এগৰাকী নিৰামিষহাৰী মহিলাই এখন ৰেষ্টুৰেণ্টলৈ পিজ্জা অনলাইন অৰ্ডাৰ দিছিল।
ৰেষ্টুৰেণ্টখনেও তেওঁক পিজ্জা ডেলিভাৰি দিলে।
পিজ্জাটো খোৱাৰ সলনি তেওঁ উপভোক্তা আদালতত গোচৰ তৰে।
গোচৰ তৰে ক্ষতিপূৰণৰ।
ক্ষতিপূৰণো কম নহয়।
এক কোটি টকা!
ধৰ্মীয় অনুভূতিত আঘাত পোৱাৰ অভিযোগত এই ক্ষতিপূৰণৰ গোচৰ।
ঘটনাটো উত্তৰ প্ৰদেশৰ গাজিয়াবাদত।
কিন্তু কিয়?
সংবাদ মাধ্যমত প্ৰকাশ পোৱা মতে, দীপালি ত্যাগী নামৰ মহিলাগৰাকী এগৰাকী নিৰামিষহাৰী।
গোচৰৰ আবেদনখনত তেওঁ দাবী কৰা মতে, তেওঁ নিৰামিষহাৰী হোৱাৰ মূলতে হ’ল তেওঁৰ ”ধৰ্মীয় বিশ্বাস, সংস্কাৰ, পৰিয়ালৰ পৰম্পৰা, নিজা বিবেক”।
কিন্তু অৱশেষত সকলো সংস্কাৰ পালন কৰিও শেষত এটা আমিষ পিজ্জা কামুৰিব লগা হ’ল!
ঘটনাটো ২০১৯ চনৰ ২১ মাৰ্চৰেই।
সেইদিনা আছিল হোলী।
দীপালিয়ে পৰিয়ালবৰ্গৰ স’তে হোলী উদযাপনৰ বাবে গাজিয়াবাদৰ এখন আমেৰিকান ৰেষ্টুৰেণ্টলৈ এটা নিৰামিষ পিজ্জা অৰ্ডাৰ দিছিল।
যেতিয়া কিছু পলমকৈ পিজ্জাটো ডেলিভাৰি দিয়ে, তেওঁ লগে লগে পিজ্জাটো খাবলৈ ধৰে।
কিন্তু কামুৰ মৰাৰ লগে লগে গম পায় যে পিজ্জাটো নিৰামিষ নহয়!
লগে লগে তেওঁ ধৰ্মীয় আৱেগত আঘাত পায়।
গোচৰৰ আবেদনখনত তেওঁ কোৱামতে, কামোৰাৰ লগে লগে তেওঁ গম পায় যে পিজ্জাত কাঠফুলাৰ সলনি মাংসহে আছে।
তেওঁৰ অধিবক্তা ফাৰহাট ৱাৰ্চিয়ে আদালতত কয় যে দীপালিয়ে লগালগ গ্ৰাহক কেন্দ্ৰলৈ ফোন কৰে।
ফোন কৰি তেওঁ আপত্তি দৰ্শাই যে এগৰাকী বিশুদ্ধ নিৰামিষহাৰী লোকৰ ঘৰলৈ কিয় আমিষ পিজ্জা পঠাব!
কিছু দিনৰ পাছত, ৰেষ্টুৰেণ্টখনৰ মেনেজাৰজনে দীপালিক মাতে।
তেওঁ প্ৰতিশ্ৰুতি দিয়ে যে গোটেই পৰিয়ালটোকে এদিন বিনামূল্যে পিজ্জাৰ যোগান ধৰিব।
কিন্তু দীপালিয়ে কয় যে এই ঘটনাটো সৰল নহয়, যিহেতু তেওঁৰ ধৰ্মীয় বিশ্বাস আৰু পৰম্পৰাক আঘাত কৰা হৈছে।
ধৰ্মীয় অনুভূতিত আঘাট পোৱাৰ বাবে তেওঁৰ চীৰকালৰ বাবে মানসিক অশান্তি হোৱা বুলিও কয়।
তদুপৰি তেওঁ কয় যে পিজ্জাটো কামোৰাৰ প্ৰায়শ্বিত্তৰ বাবে তেওঁ দীৰ্ঘকালৰ বাবে খৰচী সংস্কাৰ অনুষ্ঠান অনুষ্ঠিত কৰিব লাগিব।
যাৰ বাবে তেওঁৰ সমগ্ৰ জীৱনটোত লাখ লাখ টকা খৰচ হ’ব।
ঘটনাটোৱে সচেতন মহলত চাঞ্চল্যৰ সৃষ্টি কৰিছে।
