তিনিচুকীয়া জিলাৰ শদিয়াৰ বচা গাঁৱৰ পৰা শনিবাৰে জিণ্টু গগৈ নামৰ এজন যুৱক গাঁওখনৰ কাষেৰে বৈ যোৱা লুইত নদীত নিখোজ হৈ থকাৰ বাতৰি পোৱা গৈছে।
যুৱকজনৰ ককায়েকে সন্ধানহীন হোৱা সন্দৰ্ভত জনায় যে যুৱকজনক শদিয়াৰ অবৈধ খয়েৰ কাঠৰ ব্যবসায়ী ৰফিজুল আলি আৰু বিপিন গগৈৰ লগত দিনৰ ১১ বজাত লুইতৰ পাৰৰ দিশে ওলাই গৈছিল।
নিশা বন বিভাগে অবৈধ ব্যৱসায়ী কেইজনে নদীৰ পাৰত মজুত কৰি থোৱা অবৈধ খয়েৰ কাঠসমূহ জব্দ কৰিছিল আৰু লগতে কাঠসমূহ নদীত পৰি ৰৈছিল।
যুৱকজনক দিনৰ ১১ বজাত ঘৰৰ পৰা মাতি নি কাঠসমূহ পুনৰ পাৰলৈ নিবলৈ তেওঁৰ সহায় বিচাৰিছিল আৰু নদীৰ পৰা কাঠসমূহ পাৰলৈ নিবলৈ চেষ্টা কৰি থাকোঁতেই এই দুৰ্ভাগ্যজনক ঘটনাটো সংঘটিত হয়৷
সমগ্ৰ ঘটনাই অঞ্চলটোত তীব্ৰ চাঞ্চল্যৰ সৃষ্টি কৰাৰ লগতে শদিয়াৰ পৰা লুইত আৰু ব্ৰহ্মপুত্ৰ নদীৰে অবৈধ কাঠ সৰবৰাহেৰে কাঠ মাফিয়া চক্ৰই ৰমৰমীয় ব্যৱসায় যে চলাই আহিছে সেই তথ্য পোহৰলৈ আনিছে।
ইতিমধ্যে উক্ত ঘটনা সন্দৰ্ভত আৰক্ষীৰ ৰহস্যজনক স্থিতিক লৈও ৰাইজে ঘটনাস্থলীত ক্ষোভৰ বৰ্হিপ্ৰকাশ ঘটায়।
ৰাইজে সদৰী কৰে যে ঘটনাৰ কেইবাঘণ্টা উকলি যোৱাৰ পাছতো ঘটনাৰ সময়ত উপস্থিত থকা অবৈধ কাঠৰ ব্যৱসায়ী কেইজনক কৰায়ত্ত কৰিব পৰা নাই।
তেওঁলোকে মুকলিকৈ ক্ষোভ প্ৰকাশ কৰি কয় যে এনেদৰে শদিয়াৰ বুকুৰ মাজেদি দিনে নিশাই অসমৰ অন্য প্ৰান্তলৈ চোৰাং কাঠৰ সৰবৰাহ হৈ আছে যদিও প্ৰশাসনে চকু মুদা কুলিৰ ভাও ধৰা ভূমিকা এক ৰহস্যজনক বিষয়।
আনহাতে, বহু পলমকৈ ঘটনাস্থলীত উপস্থিত হোৱা আৰক্ষীৰে ক্ষুব্ধ ৰাইজৰ তৰ্ক- বিতৰ্কত লিপ্ত হোৱাৰ কথাও জানিব পৰা গৈছে।
