বিনামূলীয়াকৈ খাদ্য বিতৰণ বা লঙ্গৰ পতাৰ কথাটো আমাৰ বাবে নতুন নহয়। কিন্তু এইবাৰ এক একেবাৰেই ব্যতিক্ৰমী লঙ্গৰৰ খবৰে সকলোৰে দৃষ্টি আকৰ্ষণ কৰিছে। বজাৰলৈ আইফোন ১৮ অহাৰ লগে লগেই বিনামূলীয়াকৈ আইফোন বিতৰণৰ কথা ঘোষণা কৰা হৈছে, যিয়ে সমগ্ৰ দেশবাসীক আচৰিত কৰি তুলিছে।
সৰ্বভাৰতীয় সংবাদ মাধ্যমৰ পৰা জানিব পৰা মতে, অহা ২২ ছেপ্টেম্বৰত চণ্ডীগড় আৰু মোহালিত এক আইফোন লঙ্গৰ অনুষ্ঠিত হ’ব। এই লঙ্গৰৰ আয়োজক হৈছে অমৃতসৰৰ বিশিষ্ট ব্যৱসায়ী তথা ছচিয়েল মিডিয়া ইনফ্লুয়েন্সাৰ ৰাকেশ ত্ৰেহান। ছচিয়েল মিডিয়াত তেওঁ ৰাজা ডি কিং নামেৰেও পৰিচিত।
যোৱা শুকুৰবাৰে ভাৰতৰ বজাৰত মুকলি হৈছে আইফোন ১৮ ছিৰিজ। বজাৰলৈ অহাৰ লগে লগেই গ্ৰাহকসকলৰ মাজত এক ব্যাপক উন্মাদনা দেখিবলৈ পোৱা গৈছে। বিক্ৰী আৰম্ভ হোৱাৰ পাছতেই এক ভিডিঅ’ বাৰ্তাৰ জৰিয়তে এই বিশেষ লঙ্গৰৰ দিন ঘোষণা কৰে ত্ৰেহানে। তেওঁ জনায় যে সংবাদ মাধ্যম আৰু সাধাৰণ ৰাইজৰ উপস্থিতিতেই এই স্মাৰ্টফোনসমূহ বিতৰণ কৰা হ’ব। প্ৰথমতে আইফোন ১৬ দিয়াৰ কথা আছিল যদিও সেই পৰিকল্পনা বাতিল কৰা হয়। এই লঙ্গৰত কেৱল আইফোন ১৭ আৰু ১৮ হে বিতৰণ কৰা হ’ব বুলি তেওঁ স্পষ্ট কৰি দিয়ে।
এই লঙ্গৰৰ জৰিয়তে আইফোন লাভ কৰাৰ প্ৰক্ৰিয়াটো অতি সহজ। অৱশ্যে ইয়াৰ বাবে এটা বিশেষ চৰ্ত আছে। ত্ৰেহানে জনোৱা মতে, এই প্ৰক্ৰিয়াটোৰ বাবে এটা বিশেষ হোৱাটছএপ গ্ৰুপ খোলা হৈছে আৰু সেই গ্ৰুপটোত মাত্ৰ জয় মাতা দি বুলি লিখিব লাগিব। যিসকলে এই তিনিটা শব্দ লিখি পঠিয়াব, তেওঁলোকৰ মাজৰ পৰা লটাৰী বা এক বিশেষ প্ৰক্ৰিয়াৰ জৰিয়তে বিজয়ীসকলক নিৰ্বাচন কৰা হ’ব। কোনে কোনে ফোন পাব, সেই কথাও সময়মতে জনাই দিয়া হ’ব। আৰম্ভণিতে কেৱল চণ্ডীগড় আৰু মোহালীৰ বাসিন্দাসকলৰ বাবে এই লঙ্গৰৰ আয়োজন কৰা হৈছে যদিও ২২ ছেপ্টেম্বৰত আৰু দহখন চহৰৰ নাম ঘোষণা কৰা হ’ব বুলি জানিব পৰা গৈছে।
ইতিমধ্যে এই বিশেষ পদক্ষেপৰ বাবে এশটা আইফোন ১৭ৰ অৰ্ডাৰ দিয়া হৈছে। প্ৰায় এহেজাৰৰো অধিক ফোন বিতৰণ কৰাৰ পৰিকল্পনা আছে বুলি সূত্ৰৰ পৰা জানিবলৈ পোৱা গৈছে। তেওঁৰ দাবী অনুসৰি, কোনো লোকে যাতে এই সুযোগৰ অপব্যৱহাৰ কৰিব নোৱাৰে আৰু সমগ্ৰ প্ৰক্ৰিয়াটোত যাতে স্বচ্ছতা বৰ্তাই ৰাখিব পৰা যায়, তাৰ বাবে পৰ্যায়ক্ৰমে নিৰ্বাচিত লোকসকলৰ হাতত এই ফোনসমূহ তুলি দিয়া হ’ব।
উল্লেখযোগ্য যে, ইয়াৰ পূৰ্বেও এনে ধৰণৰ অভিনৱ লঙ্গৰ পাতি বাতৰিৰ শিৰোনাম দখল কৰিছিল ৰাজা ডি কিঙে। কিছুদিন পূৰ্বে তেওঁ পেট্ৰল লঙ্গৰৰো আয়োজন কৰিছিল। তাৰ আগতে চণ্ডীগড়ৰ এটা মন্দিৰৰ বাহিৰত পাঁচশ টকীয়া নোট বিলাই সকলোকে আচৰিত কৰি তুলিছিল এইগৰাকী চৰ্চিত ব্যৱসায়ীয়ে।
