পুনৰ এবাৰ যৌন নিৰ্যাতনৰ অভিযোগে জোকাৰি গৈছে ভাৰতীয় ক্ৰীড়াক্ষেত্ৰক। এইবাৰ এই অভিযোগ উত্থাপন হৈছে ভাৰতীয় মল্লযুঁজ ফেডাৰেচনৰ বিৰুদ্ধে। ভাৰতীয় মল্লযুঁজ ফেডাৰেচন আৰু ফেডাৰেচনৰ সভাপতি বৃজভূষণ শৰণ সিঙৰ বিৰুদ্ধে গুৰুতৰ অভিযোগ উত্থাপন কৰিছে ভাৰতীয় ক্ৰীড়াজগতৰ এক পৰিচিত নাম ভিনেশ ফ’গাটে।
কমনৱেলথ গেমছ আৰু এছিয়ান গেমছ- দুয়ো প্ৰতিযোগিতাতে স্বৰ্ণ পদক লাভ কৰা প্ৰথমগৰাকী ভাৰতীয় মহিলা মল্লযুঁজাৰু ভিনেশ ফ’গাটে আজি ভাৰতীয় মল্লযুঁজ ফেডাৰেচন আৰু ফেডাৰেচনৰ সভাপতি বৃজভূষণ শৰণ সিঙৰ বিৰুদ্ধে নিৰ্যাতনৰ অভিযোগ উত্থাপন কৰিছে।
তাৰকা খেলুৱৈগৰাকীৰ অভিযোগ মতে “ৰাষ্ট্ৰীয় প্ৰশিক্ষক সকলে বছৰ বছৰ ধৰি মহিলা মল্লযুঁজাৰুসকলক নিৰ্যাতন চলাই আহিছে আৰু ভাৰতীয় মল্লযুঁজ ফেডাৰেচনৰ বিষয়াসকলে খেলুৱৈসকলক মৃত্যুৰ ভাবুকি পৰ্যন্ত দিছে। দেশৰ অন্যান্য শীৰ্ষ মল্লযুঁজাৰুসকলেও এই অভিযোগ তুলি আজি নতুন দিল্লীৰ যন্তৰ মন্তৰত ব্যাপক প্ৰতিবাদ সাব্যস্ত কৰে।
মল্লযুঁজাৰুসকলে ডব্লিউ এফ আইৰ সভাপতি বৃজভূষণ শৰণ সিঙক পদৰ পৰা অপসাৰণৰ দাবী জনায়। অলিম্পিক ব্ৰঞ্জ বিজয়ী মল্লযুঁজাৰু বজৰং পুনিয়াই প্ৰতিবাদস্থলীতে সভাপতি বৃজভূষণ শৰণ সিঙক অপসাৰণ নকৰা পৰ্যন্ত মল্লযুঁজাৰুসকলে কোনো আন্তঃৰাষ্ট্ৰীয় প্ৰতিযোগিতাত অংশগ্ৰহণ নকৰে বুলি ঘোষণা কৰে।
উল্লেখ্য যে, ২০১১ চনৰ পৰা ডব্লিউ এফ আইৰ নেতৃত্বত থকা সিঙে ২০১৯ চনৰ ফেব্ৰুৱাৰী মাহত একেৰাহে তৃতীয়বাৰৰ বাবে ডব্লিউ এফ আইৰ সভাপতি নিৰ্বাচিত হয়। সিঙৰ বিৰুদ্ধে সৰৱ হৈ পৰা ভিনেশ ফ’গাটে কয়, “আমাক ভাবুকি দিয়া হৈছিল যে আমি প্ৰতিবাদ কৰিলে আমাৰ কেৰিয়াৰৰ অন্ত পৰিব। ফেডাৰেচনৰ সদস্যসকলে মহিলা মল্লযুঁজাৰুৰ বিৰুদ্ধে অশ্লীল শব্দ ব্যৱহাৰ কৰিছিল। আমি প্ৰধানমন্ত্ৰীৰ কাষ চাপিছো।”
আজি যন্তৰ মন্তৰত প্ৰতিবাদত সমবেত হোৱা ৩০ গৰাকী মল্লযুঁজাৰুৰ ভিতৰত ৰিঅ’ অলিম্পিকৰ পদক বিজয়ী সাক্ষী মালিক, বিশ্ব চেম্পিয়নশ্বিপৰ পদক বিজয়ী সৰিতা মোৰ, সংগীতা ফ’গাট, সত্যৱত মালিক, জিতেন্দৰ কিনহা আৰু চি ডব্লিউ জিৰ পদক বিজয়ী সুমিত মালিক অন্যতম।
