য়ুটিউবক মনোৰঞ্জনৰ বাবে ব্যৱহাৰ কৰা হয় যদিও বৰ্তমান অসমৰ বহুসংখ্যক নৱপ্ৰজন্মই কেৰিয়াৰ হিচাপে লৈ মাহিলি বৃহৎ পৰিমাণৰ ধন উপাৰ্জন কৰি স্বাৱলম্বী হৈছে। য়ুটিউবৰ লগত জড়িত হৈ এইদৰে অৰ্থ উপাৰ্জন কৰা অসমৰ প্ৰায় পাঁচশ যুৱক-যুৱতীয়ে দেওবাৰে শিৱসাগৰৰ পিয়লি ফুকন ষ্টেডিয়ামত আয়োজন কৰে এক সমাৰোহৰ।
তৃতীয় অসম য়ুটিউব মীট নামৰ এই সমাৰোহত অসমৰ শদিয়াৰ পৰা ধুবুৰীৰৰ প্ৰতিগৰাকী য়ুটিউব ক্ৰিয়েটৰ উপস্থিত হৈছিল। লক্ষ্য আছিল অসমত য়ুটিউবক কিদৰে এক নতুৰ কেৰিয়াৰৰ সুযোগ আৰু সম্ভৱনা হিচাপে ব্যৱহাৰ কৰাৰ বাবে নতুন প্ৰজন্মক উৎসাহিত কৰিব পাৰি।
উল্লেখযোগ্য যে, অসমৰ বহু নৱ প্ৰজন্মই য়ুটিউবৰ মাধ্যমেৰে মাহেকত ৬০ হাজাৰ টকালৈকে উপাৰ্জন কৰিবলৈ সক্ষম হৈছে। এই কথা অসমৰ য়ুটিউব কনটেন্ট ক্ৰিয়েটৰ সকলে নিজ মুখেৰে স্বীকাৰ কৰিছে এই সমাৱেশত। সমাৱেশত ইতিপূৰ্বে মাত্ৰ ১৫ হাজাৰ টকাত ৰাচিয়া ভ্ৰমণ কৰি আহি ইয়াৰ বৰ্ণনা য়ুটিউবত দি ভিউৱাৰ্চৰ সঁহাৰি লাভ কৰা অসমৰ যুৱক ভাস্কৰ দত্তই মাহেকত ৬৫ হাজাৰ টকালৈকে উপাৰ্জন কৰাৰ কথা ব্যক্ত কৰে।
আন এগৰাকী ক্ৰিয়েটাৰেও একে পন্থাৰে য়ুটিউবৰ যোগেদি মাহেকত ৫০ৰ পৰা ৭০ হাজাৰ টকালৈকে আহৰণ কৰাৰ কথা ব্যক্ত কৰে। শিৱসাগৰৰ য়ুটিউব ক্ৰিয়েটৰ ভাস্কৰ দত্তই কয় যে, য়ুটিউবক এতিয়া নতুন প্ৰজন্মই কেৰিয়াৰ হিচাপে ল’ব পাৰে। কাৰণ ইউটিউবৰ পৰা প্ৰতিমাহে বৃহৎ পৰিমাণৰ ধন উপাৰ্জন কৰিব পাৰি। ভাল চৰকাৰী চাকৰিত কৈ য়ুটিউবৰ পৰা লাভ কৰা ধনৰ পৰিমাণ অধিক।
ভাস্কৰ, বিতোপন, দিম্পু, মনোজ আদিকে ধৰি বহুকেইজন য়ুটিউব ভিডিঅ’ ক্ৰিয়েটাৰে এই সমাৱেশত অংশ গ্ৰহণ কৰে। ভাৰ্চুৱেল পৃথিৱীৰ বাবে জ্ঞান, আমোদ প্ৰমোদ, ভ্ৰমণ, ব্যঞ্জন আদিৰ নানা ৰঙী ভিন্ন সুৰী অনেক সমল প্ৰস্তুত কৰি মোবাইল স্ক্ৰীণৰ এই তাৰকা সকলে সমৃদ্ধ কৰিছে, য়ুটিউব চেনেল সমুহ।
অসমৰ এইসকল ক্ৰিয়েটৰসকলৰ মতে অৰ্থ উপাৰ্জনৰ বাবে প্ৰাথমিক পৰ্যায়ত যথেষ্ট সময় আৰু ধৈৰ্যৰ প্ৰয়োজন। বিশেষকৈ য়ুটিউবত যথেষ্ঠ সময় ব্যয় কৰিব লাগিব। উন্নতমানৰ ভিডিঅ’ প্ৰস্তুত কৰিব পাৰিলে ভিউৱাৰ্চৰ সংখ্যা অতি কম সময়ৰ ভিতৰত বৃদ্ধি পাব বুলি মত পোষণ কৰে।
অনাগত দিনৰ পথ নিৰ্ণয় কৰি সঠিকভাবে কি দৰে আগুৱাই যাব তাৰ লক্ষ্য নিৰ্ধাৰণ কৰাৰ বাবেই আয়োজন কৰা হৈছিল য়ুটিউব তাৰকা আৰু অনুৰাগীৰ সমাৱেশ। এই সমাৱেশৰ জৰিয়তে নতুন প্ৰজন্মৰ প্ৰতিজন য়ুটিউব অনুৰাগীক য়ুটিউবক কি দৰে এটা নতুন কেৰিয়াৰ ৰূপে গ্ৰহণ কৰিব পাৰি তাক অৱগত কৰোৱা হয়।
