আজি বিশ্ব চাইকেল দিৱস। সমগ্ৰ বিশ্বৰ লগতে শিৱসাগৰতো বিশেষ কাৰ্যসূচীৰে বিশ্ব চাইকেল দিৱস পালন কৰা হয়। এই উপলক্ষে শিৱসাগৰ চাইক্লিং কমিউনিটিৰ উদ্যোগত আৰু শিৱসাগৰ জিলা প্ৰশাসনৰ সহযোগত পুৱা ৫.৩০ বজাত বৰ্ডিং খেলপথাৰৰ পৰা প্ৰায় ২৫ কিলোমিটাৰ দৈৰ্ঘ্যৰ এক চাইক্লিং ৰেলী উলিওৱা হয়।
উক্ত ৰেলীত শিৱসাগৰ, ডিব্ৰুগড় আৰু অৰুণাচলৰ প্ৰায় ১৫০ গৰাকী চাইক্লিষ্টে অংশগ্ৰহণ কৰে। শিৱসাগৰ চৰকাৰী উচ্চতৰ মাধ্যমিক বহুমূখী বিদ্যালয়ৰ অধ্যক্ষ ৰমন শৰ্মাই ফ্লেগ অফ কৰা এই ৰেলীত জিলা আৰক্ষী অধীক্ষক অমিতাভ সিনহা, জ্যেষ্ঠ সাংবাদিক সুমেশ ডেকাকে ধৰি কেইবাগৰাকী ব্যক্তি উপস্থিত থাকে।
বৰ্ডিং খেলপথাৰৰ পৰা জয়সাগৰ, ভটিয়াপাৰ, প্ৰগতি হস্পিতাল হৈ পুনৰ বৰ্ডিং খেলপথাৰত আহি সামৰণি পৰা চাইকেল ৰেলীত চাইক্লিষ্ট সকলক উৎসাহ যোগোৱাৰ উদ্দেশ্যে জিলা আৰক্ষী অধীক্ষক গৰাকীয়ে সম্পূৰ্ণ ২৫ কিলোমিটাৰ পথ চাইকেল চলায়।
তেওঁ ৰাইজক চাইকেল চলাবলৈ আহ্বান জনোৱাৰ লগতে চাইকেল চলালে নিজকে সু স্বাস্থ্যৰ অধিকাৰী কৰি ৰখাৰ লগতে পৰিৱেশ প্ৰদূষণমুক্ত কৰি ৰাখিব পাৰি বুলি কয়।
চাইকেল দিৱসৰ সৈতে সংগতি ৰাখি শিৱসাগৰ চাইক্লিং কমিউনিটিয়ে লোৱা এই উদ্যোগক শিৱসাগৰবাসীয়ে যথেষ্ট প্ৰশংসা কৰে।