সমাধিৰ পৰা আৰ্তনাদ! মাটি খান্দি শিঁয়ৰি উঠিল গাঁওবাসী; ‘মৃতা’ৰ কাণ্ড দেখি চকু থৰ আৰক্ষীৰো
সমাধিৰ পৰা ভাহি আহিছে আৰ্তনাদ। চিঞৰ শুনি পাৰ হৈ যোৱা গাঁৱৰ মানুহবোৰ দৌৰি আহিল। মাটি খান্দিবলৈ আৰম্ভ কৰিলে। মাটি খান্দি উঠি সকলোৱে স্তম্ভিত হৈ পৰিল। সমাধিত জীয়াই আছে যুৱতী! কবৰৰ পৰা উঠি তেওঁ পোনে পোনে থানালৈ দৌৰিল। তাৰপিছত আৰক্ষীক দিলে বিস্ফোৰক অভিযোগ।
সৰ্বভাৰতীয় সংবাদ মাধ্যমৰ সূত্ৰ অনুসৰি এই ঘটনা সংঘটিত হৈছে কৰ্ণাটকত। যুৱতীগৰাকী পেছাত এগৰাকী যোগ প্ৰশিক্ষক। ছোৱালীজনীয়ে আৰক্ষীক জনোৱা মতে, ২৩ অক্টোবৰত একাংশ লোকে তেওঁক উলংগ কৰি হত্যা কৰাৰ চেষ্টা চলাইছিল।
অভিযুক্তসকলৰ ভিতৰত বিন্দু নামৰ এগৰাকী যুৱতীও আছে। বিন্দুৱে সন্দেহ কৰে যে যোগ প্ৰশিক্ষকগৰাকীয়ে স্বামীৰ সৈতে বিবাহ বহিৰ্ভূত প্ৰেমৰ সম্পৰ্ক ৰাখিছে। সেই সন্দেহত বিন্দু আৰু তেওঁৰ বন্ধুসকলে যুৱতীগৰাকীক হত্যা কৰাৰ চেষ্টা চলাইছিল।
ছোৱালীজনীয়ে কয় যে সেইদিনা তেওঁলোকে তাইক নিৰ্জন এলেকালৈ লৈ গৈ উলংগ কৰি মাৰপিট কৰিবলৈ ধৰিলে। তাৰ পিছত ডিঙি চেপি হত্যা কৰাৰ চেষ্টা কৰা হ’ল। ইয়াৰ পিছত ছোৱালীজনীয়ে অচেতন হোৱাৰ ভাও ধৰিলে।
অভিযুক্তই ভাবিছিল যে যুৱতীগৰাকীৰ মৃত্যু হৈছে। তাৰ পাছতে ছোৱালীজনীক এটা দুৰ্গম অঞ্চলত মাটিৰ তলত পুতি থৈ সকলোৱে পলাই গ’ল। কিন্তু তেওঁ মাটিৰ তলত উশাহ লৈ জীয়াই আছিল। কবৰৰ পৰা তেওঁৰ চিঞৰ শুনি গাঁৱৰ ৰাইজে তেওঁক উদ্ধাৰ কৰিবলৈ ততাতৈয়াকৈ দৌৰি আহে।
কবৰৰ পৰা উঠি যুৱতীগৰাকীয়ে কাপোৰ কানি পিন্ধি থানালৈ গৈ অভিযোগ কৰে। লগতে তেওঁ কয় যে হত্যাৰ চেষ্টাৰ পিছত অভিযুক্তই সকলো গহনা আৰু ধন লৈ পলাই যায়। এই ঘটনাত বিন্দু নামৰ এগৰাকী যুৱতীসহ পাঁচজনক গ্ৰেপ্তাৰ কৰিছে আৰক্ষীয়ে। চিচিটিভিৰ ফুটেজ চাই আৰক্ষীয়ে তদন্ত অব্যাহত ৰাখিছে।