পাকিস্তান সীমান্তৰ সমীপৱৰ্তী ৰাজস্থানৰ থৰ মৰুভূমি আৰু চীন নিয়ন্ত্ৰিত তিব্বতৰ সমীপৰ উত্তৰাখণ্ডৰ হিমালয় অঞ্চলত মঙলবাৰৰ পৰা ভাৰত আৰু আমেৰিকা যুক্তৰাষ্ট্ৰৰ সেনাবাহিনীৰ যুটীয়া সামৰিক অনুশীলন ‘যুদ্ধ অভ্যাস ২০২৬’ আৰম্ভ হৈছে। প্ৰতিৰক্ষা ক্ষেত্ৰত দুয়োখন দেশৰ পাৰস্পৰিক সহযোগিতা বৃদ্ধিৰ উদ্দেশ্যে আয়োজিত এই অনুশীলনত ভাৰত আৰু আমেৰিকাৰ প্ৰায় ১২০০ গৰাকী সেনা জোৱান আৰু বিষয়াই অংশগ্ৰহণ কৰিছে। অহা ২৮ ছেপ্টেম্বৰলৈকে চলিবলগীয়া এই সামৰিক অনুশীলনত দুয়োখন দেশৰ ৬০০ গৰাকীকৈ সেনাই অংশগ্ৰহণ কৰিছে।
২০০২ চনত প্ৰথমবাৰৰ বাবে আৰম্ভ হোৱা ভাৰত-মাৰ্কিন ‘যুদ্ধ অভ্যাস’ৰ এইবাৰৰ সংস্কৰণটো হৈছে ২২সংখ্যক। এইবাৰেই প্ৰথমবাৰৰ বাবে একেলগে দুখন ভিন্ন স্থানত এই যুটীয়া যুদ্ধ অনুশীলন অনুষ্ঠিত কৰা হৈছে। ৰাজস্থানৰ বিকাণেৰ জিলাৰ মহাজন ফিল্ড ফায়াৰিং ৰেঞ্জ আৰু উত্তৰাখণ্ডৰ আউলিৰ ফৰেইন ট্ৰেইনিং ন’ডত মৰুভূমি আৰু পাহাৰীয়া এলেকাৰ যুদ্ধৰ প্ৰশিক্ষণ চলি আছে। এই অনুশীলনত ভাৰতীয় সেনাৰ ১৪ ইনফেন্ট্ৰি ডিভিজন আৰু মাৰ্কিন ফৌজৰ ১১সংখ্যক এয়াৰবৰ্ণ ডিভিজনৰ সেনাসকল চামিল হৈছে।
মঙলবাৰে আউলিত অনুষ্ঠিত উদ্বোধনী অনুষ্ঠানত ভাৰতীয় সেনাবাহিনীৰ ১৪ ইনফেন্ট্ৰি ডিভিজনৰ জেনেৰেল অফিচাৰ কমাণ্ডিং মেজৰ জেনেৰেল অমৰেশ গুঞ্জন আৰু মাৰ্কিন বাহিনীৰ ১১সংখ্যক এয়াৰবৰ্ণ ডিভিজনৰ প্ৰথম ইনফেন্ট্ৰি ব্ৰিগেড কমবেট টিমৰ কমাণ্ডাৰ কৰ্ণেল বেঞ্জামিন জেকমেন উপস্থিত থাকে। ভাৰতীয় সেনা সূত্ৰই প্ৰকাশ কৰা মতে, ৰাষ্ট্ৰসংঘৰ নিৰ্দেশিকাৰ সপ্তম ধাৰা অনুসৰি সন্ত্ৰাস দমন অভিযানত সামৰিক সক্ষমতা বৃদ্ধি কৰাই হৈছে এই যুটীয়া সেনা অনুশীলনৰ মূল উদ্দেশ্য। এইবাৰৰ অনুশীলনত বিশেষকৈ আধুনিক প্ৰযুক্তিৰ সংযোজন, ড্ৰোণৰ ব্যৱহাৰ আৰু মাল্টি-ডমেইন যুদ্ধ পৰিচালনাৰ সক্ষমতা বৃদ্ধিৰ ওপৰত সৰ্বাধিক গুৰুত্ব আৰোপ কৰা হৈছে।
সামৰিক বিশ্লেষকসকলৰ মতে, দক্ষিণ চীন সাগৰৰ সমীপত যুটীয়া নৌ-অনুশীলনৰ পাছত এতিয়া চীন আৰু পাকিস্তান সীমান্তৰ সমীপত ভাৰত আৰু আমেৰিকাৰ সেনাই যিদৰে একেলগে কাম কৰিবলৈ আৰম্ভ কৰিছে, ই বেইজিং আৰু ইছলামাবাদৰ ওপৰত নিশ্চিতভাৱে এক মানসিক চাপ সৃষ্টি কৰিব। সমাগত দিনত এই যুদ্ধ অভ্যাসে দুয়োখন দেশৰ সামৰিক বাহিনীৰ মাজত কৌশলগত আদান-প্ৰদান আৰু ভৱিষ্যতৰ যিকোনো প্ৰত্যাহ্বানৰ মোকাবিলা কৰাৰ প্ৰস্তুতিক অধিক সুদৃঢ় কৰিব বুলি আশা কৰা হৈছে।
