দৰং আৰক্ষীয়ে বিশেষ সূত্ৰৰ পম খেদি ইনজিল আলী নামৰ এজন লোকক আটক কৰাৰ লগতে লোকজনৰ পৰা এটা পিস্তল আৰু পাঁচ জাই সজীৱ গুলি উদ্ধাৰ কৰে।
আটকাধীন ২২ বছৰীয়া ইনজিল আলি মঙলদৈ আৰক্ষী থানাৰ অন্তৰ্গত বগমাৰি চৰৰ ৰিয়াজ উদ্দিনৰ পুত্ৰ।
‘‘গ্ৰেপ্তাৰ হোৱা ইনজিল আলীৰ পৰা এটা ইংলেণ্ডত নিৰ্মিত পিস্তলৰ লগতে পাঁচ জাই সজীৱ গুলি উদ্ধাৰ কৰা হয়,’’ আৰক্ষী সূত্ৰত প্ৰকাশ।
আৰক্ষীয়ে যুৱকজনৰ বিৰুদ্ধে ভাৰতীয় দণ্ডবিধি আইনৰ অধীনত ১২০(বি)/৩৮৭ ধাৰাত এটা গোচৰ ৰুজু কৰিছে বুলি জানিবলৈ দিয়ে।
শুকুৰবাৰে ধৃত ইনজিল আলীক মঙলদৈ জিলা দণ্ডাধীশৰ কোৰ্টত হাজিৰ কৰোৱা হয় আৰু কোৰ্টে যুৱকজনক ন্যায়িক জিম্মাত ৰখাৰ বাবে নিৰ্দেশ দিয়ে বুলি আৰক্ষীয়ে উল্লেখ কৰে।
আৰক্ষীয়ে সমগ্ৰ ঘটনাৰ তদন্ত অব্যাহত ৰাখিছে আৰু পৰৱৰ্তী সময়ত ধৃত যুৱকজনে কেনেকৈ পিস্তল আৰু গুলী লাভ কৰিলে সকলো পোহৰলৈ অহাৰ সম্ভাৱনা আছে।
