মহানগৰীত এক চাঞ্চল্যক ঘটনা সংঘটিত হৈছে। বিয়ালৈ মাজত মাত্ৰ ১১দিন বাকী থকা সময়তে আত্মহত্যা কৰিলে এগৰাকী যুৱতী সাংবাদিকে। গুৱাহাটীৰ এটা সংবাদমাধ্যমৰ বাতৰি পৰিৱেশক হিচাপে কাম কৰা ৰিতুমনি ৰয় নামৰ যুৱতীগৰাকীয়ে সকলোকে আচৰিত কৰি চৰম সিদ্ধান্ত গ্ৰহণ কৰে।
সংবাদ প্ৰতিষ্ঠানটোৰ কাৰ্যালয়ৰ ভিতৰতে উদ্ধাৰ হৈছে যুৱতীগৰাকীৰ মৃতদেহ। মহানগৰীৰ খ্ৰীষ্টানবস্তিৰ পূৰ্বোদয় ভৱনৰ তৃতীয় মহলাত উদ্ধাৰ হয় যুৱতীগৰাকীৰ মৃতদেহ। কাৰ্যালয়ৰ কৰ্মচাৰীসকলে সদৰি কৰা তথ্য অনুসৰি, দেওবাৰে (২৩নৱেম্বৰ)পুৱাই কামলৈ আহিছিল যুৱতীগৰাকী। কিন্তু নিশালৈকে তেওঁ ঘৰলৈ যোৱা নাছিল।
অৱশেষত ৰাতিপুৱা তেওঁৰ নিথৰ দেহ কাৰ্যালয়ৰ এটা কোঠাত উদ্ধাৰ হয়। যুৱতীগৰাকীয়ে এখন চিঠিও লিখি থৈ গৈছে। চিঠিখনত লিখিছে- সকলোৰে ভালৰ বাবেই এই সিদ্ধান্ত। সকলো ভালে থাকিব।
নিজে লিখা চুইচাইড নোটত ৰিতুমনিয়ে পিতৃৰ ফোন নম্বৰটোও লিখি থৈ গৈছে। খবৰ লাভ কৰাৰ পিছতে ঘটনাস্থলীত আৰক্ষী উপস্থিত হৈ তদন্ত আৰম্ভ কৰে।
ইপিনে, যুৱতী সাংবাদিক ৰিতুমণি ৰয়ক কেন্দ্ৰ কৰি বহু তথ্য পোহৰলৈ আহিছে। পৰিয়াল তথা পিতৃয়ে সংবাদিকৰ আগত ৰিতুয়ে বিয়াৰ বাবে নিজেই দৰা পছন্দ কৰা বুলি দাবী কৰাৰ বিপৰীতে সহকৰ্মীসকলক তেওঁ অন্য কথাহে কৈছিল বুলি জানিব পৰা গৈছে।
সংবাদ প্ৰতিষ্ঠানটোৰ স্বত্বাধিকাৰীয়ে সংবাদমাধ্যমক সদৰি কৰা মতে কাৰ্যালয়ৰ সহকৰ্মীৰ আগত ৰিতুয়ে বহু দিনৰ আগতেই তেওঁৰ বাবে ঘৰৰ পৰা ল’ৰা ঠিক কৰি থোৱাৰ কথাহৈ কৈছিল।
ৰিতুৰ পিতৃয়ে সাংবাদিককৰ আগত ৰিতুৱে বিয়াৰ বাবে নিজেই দৰা পছন্দ কৰাৰ কথা সদৰি কৰিছে। পিতৃয়ে জনায় যে, এই বিয়াত তেওঁৰ সন্মতি দিছিল আৰু বিয়াৰ বাবে ঘৰৰ পৰা কোনো হেঁচা নাছিল।
আনহাতে ৰিতুৰ জ্যেষ্ঠ ভগ্নীয়েও পিতৃকে দোষাৰোপ কৰিছে। তেওঁ পিতৃক ‘কেৱল টকা লাগে’ বুলি অভিযোগ কৰাও দেখা গৈছে। এনেবোৰ বিপৰীত ভাষ্যই ঘটনাটোক অধিক ৰহস্যৰ মাজলৈ ঠেলি দিছে।
পিতৃয়ে লগতে জনায় যে, ৰিতুৱে বিগত প্ৰায় ডেৰ বছৰৰ পৰা তেওঁলোকৰ পৰা আঁতৰি থাকিবলৈ লৈছিল। এগৰাকী বান্ধৱীৰ সৈতে ভাড়াঘৰত থাকিবলৈ লৈছিল ৰিতু। কাহিলীপাৰাৰ থকা পিতৃয়ে চাকৰি সূত্ৰে থকা কোৱাৰ্টাৰত ঠাইৰ অভাৱৰ বাবে ৰিতুৱে ভাড়াঘৰত থাকিবলৈ লৈছিল বুলি সদৰি কৰিছে।
ৰিতুৰ পিতৃয়ে লগতে জনায় যে, যোৱা ২২নৱেম্বৰত ফোন কৰোতে তেওঁক ফাঁচী বজাৰত বিয়াৰ বজাৰ কৰিবলৈ যোৱা বুলি জনাইছিল। ৰাতি কথা পতাৰ কথা আছিল যদিও দেৰি হোৱাৰ বাবে তেওঁ ফোন কৰা নাছিল। অহা ৫ডিচেম্বৰত বিয়াৰ দিন আছিল ৰিতুৰ।
