অৱজ্ঞাৰ পোতক ল’বলৈ এগৰাকী নাৰী কিমান ভয়ংকৰ হৈ উঠিব পাৰে তাৰ এক চাঞ্চল্য্যকৰ উদাহৰণ পোৱা গৈছে বেংগালুৰুত। প্ৰেমিকৰ অৱজ্ঞাত অতিষ্ঠ হৈ এগৰাকী যুৱতীয়ে তেওঁক চকীত বহুৱাই বান্ধি লৈ জুই লগাই জীৱন্তে দাহ কৰাৰ দৰে এক লোমহৰ্ষক কাণ্ড সংঘটিত কৰিছে।
এই সমগ্ৰ হত্যাকাণ্ডৰ দৃশ্য যুৱতীগৰাকীয়ে নিজৰ ম’বাইলত ভিডিঅ’ ৰেকৰ্ডিং কৰিও ৰাখিছিল। মঙলবাৰে বেংগালুৰুৰ অঞ্জনাপুৰা অঞ্চলত এই ঘটনাটো সংঘটিত হোৱাৰ পিছতে সমগ্ৰ অঞ্চলটোত ব্যাপক উত্তেজনাৰ সৃষ্টি হৈছে।
আৰক্ষীৰ পৰা পোৱা তথ্য অনুসৰি সাতাইশ বছৰীয়া যুৱতী প্ৰেৰণা আৰু কিৰণ নামৰ যুৱকজনৰ মাজত যোৱা এবছৰতকৈ অধিক সময় ধৰি প্ৰেমৰ সম্পৰ্ক আছিল। তেওঁলোক দুয়ো একেখন দোকানতে কাম কৰিছিল। কিন্তু শেহতীয়াকৈ কিৰণে প্ৰেৰণাক গুৰুত্ব নিদি অৱজ্ঞা কৰিবলৈ আৰম্ভ কৰিছিল। ইয়াৰ উপৰিও কিৰণে তেওঁক বিয়া কৰাব নে নাই সেই লৈও প্ৰেৰণাৰ মনত গভীৰ অনিশ্চয়তা আৰু সন্দেহৰ সৃষ্টি হৈছিল। প্ৰেমিকৰ এনে আচৰণত ক্ৰোধিত হৈ প্ৰেৰণাই তেওঁক হত্যা কৰাৰ এক ভয়ংকৰ পৰিকল্পনা হাতত লয়।
মঙলবাৰে অঞ্জনাপুৰাস্থিত নিজৰ ঘৰলৈ প্ৰেৰণাই কিৰণক নিমন্ত্ৰণ জনাইছিল। সেই সময়ত ঘৰত প্ৰেৰণাৰ মাতৃ আৰু ককায়েক কোনো উপস্থিত নাছিল। কিৰণ উপস্থিত হোৱাৰ পিছত দুয়োৰে মাজত কিছু সময় কথা-বতৰা হয়। ইয়াৰ পিছতে প্ৰেৰণাই কিৰণক কয় যে তেওঁ আজি তেওঁক বিদেশী কায়দাত প্ৰেম নিবেদন কৰিব বিচাৰে। কিৰণে কথাটো বিশ্বাস কৰি সন্মতি দিয়াত প্ৰেৰণাই তেওঁৰ চকু দুটা বান্ধি এখন চকীত বহুৱায় আৰু তাৰৰ সহায়ত চকীখনৰ সৈতে টানকৈ বান্ধি পেলায়। কিৰণে একো বুজি পোৱাৰ আগতেই প্ৰেৰণাই তেওঁৰ দেহত কেৰাচিন ঢালি জুই জ্বলাই দিয়ে।
কিৰণে চকীৰ সৈতে আবদ্ধ হৈ মৃত্যু যন্ত্ৰণাত ছটফটাই থকাৰ সময়তো প্ৰেৰণাৰ মনত কোনো দয়া ভাৱ অহা নাছিল। বৰঞ্চ তেওঁ নিৰ্বিকাৰ হৈ সমগ্ৰ দৃশ্যটো নিজৰ ম’বাইলৰ কেমেৰাত বন্দী কৰি আছিল। জুইত সম্পূৰ্ণৰূপে অগ্নিদগ্ধ হৈ থিতাতে কিৰণৰ মৃত্যু হয়।
এই কাণ্ডৰ খবৰ পোৱাৰ পিছতে আৰক্ষীয়ে অভিযুক্ত প্ৰেৰণাক গ্ৰেপ্তাৰ কৰে। আৰক্ষীৰ জেৰাত যুৱতীগৰাকীয়ে নিজৰ অপৰাধ স্বীকাৰ কৰিছে আৰু কেৱল প্ৰেমিকৰ অৱজ্ঞাৰ প্ৰতিশোধ ল’বলৈকে তেওঁ এই চৰম পথ বাছি লৈছিল বুলি জনাইছে। আৰক্ষীৰ উচ্চপদস্থ বিষয়াই জানিবলৈ দিয়া মতে ঘটনাটোৰ তদন্ত বৰ্তমান অব্যাহত আছে।
