পৰিষ্কাৰ-পৰিচ্ছন্নতাৰ শিতানত শ্ৰেষ্ঠতাৰ পুৰষ্কাৰ লাভ কৰা শিৱসাগৰ পৌৰসভাই আজি আন এটা পদক্ষেপ ল’লে। নগৰখন পৰিষ্কাৰ কৰি ৰখাৰ বাবে শিৱসাগৰ জিলা প্ৰশাসন আৰু শিৱসাগৰ পৌৰসভাৰ উদ্যোগত আগবাঢ়ি আহিছে মহিলা শক্তি। মহিলাই কৰদাতাৰ পদুলিৰ পৰা সংগ্ৰহ কৰিব জাবৰ।
আজি নগৰৰ ফুকননগৰ পানী যোগান প্ৰকল্প চৌহদত জাৱৰ নিষ্কাশনৰ এক পাইলট প্ৰজেক্ট শুভাৰম্ভ কৰে শিৱসাগৰ জিলাৰ উপায়ুক্ত এম এছ লক্ষ্মীপ্ৰিয়াই। দে এন ইউ এল এম আঁচনিৰ অধীনত জাৱৰ পৃথকীকৰণ কৰি জৈৱিক আৰু যৌগিক জাৱৰ নিষ্কাশনৰ ব্যৱস্থা কৰা হ’ব।
অসমত প্ৰথমবাৰৰ বাবে এনে ব্যৱস্থাত নিয়োগ কৰা হৈছে মহিলা আত্মসহায়ক গোট। পাইলট প্ৰজেক্ট ৰূপে শিৱসাগৰ নগৰৰ ১০ নং আৰু ১৪ নং ৱাৰ্ডত ক্ৰমে মূলাগাভৰু আৰু জননী আত্মসহায়ক গোটৰ মহিলাসকলে কৰদাতাৰ পদুলিৰ পৰা জাবৰ সংগ্ৰহ কৰাৰ ব্যৱস্থা কৰা হৈছে।
আনহাতে এই পাইলট প্ৰজেক্ট আৰম্ভ কৰি শিৱসাগৰ জিলাৰ উপায়ুক্ত গৰাকীয়ে ১০ নং ৱাৰ্ডৰ এঘৰ লোকৰ ঘৰৰ পৰা জাবৰ সংগ্ৰহ কৰি এক উদাহৰণ দাঙি ধৰে। এই দুই ৱাৰ্ডৰ সফলতাৰ ভিত্তিত পৰৱৰ্তী সময়ত আন ১২ টা ৱাৰ্ডত জাবৰ নিষ্কাশনৰ বাবে মহিলা আত্মসহায়ক গোট নিয়োগৰ ব্যৱস্থা কৰিব বুলিও জানিব পৰা গৈছে।
পাইলট প্ৰজেক্ট উদ্ধোধনী অনুষ্ঠানত শিৱসাগৰ পৌৰসভাৰ পৌৰনেত্ৰী মৃদুস্মিতা সিনহা, কাৰ্যবাহী বিষয়া ৰিতুৰাজ বৰদলৈ, নগৰ প্ৰকল্প বিষয়া মৃদুল কুমাৰ নাথৰ লগতে বহু গণ্য-মান্য ব্যক্তি উপস্থিত থাকে।
উল্লেখযোগ্য যে আজিৰ পৰা বহু দিনৰ আগত বিভিন্ন আঁচনি-পৰিকল্পনা হাতত লৈ নগৰখনক জাৱৰমুক্ত কৰিবলৈ বিফল হোৱা শিৱসাগৰ পৌৰসভাৰ এই নতুন আঁচনি কিমান দূৰ সফল হয় সেই কথা সময়ে প্ৰমাণ কৰিব।
