বৰপেটাৰ মহীৰূহ গোকুল পাঠকৰ স্মৃতিত পুথিভঁড়াল আৰু সংগ্ৰহালয় নিৰ্মাণৰ শুভাৰম্ভ; সাংসদে পাহৰিলে প্ৰতিশ্ৰুতি

কলাগুৰু বিষ্ণুৰাভা, সৈনিক শিল্পী ব্ৰজনাথ শৰ্মাৰ সংগী বিশিষ্ট শিল্পী, সাহিত্যিক, সাংবাদিক প্ৰয়াত গোকুল পাঠকৰ স্মৃতিৰাজি সংৰক্ষণৰ বাবে আজি গোকুল পাঠক পুথিভঁড়াল আৰু সংগ্ৰহালয় নিৰ্মাণৰ শুভাৰম্ভ কৰা হয় ৷

প্ৰয়াত গোকুল পাঠকৰ জেইল ৰোডস্থিত বাসভৱনত পুথিভঁড়াল আৰু সংগ্ৰহালয় নিৰ্মাণৰ শুভাৰম্ভ কৰে বিশিষ্ট সাহিত্যিক অক্ষয় কুমাৰ মিশ্ৰই ৷

বৰপেটাৰ বিধায়ক গুণীন্দ্ৰ নাথ দাসৰ বিধায়ক পুজিৰ ৬ লাখ টকা ব্যয় সাপেক্ষে এই পুথিভঁড়াল আৰু সংগ্ৰহালয় নিৰ্মাণৰ শুভাৰম্ভ কৰা হয় ৷

আজিৰ শুভাৰম্ভ অনুষ্ঠানত ৱাৰ্ড মেম্বাৰ নয়ণমণি ওজা, গোকুল পাঠকৰ পুত্ৰ দীপক কুমাৰ পাঠক, জোৱাই অবনী কুমাৰ দাস উপস্থিত থাকে ৷

গোকুল পাঠকৰ নাতি নাৰয়ণ পাঠকে আঁত ধৰা অনুষ্ঠানত স্থানীয় একাংশ ৰাইজ উপস্থিত থাকে ৷

উল্লেখ্য যে, বৰপেটাৰ মহীৰূহ গোকুল পাঠক শয্যাগত অৱস্থাত থাকোতে গোকুল পাঠকৰ স্মৃতিৰাজি সংৰক্ষণৰ বাবে এটা সংগ্ৰহালয় নিৰ্মাণ কৰিব বুলি বৰপেটাৰ সাংসদ আব্দুল খালেকে প্ৰতিশ্ৰুতি দিছিল ৷

যোৱা ১০ মেত গোকুল পাঠকৰ মৃত্যু হয় যদিও বৰপেটাৰ সাংসদ গৰাকীয়ে নিজৰ প্ৰতিশ্ৰুতি ৰক্ষা কৰা দূৰৰ কথা গোকুল পাঠকৰ মৃত্যুৰ ছয় মাহ উকলি যোৱাৰ পিছতো পৰিয়ালৰ খা-খবৰ নল’লে৷

গোকুল পাঠকৰ সমাধিক্ষেত্ৰ সংৰক্ষণ কৰাৰ বাবে সাংসদ গৰাকীয়ে ব্যৱস্থা লব বুলি আশা প্ৰকাশ কৰিছে গোকুল পাঠকৰ পৰিয়ালবৰ্গই ৷