বিশ্ব চেম্পিয়নশ্বিপৰ পদক বিজয়ী তথা অলিম্পিয়ান ভিনেশে লগতে লক্ষ্ণৌৰ ৰাষ্ট্ৰীয় শিবিৰৰ কেইবাগৰাকীও প্ৰশিক্ষকে মহিলা মল্লযুঁজাৰুক শোষণ কৰা বুলি দাবী কৰে। তেওঁৰ অভিযোগ মতে প্ৰশিক্ষণ শিবিৰত দুই-এগৰাকী মহিলা কৰ্মচাৰীয়ে ডব্লিউ এফ আইৰ সভাপতিৰ নিৰ্দেশত মহিলা মল্লযুঁজাৰু সকলৰ কাষ চাপি প্ৰলোভন দেখুৱায় আৰু নিৰ্যাতনত সহায় কৰে।
ভিনেশে লগতে ৰাষ্ট্ৰীয় ফেডাৰেচনৰ ঘনিষ্ঠ কোনো কোনো প্ৰশিক্ষকে আনকি নাবালিকা শিকাৰুসকলকো শোষণ কৰিছে বুলি গুৰুতৰ অভিযোগ তুলিছে। প্ৰশিক্ষক সকলৰ এনে ঘৃণনীয় আতিশয্যৰ ফলত বহু কণমানি ছোৱালী ক্ষতিগ্ৰস্ত হৈছে বুলি দাবী কৰে ভিনেশ ফ’গাটে।
“মই কমেও ১০-১২ গৰাকী মহিলা মল্লযুঁজাৰুক চিনি পাওঁ যিসকলে মোক ডব্লিউ এফ আইৰ সভাপতিৰ হাতত সন্মুখীন হোৱা যৌন শোষণৰ কথা কৈছে। তেওঁলোকে মোক তেওঁলোকৰ কাহিনী কৈছে। মই এতিয়া তেওঁলোকৰ নাম ল’ব নোৱাৰো, কিন্তু যদি আমি দেশৰ প্ৰধানমন্ত্ৰী আৰু গৃহমন্ত্ৰীক সাক্ষাৎ কৰিব পাৰোঁ, নিশ্চিতভাৱে নাম প্ৰকাশ কৰিব পাৰিম।”-যন্তৰ মন্তৰত চাৰি ঘণ্টীয়া ধৰ্ণাৰ সময়ত সংবাদ মাধ্যমক সম্বোধন কৰি ভিনেশে এইদৰে কয়।
আনহাতে টকিঅ’ অলিম্পিকৰ ব্ৰঞ্জৰ পদক বিজয়ী বজৰং পুনিয়াই কয় যে ফেডাৰেচন স্বেচ্ছাচাৰীভাৱে পৰিচালনা কৰা হৈছে আৰু ডব্লিউ এফ আইৰ সভাপতিক অপসাৰণ নকৰালৈকে মল্লযুঁজাৰুসকলে কোনো আন্তঃৰাষ্ট্ৰীয় প্ৰতিযোগিতাত অংশগ্ৰহণ নকৰে। “আমাৰ যুঁজ চৰকাৰ বা ভাৰতীয় ক্ৰীড়া কৰ্তৃপক্ষৰ বিৰুদ্ধে নহয়। এয়া ডব্লিউ এফ আইৰ বিৰুদ্ধে। ডব্লিউ এফ আইৰ সভাপতি অপসাৰণ নোহোৱালৈকে আমি এই প্ৰতিবাদ অব্যাহত ৰাখিম।”— এইদৰে কয় বজৰং পুনিয়াই।
ইফালে খেলুৱৈসকলৰ এই অভিযোগৰ পিছতে প্ৰতিক্ৰিয়া প্ৰকাশ কৰিছে ডব্লিউ এফ আইৰ সভাপতি বৃজভূষণ শৰণ সিঙে। এই গুৰুতৰ অভিযোগ অস্বীকাৰ কৰি সিঙে ফেডাৰেচনে নিৰ্যাতন চলোৱা বুলি ক’ব পৰা কোনো খেলুৱৈৰ নাম ৰেকৰ্ডত আছে নেকি বুলি উলোটাই প্ৰশ্ন উত্থাপন কৰিছে। “যদি ফেডাৰেচনৰ সৈতে আপোনালোকৰ এনে সমস্যা আছিল, তেন্তে ১০ বছৰ ধৰি কোনেও সেয়া কিয় উত্থাপন কৰা নাছিল?” বুলি মন্তব্য কৰিছে সিঙে।
