এক গেছ দুৰ্ঘটনাৰ ঘটনাই আজি জোকাৰি গ’ল অন্ধ্ৰ প্ৰদেশক।
ৰাজ্য খনৰ আনাকাপালে জিলাত থকা উদ্যোগৰ পৰা গেছ নিৰ্গত হোৱাৰ ফলত উদ্যোগটোৰ কাষতে থকা ব্ৰেণ্ডিক্স এপাৰেল ইণ্ডিয়া নামৰ এটা পোছাক প্ৰতিষ্ঠানৰ প্ৰায় ২০০ গৰাকী মহিলা কৰ্মী অসুস্থ হৈ পৰে। পোৰাছ লেবৰেটৰী নামৰ কোম্পানীটোত গেছ নিৰ্গমন হোৱাৰ ঘটনাটো ঘটে।
অন্ধ্ৰ প্ৰদেশৰ অচ্যুতপুৰম অঞ্চলৰ বিশেষ অৰ্থনৈতিক ক্ষেত্ৰত সংঘটিত হয় এই গেছ নিৰ্গমনৰ ঘটনা।
কোম্পানীটোৰ পৰা গছে নিৰ্গমন হোৱাৰ পিছতে কাষত থকা বস্ত্ৰ উদ্যোগত কাম কৰি থকা মহিলাসকলে বমি, মূৰৰ বিষ আৰু চকু জ্বলা-পোৰা কৰাৰ লক্ষণত ভুগিবলৈ ধৰে।
ঘটনাৰ খবৰ পোৱাৰ পিছতে আৰক্ষীয়ে ঘটনাস্থলীত উপস্থিত হৈ গেছ নিৰ্গমনৰ ফলত অসুস্থ হৈ পৰা মহিলাসকলক চিকিৎসালয়লৈ নিয়াৰ ব্যৱস্থা কৰে।
সকলো অসুস্থ মহিলাই বৰ্তমান বিপদমুক্ত বুলি জানিব পৰা গৈছে। অনকাপল্লীৰ আৰক্ষী অধীক্ষক গৌতমী চালীয়ে কয় যে গেছবিধ মাৰাত্মক নাছিল।
নিৰ্গমন হোৱা গেছ বিধ এমোনিয়া গেছ আছিল বুলি আৰক্ষী অধীক্ষকগৰাকীয়ে জানিবলৈ দিয়ে।
গেছ নিৰ্গমনৰ সময়ত কোম্পানীটোত ১,৮০০ জন লোকে কাম কৰি আছিল।
সকলো কৰ্মচাৰীকে ইতিমধ্যে স্থানান্তৰিত কৰা হৈছে। অসুস্থ লোকসকলক অচ্যুতপুৰমৰ দুখন ব্যক্তিগত চিকিৎসালয় আৰু আনাকাপালৰ এনটিআৰ চিকিৎসালয়লৈ স্থানান্তৰিত কৰা হৈছিল। উদ্যোগটোৰ পৰা কিদৰে গেছ নিৰ্গমন হ’বলৈ পালে সেয়া আৰক্ষীয়ে পৰীক্ষা কৰি আছে।
