সময় আছিল যদিও শুকুৰবাৰে বিয়লি ৰেলখন দিল্লী পোৱাৰ লগে লগে তেওঁৰ মৃদু প্ৰসৱ বেদনা আৰম্ভ হয়। ৰেলখন তুগলাকাবাদ ষ্টেচন পাৰ হোৱাৰ পাছত বিষ অসহ্য হৈ পৰে আৰু তেওঁৰ শাৰীৰিক অৱস্থাৰ দ্ৰুত অৱনতি ঘটে।
মহিলাগৰাকীৰ এনে সংকটপূৰ্ণ অৱস্থা দেখি ডবাটোত থকা আন মহিলা যাত্ৰীসকল লগে লগে সহায়ৰ বাবে আগবাঢ়ি আহে। তেওঁলোকে বিচনা চাদৰ আৰু কম্বলেৰে আসনসমূহ ঢাকি দি এটা সুৰক্ষিত পৰিৱেশ সৃষ্টি কৰে আৰু ওচৰৰ যাত্ৰীসকলক কিছু আঁতৰলৈ পঠিয়াই দিয়ে। মহিলাসকলৰ সহযোগত ৰেলৰ ভিতৰতে প্ৰসৱ সম্পন্ন হয়। ইয়াৰ মাজতে এজন যাত্ৰীয়ে ৰেলৱে নিয়ন্ত্ৰণ কক্ষক ঘটনাটোৰ বিষয়ে খবৰ দিয়ে। খবৰ পোৱাৰ লগে লগে ৰেল প্ৰশাসনে তৎপৰতা দেখুৱাই পুৰণি ফৰিদাবাদ ষ্টেচনত ৰেলখন ৰখাৰ ব্যৱস্থা কৰে।
মাতৃ আৰু নৱজাতকৰ সুৰক্ষা নিশ্চিত কৰিবলৈ ৰেলখন প্ৰায় ২৬ মিনিট ধৰি ষ্টেচনটোত ৰৈ থাকে। ৰেলৱেৰ মহিলা চিকিৎসা কৰ্মচাৰীসকলে ডবাটোত উপস্থিত হৈ দুয়োৰে প্ৰাৰম্ভিক স্বাস্থ্য পৰীক্ষা কৰে। ইয়াৰ পিছত ৰেল সুৰক্ষা বাহিনী আৰু ৰেল আৰক্ষীৰ মহিলা জোৱানসকলৰ সহায়ত তেওঁলোকক এম্বুলেন্সেৰে ফৰিদাবাদৰ বি কে হাস্পতাললৈ লৈ যোৱা হয়। বৰ্তমান মাতৃ আৰু কন্যা সন্তানটি সম্পূৰ্ণ সুস্থ আছে বুলি চিকিৎসক আৰু আৰক্ষীয়ে নিশ্চিত কৰিছে।
