পক্ষীবিদ চেলিম আলীয়ে প্ৰতিষ্ঠা কৰা বোম্বাই নেশ্যনেল হিষ্ট্ৰি চ’চাইটিৰ উদ্যোগত কাজিৰঙা ৰাষ্ট্ৰীয় উদ্যান কৰ্তৃপক্ষ আৰু বাৰ্ড লাইফ ইন্টাৰনেশ্যনেলৰ সহযোগত আজি দিনজোৰা কাৰ্যসূচীৰে কাজিৰঙাত ‘ব্ৰহ্মপুত্ৰৰ প্লাৱন ভূমিত বিপন্নপ্ৰায় পক্ষীৰ সংৰক্ষণ’ শীৰ্ষক এক গুৰুত্বপূৰ্ণ কৰ্মশালা অনুষ্ঠিত হয় ৷
কহঁৰাত থকা বন বিভাগৰ শতবৰ্ষ সমাৰোহ প্ৰেক্ষাগৃহত আয়োজিত এই কৰ্মশালাত ৰাজ্যৰ বিভিন্ন প্ৰান্তৰৰ পৰা অহা ছাত্ৰ-ছাত্ৰীৰ উপৰি বিভিন্ন বন সংমণ্ডলৰ পৰা অহা বন কৰ্মীয়ে অংশগ্ৰহণ কৰে ৷ বি এন এইচ এছৰ গৱেষক অক্ষয়া মানেই আঁত ধৰা কৰ্মশালাৰ উদ্বোধনী অনুষ্ঠানত কাজিৰঙাৰ সঞ্চালক পেৰিয়াৰস্বামী শিৱ কুমাৰ, পুৱ অসম বন্য প্ৰাণী সংমণ্ডলৰ ডি এফ অ’ ৰোহিনী বল্লভ শইকীয়া, কাজিৰঙাৰ গৱেষণা বিষয়া ৰবীন্দ্ৰ শৰ্মা আৰু গোলাঘাট জিলাৰ অনাৰেৰী ৱাইল্ড লাইফ ৱাৰ্ডেন উত্তম শইকীয়া উপস্থিত থাকে।
উদ্বোধনী অনুষ্ঠানত কাজিৰঙাৰ সঞ্চালক গৰাকীয়ে বি এন এইচ এছৰ দ্বাৰা প্ৰকাশিত ৰজত ভাৰ্গৱৰ এখন গ্ৰন্থ উন্মোচন কৰাৰ লগতে কাজিৰঙাত ঘাঁহনি পৰিচালনাৰ জটিলতাৰ লগতে পক্ষী নিৰীক্ষনৰ পৰ্যটনৰ ওপৰত আলোকপাত কৰে ৷
কৰ্মশালাত বি এন এইচ এছৰ বিজ্ঞানী গিৰিশ জাথাৰ, ৰজত ভাৰ্গৱ আৰু বিশ্বজিত চকদাৰে বিপন্নপ্ৰায় পক্ষীৰ স্থিতি, বাসস্থান, সমস্যা আৰু গৱেষণাৰ ওপৰত সচিত্ৰ উপস্থাপনেৰে আলোচনা আগবঢ়ায়। কৰ্মশালাৰ শেষত অংশগ্ৰহণকাৰী সকলক একোখনকৈ মানপত্ৰ প্ৰদান কৰা হয় ৷