মন্ত্ৰী পিযুষ হাজৰিকাক তাচ্ছিল্য কৰিবলৈ গৈ কৈৱৰ্ত সমাজৰ ৰোষত পৰিল গোলাঘাটৰ এজন যুৱক।
অভিযোগ অনুসৰি ছ’চিয়েল মিডিয়াত অসাংবিধানিক শব্দ প্ৰয়োগেৰে অপমান কৰা হৈছে কৈৱৰ্ত সমাজক। ইয়াৰ পিছতেই সদৌ অসমীয়া কৈৱৰ্ত সন্মিলনৰ গোচৰৰ ভিত্তিত আটক কৰা হ’য় যুৱক জনক।
সদৌ অসমীয়া কৈৱৰ্ত সন্মিলনৰ মতে বিভিন্ন সময়ত অসমত বসবাস কৰা কৈৱৰ্ত সকলক যোৱা সময়খিনিত যিধৰণে তাচ্ছিল্য কৰা হ’য় বা বিভিন্ন সময়ত যিধৰণে অপমান কৰা হ’য়, সেইয়া অসমৰ কৈৱৰ্ত সমাজে কোনো কাৰণতে সহজভাৱে ল’ব নোৱাৰে।
শেহতীয়াকৈ কৈৱৰ্ত কুলৰ সন্তান কেবিনেট পৰ্যায়ৰ মন্ত্ৰী পিয়ুষ হাজৰিকাৰ ওপৰত সামাজিক মাধ্যম ফেইচবুকত যি গালি-গালাজ তথা কটু মন্তব্য কৰা হ’ল, সেইয়া কোনো কাৰণতে সহ্য কৰা নহ’ব।
উক্ত ঘটনাক সদৌ অসমীয়া কৈৱৰ্ত সন্মিলনে তীব্র ভাষাৰে গৰিহণা দিয়ে।
সামাজিক মাধ্যমৰ যোগেদি মন্ত্ৰী পিয়ুষ হাজৰিকাক সমালোচনা আৰু কটুক্তি কৰা তথা কৈৱৰ্ত সমাজক লৈ অ-সাংবিধানিক মন্তব্য কৰা গোলাঘাট ঢেকিয়াল বেতিয়নী গাঁৱৰ ৰিদিপ শইকীয়াৰ বিৰুদ্ধে সদৌ অসম কৈৱৰ্ত সন্মিলনৰ মুখ্য সাংগঠনিক সম্পাদক ধ্ৰুৱজ্যোতি ভঁৰালীয়ে গোলাঘাট সদৰ আৰক্ষী থানাত এজাহাৰ দাখিল কৰিছিল।
সেই গোচৰৰ ভিত্তিতে শনিবাৰে অভিযুক্ত ৰিদিপ শইকীয়াক গোলাঘাট আৰক্ষীয়ে গ্ৰেপ্তাৰ কৰে।
মন্ত্ৰীৰ সমালোচনা হওঁক কিন্তু এইদৰে অ-সাংবিধানিক আৰু জাতিগত শব্দ প্ৰয়োগেৰে নহ’য়। এই মন্তব্য সদৌ অসমীয়া কৈৱৰ্ত সমাজৰ।