আমেৰিকাৰ ৰাষ্ট্ৰপতি ডনাল্ড ট্ৰাম্পৰ আমন্ত্ৰণমৰ্মে চীনৰ ৰাষ্ট্ৰপতি জি জিনপিঙে অহা ২৩ৰ পৰা ২৫ ছেপ্টেম্বৰলৈ ৱাশ্বিংটন ভ্ৰমণ কৰিব। চীন চৰকাৰে আনুষ্ঠানিকভাৱে নিশ্চিত কৰা অনুসৰি, প্ৰায় তিনি বছৰৰ পাছত চীনৰ ৰাষ্ট্ৰপতিগৰাকীয়ে প্ৰথমবাৰৰ বাবে আমেৰিকা যুক্তৰাষ্ট্ৰ ভ্ৰমণলৈ ওলাইছে। অহা ২৩ ছেপ্টেম্বৰত দুয়োগৰাকী নেতাই পোনপটীয়া বৈঠকত মিলিত হোৱাৰ কথা আছে। বিশ্বৰ সৰ্ববৃহৎ অৰ্থনীতিৰ দুয়োখন দেশৰ মাজত অনুষ্ঠিত হ’বলগীয়া এই আলোচনাত ব্যৱসায়-বাণিজ্য, অৰ্থনৈতিক সম্পৰ্ক আৰু কৃত্ৰিম বুদ্ধিমত্তাৰ দৰে বিষয়সমূহে বিশেষ গুৰুত্ব লাভ কৰিব বুলি আশা কৰা হৈছে।
ৰাষ্ট্ৰপতি জিনপিঙৰ এই ভ্ৰমণৰ পূৰ্বে দেওবাৰে নিউয়ৰ্কত দুয়োখন দেশৰ শীৰ্ষ বিষয়াসকলৰ মাজত এখন গুৰুত্বপূৰ্ণ বৈঠক অনুষ্ঠিত হৈ যায়। বেইজিঙে এই বৈঠকক ‘অকপট, গভীৰ আৰু গঠনমূলক’ বুলি অভিহিত কৰিছে। চীনৰ উপ-প্ৰধানমন্ত্ৰী হে লাইফেং, আমেৰিকাৰ ট্ৰেজাৰী চেক্ৰেটেৰী স্কট বেচেণ্ট আৰু আমেৰিকাৰ বাণিজ্য প্ৰতিনিধি জেমিছন গ্ৰীৰে এই অৰ্থনৈতিক আৰু বাণিজ্যিক আলোচনাত অংশগ্ৰহণ কৰিছিল। জিনহুৱা সংবাদ সংস্থাই প্ৰকাশ কৰা মতে, দুয়োখন দেশৰ ৰাষ্ট্ৰপ্ৰধানৰ ঐকমত্যৰ ভিত্তিত পাৰস্পৰিক শ্ৰদ্ধা, শান্তিপূৰ্ণ সহাৱস্থান আৰু লাভজনক সহযোগিতাৰ নীতিৰে বিষয়াসকলে অৰ্থনৈতিক, বাণিজ্যিক আৰু কৃত্ৰিম বুদ্ধিমত্তা সম্পৰ্কীয় বিষয়সমূহৰ ওপৰত বিস্তৃত আলোচনা কৰে।
হংকংস্থিত ‘চাউথ চাইনা মৰ্ণিং পষ্ট’ কাকতৰ প্ৰতিবেদন অনুসৰি, ৰাষ্ট্ৰপতি ডনাল্ড ট্ৰাম্পে জইণ্ট বেছ এণ্ড্ৰুজত ব্যক্তিগতভাৱে উপস্থিত থাকি জি জিনপিংক আদৰণি জনোৱাৰ পৰিকল্পনা কৰিছে, যিটো আমেৰিকাৰ কূটনীতিৰ ক্ষেত্ৰত এক বিৰল আদৰণি হিচাপে বিবেচিত হৈছে। ইয়াৰ পূৰ্বে যোৱা মে’ মাহত ট্ৰাম্পৰ চীন ভ্ৰমণৰ সময়ত বেইজিঙত দুয়োগৰাকী নেতাৰ মাজত অন্তিমখন বৈঠক অনুষ্ঠিত হৈছিল, য’ত দুয়োখন দেশৰ মাজৰ সম্পৰ্ক উন্নত কৰাৰ ওপৰত গুৰুত্ব আৰোপ কৰা হৈছিল।
ৰাছিয়াৰ তেল আৰু গেছ ক্ৰয় কৰা চীন আৰু ভাৰতকে ধৰি অন্যান্য দেশৰ ওপৰত ১০০ শতাংশলৈকে শুল্ক আৰোপ কৰাৰ কৰ্তৃত্ব প্ৰদান কৰা এখন নতুন নিষেধাজ্ঞা আইনত ট্ৰাম্পে শেহতীয়াকৈ স্বাক্ষৰ কৰিছে। ইয়াৰ উপৰি দুয়োখন দেশৰ মাজত প্ৰযুক্তিগত প্ৰতিযোগিতা তীব্ৰতৰ কৰি ট্ৰাম্পে শেহতীয়াকৈ এক নতুন ‘এআই ফ’ৰ্চ’ গঠনৰো কথা ঘোষণা কৰিছে। এই সকলোবোৰ কাৰকৰ বাবে জিনপিঙৰ এই আগন্তুক ভ্ৰমণ যথেষ্ট তাৎপৰ্যপূৰ্ণ হৈ পৰিছে। অৱশ্যে, চীনৰ বাণিজ্য মন্ত্ৰালয়ে জনোৱা মতে, শুল্ক বৃদ্ধিৰ এই ভাবুকিৰ মাজতো ৱাশ্বিংটন আৰু বেইজিঙে দুয়োপক্ষৰ ৩০ বিলিয়ন ডলাৰ মূল্যৰ সামগ্ৰী সামৰি লোৱা এক পাৰস্পৰিক শুল্ক হ্ৰাসৰ পৰিকাঠামোৰ বিষয়েও আলোচনা অব্যাহত ৰাখিছে বুলি সদৰী কৰিছে।
