কিছুমান কাণ্ডই কোনো অবান্তৰ চিন্তাকে সন্মুখলৈ আনি মানুহৰ মন-মগজুক আলোড়িত কৰি তোলে। এনে এক কাণ্ডত এগৰাকী মহিলাই কি কৰিলে চাওক।
ঘৰৰ সন্মুখৰ লনৰ ওপৰত চকীত বহি কিতাপ পঢ়িছে মহিলাগৰাকীয়ে। তেওঁৰ সেই দৃশ্য কেমেৰাত বন্দী কৰি ৰাখে প্ৰতিবেশীয়ে। পাছত সেয়া ভাইৰেল হৈ পৰে।
কিন্তু মহিলাগৰাকীয়ে কেবল লনত বহি কিতাপ পঢ়ি থকাতনো কাৰ কিহৰ আপত্তি থাকিব পাৰে? পিচে, সেয়া নহয়, লনত চকীত আহি বহাৰ পূৰ্বে মহিলাগৰাকীয়ে নিজৰ ঘৰতে জুই লগাই থৈ আহিছিল।
এইটো আমেৰিকাৰ মেৰিলেণ্ড অঞ্চলৰ ঘটনা। অ্যাভেৰি হেমণ্ড নামৰ ব্যক্তিগৰাকীয়ে এই ভিডিঅ’টো ৰেকৰ্ড কৰিছিল। ভাইৰেল হৈ পৰা সেই ভিডিঅ’টোত দেখা গৈছে এখন ঘৰৰ বাৰান্দাত মহিলা এগৰাকী আৰু এগৰাকী পুৰুষৰ কাজিয়া হৈছে।
অভিযুক্ত মহিলাগৰাকী হৈছে ৪৭বছৰীয়া গেইল মেট’ৱালি। গেইলে পাছত ঘৰখনৰ আন এগৰাকী মহিলাৰ সৈতে কাজিয়াত লিপ্ত হোৱা দেখা গৈছে। ভিডিঅ’টোৰ এটা অংশত দেখা গৈছে যে গেইলে বাহিৰত চকীত বহি আছে আৰু ঘৰটোৰ ভিতৰত জুই জ্বলিছে।
বাতৰি অনুসৰি উক্ত ঘৰটোত চাৰিগৰাকী লোক থাকে। ঘটনাৰ সময়ত ইয়াৰে দুগৰাকী বাহিৰত আছিল। আৰু এগৰাকী মহিলা ঘৰৰ বেছমেন্টত আছিল। তেওঁৱেই আতংকিত হৈ চিঞৰিছিল। পাছত কোনোমতে বেছমেন্টৰ খিৰিকি ভাঙি চুবুৰীয়াসকলে মহিলাগৰাকীক উদ্ধাৰ কৰে।
ইপিনে, দীৰ্ঘসময় ধৰি জুই জ্বলাই দি ৰং চাই থকা গেইল হঠাতে ঘটনাস্থলীৰ পৰা পলায়ন কৰে। চুবুৰীয়াসকলে দিয়া খৱৰ লাভ কৰি অগ্নি নিৰ্বাপক গাড়ী আহি জুই নুমুৱায়।
ঘটনাৰ পাছতে গেইলৰ বিৰুদ্ধে অগ্নিসংযোগ তথা হত্যাৰ প্ৰচেষ্টাৰ অভিযোগ অনা হৈছে। মেৰিলেণ্ড আৰক্ষীয়ে গেইলক গ্ৰেপ্তাৰ কৰে। মানসিক ভাৰসাম্য হেৰুওৱা গেইলৰ বিৰুদ্ধে বিভিন্ন ধাৰাত গোচৰ তৰা হৈছে।