ভাৰতীয় ক্ৰিকেট দলৰ প্ৰাক্তন তাৰকা ক্ৰিকেটাৰ যুৱৰাজ সিং আইনী ৰোষৰ সন্মুখীন হোৱাৰ উপক্ৰম হৈছে। ক্ৰিকেটাৰ গৰাকীৰ বিৰুদ্ধে গোৱা পৰ্যটন বিভাগে নিয়ম উলংঘনৰ অভিযোগত জাননী জাৰি কৰি শুনানিৰ সন্মুখীন হ’বলৈ নিৰ্দেশ দিছে।
ৰাজ্যৰ সংশ্লিষ্ট কৰ্তৃপক্ষৰ ওচৰত পঞ্জীয়ন নকৰাকৈয়ে মৰ্জিম এলেকাত নিজৰ বাসভৱন অনলাইনত পৰ্যটকৰ আশ্ৰয়ৰ বাবে মুকলি কৰাৰ অভিযোগত এই জাননী জাৰি কৰা হৈছে আৰু ৮ ডিচেম্বৰত শুনানিৰ বাবে নিৰ্দেশ দিছে পৰ্যটন বিভাগে।
উল্লেখ্য যে, পৰ্যটন বিভাগত পৰ্যটকৰ আশ্ৰয়ৰ বাবে নিজৰ বাসভৱন ব্যৱহাৰ কৰিবলৈ দিয়া, অৰ্থাৎ হোমষ্টে’ৰ পঞ্জীয়ন গোৱা পৰ্যটন বাণিজ্য পঞ্জীয়ন আইন, ১৯৮২ৰ অধীনত বাধ্যতামূলক।
পৰ্যটন বিভাগৰ উপ-সঞ্চালক ৰাজেশ কালে উত্তৰ গোৱাৰ মৰ্জিমত অৱস্থিত যুৱৰাজ সিঙৰ মালিকানাধীন ভিলা ‘কাছা সিং’ক উদ্দেশ্যি ১৮ নৱেম্বৰত জাৰি কৰা এই জাননীত ৮ ডিচেম্বৰৰ পুৱা ১১ বজাত ব্যক্তিগত শুনানিৰ বাবে তেওঁৰ সন্মুখত হাজিৰ হ’বলৈ নিৰ্দেশ দিয়ে।
জাননীখনত ক্ৰিকেটাৰগৰাকীক পৰ্যটন বাণিজ্য আইনৰ অধীনত সম্পত্তি পঞ্জীয়ন নকৰাৰ বাবে তেওঁৰ বিৰুদ্ধে কিয় শাস্তিমূলক ব্যৱস্থা আৰম্ভ কৰিব নালাগে তাৰ ওপৰত প্ৰশ্ন কৰা হৈছে।
জাননীখনত কোৱা হৈছে যে “গোৱাৰ ভাৰ্চেৱাডা, মৰ্জিম, পাৰ্নেমত অৱস্থিত আপোনাৰ আৱাসিক চৌহদটোৱে অভিযোগ অনুসৰি হোমষ্টে হিচাপে কাম কৰি আছে আৰু ইয়াক এয়াৰ বিএনবিৰ দৰে অনলাইন প্লেটফৰ্মত চিহ্নিত কৰা হৈছে।”
বিভাগটোৱে যুৱৰাজ সিঙৰ এটা টুইটৰ উদ্ধৃতিও প্ৰকাশ কৰিছে। টুইটটোত যুৱৰাজে ছয়জনীয়া দলৰ বাবে নিজৰ গোৱাস্থিত বাসভৱন মুকলি কৰাৰ কথা উল্লেখ কৰিছিল।
বিভাগটোৱে জাৰি কৰা জাননীখনত কোৱা হৈছে যে “হোটেল/গেষ্ট হাউচ চলোৱাৰ পূৰ্বে প্ৰতিগৰাকী ব্যক্তিয়ে নিৰ্ধাৰিত পদ্ধতিৰে নিৰ্ধাৰিত কৰ্তৃপক্ষৰ ওচৰত পঞ্জীয়নৰ বাবে আবেদন কৰিব লাগিব। গোৱা ৰেজিষ্ট্ৰেচন অৱ টুৰিষ্ট ট্ৰেড এক্ট, ১৯৮২ৰ অধীনত পঞ্জীয়ন নকৰাৰ বাবে আপোনাৰ বিৰুদ্ধে কিয় শাস্তিমূলক ব্যৱস্থা গ্ৰহণ কৰা উচিত নহয় সেই বিষয়ে ইয়াৰ দ্বাৰা আপোনাক জাননী দিয়া হৈছে।”
আনহাতে যদি যুৱৰাজ সিং শুনানিৰ বাবে নিৰ্দিষ্ট সময়ত হাজিৰ নহয় বা উক্ত তাৰিখৰ ভিতৰত কোনো উত্তৰ পোৱা নাযায়, তেন্তে জাননীত উল্লেখ কৰা ভিত্তিসমূহ শুদ্ধ আৰু এনে ধাৰণাত ২২ নং ধাৰাত বা উলংঘা কৰা বুলি ধৰি লোৱা হ’ব বুলি পৰ্যটন বিভাগৰ বিষয়াগৰাকীয়ে জানিবলৈ দিছে।
লগতে এই জাননী উপেক্ষা কৰিলে আইনখনৰ যিকোনো বিধান অনুসৰি যুৱৰাজ সিঙক এক লাখ টকা পৰ্যন্ত জৰিমনা বিহা হ’ব বুলিও বিষয়াগৰাকীয়ে উল্লেখ কৰে।
