৫ অক্টোবৰত আহমেদাবাদত বাজিব ৰণদুন্দুভি। বিশ্বকাপ দখলৰ লক্ষ্যৰে ১০ দেশৰ বেট-বলৰ যুঁজ। আগন্তুক এই এদিনীয়া বিশ্বকাপৰ বাবে শীঘ্ৰেই টিকট বিক্ৰী আৰম্ভ কৰা হ’ব বুলি ঘোষণা কৰিছে আন্ত:ৰাষ্ট্ৰীয় ক্ৰিকেট কাউন্সিল, চমুকৈ আই চি চিয়ে।
অৱশ্যে সকলো মেচৰ টিকট অনুৰাগীৰ বাবে একেলগে উপলব্ধ নহ’ব। আই চি চিয়ে পৰ্যায়ক্ৰমে বিশ্বকাপ মেচৰ টিকটসমূহ বিক্ৰী কৰিব। ইতিমধ্যে টিকটৰ বাবে পঞ্জীয়ন আৰম্ভ হৈছে যদিও অহা ২৫ আগষ্টৰ পূৰ্বে টিকট উপলব্ধ নহ’ব।
ইফালে ২৫ আগষ্টত ভাৰতীয় দলে অংশগ্ৰহণ নকৰা ৱাৰ্ম আপ মেচ আৰু মূল বিশ্বকাপৰ মেচৰ টিকটহে উপলব্ধ হ’ব। ৩০ আগষ্টৰ পৰা গুৱাহাটী আৰু তিৰুৱনন্তপুৰমত অনুষ্ঠিত ভাৰতীয় মেচৰ টিকট উপলব্ধ হ’ব।
আনহাতে চেন্নাই, দিল্লী আৰু পুনেত অনুষ্ঠিত হ’বলগীয়া ভাৰতীয় মেচৰ বাবে ৩১ আগষ্টৰ পৰা আৰু ১ ছেপ্টেম্বৰৰ পৰা ধৰ্মশালা, লক্ষ্ণৌ আৰু মুম্বাইত ভাৰতৰ খেলৰ টিকট বিক্ৰী আৰম্ভ হ’ব।
সেইদৰে বেংগালুৰু আৰু কলকাতাত অনুষ্ঠিত হ’বলগীয়া ভাৰতৰ মেচৰ বাবে ২ ছেপ্টেম্বৰৰ পৰা টিকট উপলব্ধ হ’ব। আনহাতে ৩ ছেপ্টেম্বৰত ভাৰতৰ আহমেদাবাদ মেচৰ বাবে আৰু ১৫ ছেপ্টেম্বৰত ছেমিফাইনেল/ফাইনেলৰ টিকট উপলব্ধ হ’ব।
উল্লেখ্য যে, বিশ্বকাপৰ আটাইতকৈ চৰ্চিতভাৰত-পাকিস্তানৰ মেচ ১৪ অক্টোবৰত আহমেদাবাদত অনুষ্ঠিত হ’ব। আই চি চিৰ টিকট বিক্ৰীৰ ঘোষিত সূচী অনুসৰি ৩ ছেপ্টেম্বৰত ক্ৰিকেটপ্ৰেমীসকলে এই মেচৰ টিকট লাভ কৰিব।
আই চি চিয়ে উল্লেখ কৰা মতে, টিকট বিক্ৰীৰ পূৰ্বে ১৫ আগষ্টৰ পৰা অনুৰাগীসকলে https://www.cricketworldcup.com/register ৰ জৰিয়তে পঞ্জীয়ন কৰাৰ সুযোগ পাব। ইয়াৰ দ্বাৰা তেওঁলোকে প্ৰথমে টিকটৰ খবৰ লাভ কৰিব।
