নঙলামুখত অসমীয়াৰ হেঁপাহৰ ৰঙালী বিহু। ৰাজ্যৰ চাৰিওফালে এতিয়া অসমীয়াৰ বাপতিসাহোন বিহুটিক আদৰিবলৈ পাৰভঙা উচাহ-উদ্দীপনা। তাৰ সমান্তৰালভাৱে অনুষ্ঠিত হৈছে ৰাজ্যৰ প্ৰান্তে প্ৰান্তে বিহু কৰ্মশালা৷
বিভিন্ন জাতি-জনগোষ্ঠীৰ মিলনভূমি মাৰ্ঘেৰিটাতো চলিছে বিহুক আদৰাৰ ব্যাপক প্ৰস্তুতি। বিহু সংস্কৃতি ৰক্ষা আৰু নতুন প্ৰজন্মক বিহু-নৃত্য, গীত-বাদ্যৰে সু-প্ৰশিক্ষিত কৰি তোলাৰ বাবে সদৌ অসম ছাত্ৰ সন্থাৰ মাৰ্ঘেৰিটা আঞ্চলিকে ৪ এপ্ৰিলৰ পৰা আয়োজন কৰা বিহু কৰ্মশালাৰ শুকুৰবাৰে সামৰণি পৰে৷
জয়ানগৰস্থিত সুৰভি মহিলা সমিতিৰ কাৰ্য্যালয় খেলপথাৰত অনুষ্ঠিত কৰ্মশালাখনত বিহু সম্ৰাজ্ঞী তথা বিহু ৰাণী বন্তি হাজৰিকা বৰুৱাৰ লগতে তেওঁৰ সংগী প্ৰশিক্ষক ক্ৰমে দেৱেন গগৈ (ঢোল বাদন), ৰূপম সন্দিকৈয়ে দিয়া কৰ্মশালাটোত প্ৰায় দুশৰো অধিক শিশুৱে অংশগ্ৰহণ কৰে৷
মাৰ্ঘেৰিটা আঞ্চলিক ছাত্ৰ সন্থাৰ সভাপতি চিন্তু গগৈ আৰু সম্পাদক প্ৰশান্ত গগৈয়ে আঁত ধৰা বিহু কৰ্মশালাখনৰ জৰিয়তে কণ কণ ছাত্ৰ-ছাত্ৰীসকলক ৰঙালী বিহু সংস্কৃতি, জাতীয় পৰম্পৰাৰ প্ৰতি সচেতন কৰা প্ৰচেষ্টাক সকলোৱে প্ৰশংসা কৰিছে৷
সামৰণি কাৰ্য্যসূচীৰ আৰম্ভণিতে তিনিচুকীয়া জিলা সাংবাদিক সন্থাৰ সম্পাদক ৰাণাজ্যোতি নেওগৰ লগতে সাংবাদিক মানস প্ৰতিম গগৈ, তপন দে, প্ৰশান্ত চেতিয়া আৰু শ্যামল নেওগক একোখনকৈ ফুলাম গামোচাৰে মাৰ্ঘেৰিটা আঞ্চলিক ছাত্ৰ সন্থাৰ তৰফৰ পৰা সম্বৰ্ধনা জ্ঞাপন কৰে।
সন্ধিয়ালৈ মাৰ্ঘেৰিটা ৰাজহুৱা ৰঙ্গমঞ্চত বিহু কৰ্মশালাত প্ৰশিক্ষণ লাভ কৰা শিশুশিল্পীসকলে বিহু নাচ, ঢোল বাদন প্ৰদৰ্শন কৰাৰ লগতে আমন্ত্ৰিত শিল্পী নিলাক্ষী নেওগ, নিতুল দাধৰা আৰু সদা মাৰ্ঘেৰিটাৰ গীতৰ শৰাইৰ লগতে সাংস্কৃতিক অনুষ্ঠান অনুষ্ঠিত হ’ব৷
