মহিলাগৰাকীক ‘বিদেশী’ ঘোষণা কৰা হৈছিল। বিদেশী ন্যায়াধিকৰণৰ নিৰ্দেশত ডিটেনচন কেম্পত দিন কটাইছিল। শিলচৰৰ ডিটেনচন কেম্পত দুবছৰ কটাইছিল। অৱশেষত নাগৰিকত্ব (সংশোধনী) আইন (CAA)ৰ অধীনত ভাৰতীয় নাগৰিকত্ব লাভ কৰে মহিলাগৰাকীয়ে।
সূত্ৰৰ পৰা জানিব পৰা মতে, ‘বিদেশী’ বুলি ঘোষণা হোৱা আৰু ডিটেনচন কেম্পত থকাৰ পিছত এইবাৰ প্ৰথমবাৰৰ বাবে কাৰোবাক ভাৰতীয় নাগৰিকত্ব প্ৰদান কৰা হৈছে।
জানিব পৰা মতে, মহিলাগৰাকীৰ নাম দীপালী দাস। বাংলাদেশৰ চিলেটত জন্মগ্ৰহণ কৰিছিল বৰ্তমান ৬০ বছৰীয়া মহিলাগৰাকী। অৱশ্যে ১৯৮৮ চনৰ ৭ ফেব্ৰুৱাৰীত অসমলৈ আহি শিলচৰৰ ধলাই অঞ্চলৰ হাৱাইথাংত বসবাস কৰিবলৈ আৰম্ভ কৰে।
অসমৰ বিদেশী ন্যায়াধিকৰণে তেওঁৰ হাতত নাগৰিকত্বৰ কোনো নথি নথকাৰ বাবে তেওঁক ‘বিদেশী’ বুলি চিনাক্ত কৰে। ২০১৯ চনত নাগৰিকত্বৰ নথি দাখিল কৰিব নোৱাৰাৰ বাবে ডিটেনচন কেম্পত থাকিবলৈ নিৰ্দেশ দিয়া হয়। মুকলি হোৱাৰ পূৰ্বে প্ৰায় দুবছৰ ধৰি তেওঁ ডিটেনচন কেম্পত আছিল।
জানিব পৰা মতে, মুকলি হোৱাৰ পাছত দীপালীয়ে অঞ্চলটোৰ এগৰাকী সমাজকৰ্মীৰ সৈতে যোগাযোগ কৰে। ধৰ্মানন্দ দেৱ নামৰ এজন অধিবক্তাৰ জৰিয়তে পুনৰ ভাৰতীয় নাগৰিকত্বৰ বাবে আবেদন কৰে। দীৰ্ঘদিনীয়া আইনী যুঁজৰ অন্তত দীপালীয়ে নাগৰিকত্ব লাভ কৰিছে।
সূত্ৰ অনুসৰি, তেওঁৰ নাগৰিকত্বৰ প্ৰমাণ পত্ৰ প্ৰদান কৰিছে অসমৰ লোকপিয়ল সঞ্চালকালয়ৰ সঞ্চালক বিশ্বজিৎ পেগুৱে। ইয়াত উল্লেখ আছে যে দীপালী সকলো ৰাজনৈতিক আৰু অন্যান্য অধিকাৰ, ক্ষমতা আৰু সা-সুবিধা লাভৰ অধিকাৰী হ’ব। ভাৰতীয় নাগৰিকৰ সকলো বাধ্যবাধকতা, কৰ্তব্য আৰু দায়িত্বও পালন কৰিব।
অধিবক্তা ধৰ্মানন্দই কয়, ‘এই গোচৰটো কেৱল অনন্যই নহয়, ঐতিহাসিকো। কাৰণ বিদেশী ঘোষণা কৰি আটক কৰি ৰখাৰ পিছতো এতিয়া তেওঁক CAAৰ অধীনত ভাৰতীয় নাগৰিকত্ব প্ৰদান কৰা হৈছে।’ তেওঁ লগতে দাবী কৰে যে ডিটেনচন কেম্পত থকা কোনো লোকক প্ৰথমবাৰৰ বাবে দেশত নাগৰিকত্ব দিয়া হৈছে।
