ভাৰত আৰু অষ্ট্ৰেলিয়াৰ মাজৰ এদিনীয়া আন্তঃৰাষ্ট্ৰীয় ক্ৰিকেট শৃংখলাৰ সামৰণি পৰাৰ পাছত ভাৰতীয় ক্ৰিকেট দলৰ যুৱ ক্ৰিকেটাৰ সুভমন গীলে এখন ফটো ছ’চিয়েল মিডিয়াত শ্বেয়াৰ কৰে।
ফটোখনত সুভমন গীলক কোহলী, নটৰাজন আৰু ধাৱানৰ লগতে ভাৰতীয় ক্ৰিকেট দলৰ সৈতে খেলপথাৰত থিয় হৈ থকা দেখা গৈছে।
‘‘নিজক দেশক প্ৰতিনিধিত্ব কৰিব পোৱাটো মহান অনুভুতি,’’ সুভমন গীলে ফটোখন শ্বেয়াৰ কৰি এনেদৰে লিখে।
সুভমন গীলৰ ফটোত ৰখিকভাৱে নিজৰ মত প্ৰকাশ কৰিছে প্ৰাক্তন ভাৰতীয় অলৰাউণ্ডাৰ যুৱৰাজ সিঙে।
‘‘পকেটৰ পৰা হাত উলিওৱা তুমি ক্লাৱক নহয় ভাৰতীয় ক্ৰিকেট দলক প্ৰতিনিধিত্ব কৰি আছা,’’ সুভমনৰ ফটোত এইদৰে যুৱৰাজ সিঙে লিখে।
উল্লেখযোগ্য যে, ফটোখনত সুভমন গীলক পেণ্টৰ পকেটত হাত সোমাই থকা দেখা গৈছিল।
ভাৰত আৰু অষ্ট্ৰেলিয়াৰ মাজৰ এদিনীয়া শৃংখলাটো অষ্ট্ৰেলিয়াই ২-১ ব্যৱধানত হস্তগত কৰে।
ভাৰতে প্ৰথম দুখন খেলত পৰাস্ত হোৱাৰ পাছত অন্তিমখন খেলত বিজয়ী হৈছিল।
যুৱ ক্ৰিকেটাৰ সুভমন গীলে অন্তিমখন খেলত মায়ংক আগৰৱালৰ স্থানত ভাৰতীয় দলৰ হৈ ইনিংছ মুকলি কৰাৰ সুযোগ লাভ কৰিছিল।
