হত্যাকাণ্ডৰ বাবে হত্যাকাৰীয়ে ২০০ টকাৰ কাঠ ফলা কৰত আৰু শৰীৰৰ বিচ্ছিন্ন অংগ ভৰোৱাৰ বাবে ১১০০ টকাৰ ক’লা প্লাষ্টিক আৰু ফয়েলৰ বেগ ক্ৰয় কৰিছিল। হত্যাকাণ্ডৰ পিছত মৃতদেহৰ অংগ সৰবৰাহ কৰাৰ সকলো পৰিকল্পনা সাজু হৈ উঠিছিল। কিন্তু হত্যাকাৰীয়ে এৰি থৈ যোৱা সৰু সূত্ৰৰ পৰাই গোটেই ঘটনাটোৰ পাক ঘুৰি গ’ল। কটা হাতৰ টুকুৰাৰ সৰু টেটুৰ সূত্ৰৰ পম খেদি লোমহৰ্ষক হত্যাৰ ৰহস্য উদ্ঘাটন কৰিলে আৰক্ষীয়ে।
উত্তৰ প্ৰদেশৰ চম্ভলৰ এজন লোকক হত্যা কৰাৰ লগতে নলাকে ধৰি বিভিন্ন ঠাইত মৃতদেহ কাটি পেলোৱাৰ অভিযোগ উত্থাপন হৈছে পত্নী আৰু প্ৰেমিকৰ বিৰুদ্ধে। উত্তৰ প্ৰদেশ আৰক্ষীৰ সূত্ৰ অনুসৰি ৰাহুল নামৰ ৩৮ বছৰীয়া যুৱক এজনৰ নিৰুদ্দেশৰ তদন্তত চাঞ্চল্যকৰ হত্যাকাণ্ডৰ ৰহস্য উদ্ধাৰ হয়।
সূত্ৰ অনুসৰি চম্ভলৰ চাণ্ডাউছি অঞ্চলৰ মহল্লা চুন্নী নিবাসী ৰুবীয়ে ১৮ নৱেম্বৰত স্বামীৰ নিৰুদ্দেশৰ ৰিপোৰ্ট স্থানীয় থানাত দাখিল কৰে। ইয়াৰ পিছত ১৫ ডিচেম্বৰত ঈদগাহ অঞ্চলৰ সমীপৰ এটা নলাৰ পৰা পচি যোৱা শৰীৰৰ অংগ উদ্ধাৰ কৰে আৰক্ষীয়ে। মূৰ, হাত আৰু ভৰিৰ সন্ধান পোৱা নগ’ল। কিন্তু কটা মৃতদেহত ‘ৰাহুল’ শব্দ লিখা টেটুৰ সূত্ৰ ধৰি আৰক্ষীয়ে তদন্ত আৰম্ভ কৰে।
কেইবাটাও সূত্ৰই ইংগিত দিয়ে যে শৰীৰৰ অংগসমূহ ৰুবীৰ নিৰুদ্দেশ হোৱা স্বামীৰ। অৱশ্যে মৃতদেহটো চিনাক্ত কৰিবলৈ আহি ৰুবীয়ে অস্বীকাৰ কৰে। তদন্তকাৰীয়ে ডি এন এ আৰু ফৰেনছিক নমুনা সংগ্ৰহ কৰি তদন্ত অব্যাহত ৰাখিছে।
আৰক্ষীয়ে দাবী কৰে যে ৰাহুলৰ পত্নী ৰুবীৰ বক্তব্যত কেইবাটাও বিসংগতি ধৰা পৰে। আৰক্ষীয়ে জনোৱা মতে, ১৮ নৱেম্বৰৰ পৰা ৰাহুলৰ ফোনটো চুইচ অফ হৈ আছিল। আনহাতে ৰুবীৰ ফোনটোৰ কল ডিটেইল চেক কৰাত হত্যাকাণ্ড আৰু মৃতদেহ লুকুৱাৰ সৈতে জড়িত বিভিন্ন প্ৰমাণ পোৱা যায়।
চম্ভল আৰক্ষীয়ে জনোৱা মতে, ইয়াৰ পিছতে ৰুবীক জেৰা কৰা হয়। আৰক্ষীয়ে সোধা-পোছা কৰাত তাই অপৰাধ স্বীকাৰ কৰে। বিবাহ বহিৰ্ভূত প্ৰেমৰ কথাও স্বীকাৰ কৰে। জানিব পৰা মতে, তাইৰ প্ৰেমিক গৌৰৱেও ৰাহুলক হত্যা কৰাত সহায় কৰিছিল। আৰক্ষীয়ে জনোৱা মতে, ৰাহুলক হত্যা কৰিবলৈ ৰুবী আৰু গৌৰৱে কৰতকে ধৰি কেইবাটাও বস্তু কিনিছিল।
আৰক্ষীয়ে জনোৱা মতে, ৰুবীয়ে গৌৰৱক নিজৰ ঘৰলৈ মাতিছিল। ইয়াৰ পিছত দুয়োজনে লোহাৰ ৰড আৰু হাতুৰীৰে ৰাহুলক হত্যা কৰে। হত্যাকাণ্ডৰ পিছত ৰুবীয়ে মৃতদেহটো লুকুওৱোৰ বুদ্ধি দিয়ে। তেজ বিয়পি নপৰাৰ বাবে কৰতেৰে মৃতদেহটো টুকুৰা টুকুৰ কৰি ক’লা প্লাষ্টিক আৰু ফয়েলৰ বেগ ভৰাই পেলোৱা হয়। মূৰ, ডিঙি, হাত আৰু ভৰি বেলেগ বেলেগ বেগত ভৰোৱা হয়।
ইয়াতেই শেষ নহয়। আৰক্ষীৰ অভিযোগ যে ৰুবী আৰু গৌৰৱে গাড়ী ভাড়া কৰি ৰাহুলৰ শৰীৰৰ অংগসমূহ চম্ভলৰ নলাত আৰু বিভিন্ন স্থানত পেলাই দিছিল। আৰক্ষীয়ে জনোৱা মতে, মৃতদেহটো উদ্ধাৰ কৰাৰ পিছতো ৰুবীয়ে মৃত লোকজনৰ কাপোৰ দেখিও চিনাক্ত কৰা নাছিল। ইয়াৰ বাবে আৰক্ষীৰ সন্দেহ বৃদ্ধি পায়।
ইপিনে, ৰুবীৰ ফোন গেলেৰীত একেটা সাজ-পোছাক পিন্ধা ৰাহুলৰ এখন ছবি আছিল। কলৰ সবিশেষ পৰীক্ষা কৰি দেখা গ’ল যে যোৱা তিনিমাহত ৰুবীয়ে প্ৰেমিক গৌৰৱৰ সৈতে ফোনত ১১০০ বাৰ কথা পাতিছিল। অগণন মেচেজ আহিছিল।
সকলো তথ্য আৰু প্ৰমাণৰ ভিত্তিত আৰক্ষীয়ে গৌৰৱ আৰু ৰুবীক গ্ৰেপ্তাৰ কৰিছে। ভাৰতীয় দণ্ডবিধিৰ সংশ্লিষ্ট ধাৰাত অভিযুক্ত দুজনৰ বিৰুদ্ধে গোচৰ ৰুজু কৰা হৈছে।
