নৈৰাজ্যৰ দেশ আফগানিস্তানত তালিবানৰ বিৰুদ্ধে প্ৰতিবাদ কৰা মানেই মৃত্যুক স্বাগতম জনোৱা।
মৃত্যু ভয়ক শিৰতলৈয়ো পিছে তালিবানৰ বিৰুদ্ধে এইবাৰ প্ৰতিবাদত নামিল আফগানিস্তানৰ বহু সাহসী মহিলা।
শেহতীয়াকৈ তালিবানে আফগানিস্তানত গঠন কৰা অন্তৰ্ৱতী চৰকাৰত এগৰাকীও মহিলা প্ৰতিনিধি ৰখা হোৱা নাই।
মহিলাৰ বিৰুদ্ধে তালিবানে কৰা এনে বৈষম্যৰ বিৰুদ্ধে এইবাৰ সেয়ে ৰাজপথলৈ ওলাই আহিল এজাক সাহসী আফগান মহিলা।
দেশ খনৰ ৰাজধানী কাবুল আৰু উত্তৰ-পূব অংশত অৱস্থিত বাদাখস্তানৰ একাংশ মহিলাই ৰাজপথত তালিবানৰ বিৰুদ্ধে প্ৰতিবাদ সাৱ্যস্ত কৰাৰ সময়তে তালিবানে বহু প্ৰতিবাদী মহিলাক অতি বৰ্বৰ ভাবে প্ৰহাৰ কৰা বুলি জানিব পৰা গৈছে।
আফগানিস্তানৰ সংবাদ প্ৰতিষ্ঠান Etilaatroz -এ প্ৰকাশ কৰা অনুসৰি মহিলাসকলৰ এনে প্ৰতিবাদৰ খবৰ প্ৰচাৰ কৰা বাবে তালিবানে আনকি বহু কেইজন সাংবাদিকক প্ৰহাৰ কৰাৰ লগতে আটক কৰিও ৰাখিছে।
তালিবানে ইতিমধ্যে এনেধৰণৰ সকলো প্ৰতিবাদক অবৈধ ঘোষণা কৰিছে। উল্লেখ্য মঙলবাৰেও আফগানিস্তানৰ হেৰাট প্ৰদেশত তালিবানৰ বিৰুদ্ধে পৰ্ৰতিবাদ কৰা তিনি জন লোকক তালিবানে গুলীয়াই হত্যা কৰিছিল।
উল্লেখ্য মঙলবাৰে তালিবানে আফগানিস্তানক ইছলামিক গণৰাজ্য হিচাবে ঘোষণা কৰাৰ লগতে এখন অন্তৰ্ৱতীকালীন চৰকাৰ গঠন কৰাৰ কথা ঘোষণা কৰিছিল।
তালিবানৰ এই নতুন চৰকাৰ খনত কোনো এগৰাকী মহিলাকেই স্থান দিয়া হোৱা নাই।
তাৎপৰ্যপূণ ভাবে উক্ত চৰকাৰৰ মুৰববীৰ দায়িত্ব অৰ্পন কৰা হৈছে ৰাষ্ট্ৰসংঘই ব্লেক লিষ্টেড কৰি থোৱা সন্ত্ৰাসবাদী মোল্লা মহম্মদ হাছান আকন্দক।কেৱল সেয়াই নহয়।
অন্তৰ্ৱতীকালীন চৰকাৰ আভ্যন্তৰীণ দপ্তৰৰ মন্ত্ৰী হিচাবে নিযুক্তি দিয়া হৈছে এফবিআই-এ মষ্ট ৱাণ্টেড ঘোষণা কৰা হাক্কানী গ্ৰুপৰ নেতা ছিৰাজুদ্দিন হাক্কানীক।
অন্তৰ্ৱতীকালীন চৰকাৰৰ কেবিনেটে আফগানিস্তানত এখন পূৰ্ণাংগ আৰু স্থায়ী চৰকাৰৰ ৰূপৰেখা প্ৰস্তুত কৰিব বুলি তালিবানে প্ৰকাশ কৰিছে।
ইপিনে তালিবানে গঠন কৰি দিয়া অন্তৰ্ৱতীকালীন চৰকাৰ খনত কেইবাজনো মষ্ট ৱাণ্টেড সন্ত্ৰাসবাদী অন্তৰ্ভূক্ত হোৱাৰ বিষয়টোৱে বিশ্বজুৰি চাঞ্চল্যৰ সৃষ্টি কৰিছে।
আকন্দে ইংৰাজী ভাষাত প্ৰকাশ কৰা এক বিজ্ঞপ্তিত এই বুলি কৈছে যে তালিবানৰ চৰকাৰে আফগানিস্তানৰ চুবুৰীয়া দেশ সমূহৰ সৈতে সৌহাৰ্দ্যপূৰ্ণ সম্পৰ্ক বৰ্তাই ৰাখিব বিচাৰে।
উল্লেখ্য আজিলৈকে আকন্দে কোনো দিনে ৰাজহুৱাভাবে দৰ্শন দিয়া নাই। এয়াই তেওঁৰ প্ৰথন বিজ্ঞপ্তি।
ইপিনে আফগানিস্তানৰ নেছনেল ৰেজিষ্টেণ্ট ফ্ৰণ্টে তালিবানৰ অন্তৰ্ৱতীকালীন চৰকাৰ খনক অবৈধ আখ্যা দিছে।