দিল্লীৰ হিংসাত্মক পৰিস্থিতিত উদ্বিগ্ন যুৱৰাজ-ছেহৱাগ; জনালে শান্তি বজাই ৰখাৰ আহ্বান

দিল্লীৰ পৰিস্থিতি কিছু শান্ত হ’লেও ৰাজধানী চহৰখনত এতিয়াও পৰিস্থিতি স্বাভাৱিক বুলি ক’ব নোৱাৰি। সংঘৰ্ষৰ ফলত এতিয়ালৈকে ৩৫জনকৈ লোকে প্ৰাণ হেৰুৱাইছে।

দিল্লীৰ এনে হিংসাত্মক পৰিস্থিতি সন্দৰ্ভত স্তম্ভিত হৈ পৰিছে দিল্লীৰ হৈ দেশক প্ৰতিনিধিত্ব কৰা প্ৰাক্তন অপেনাৰ বীৰেন্দ্ৰ ছেহৱাগ। ক্ৰিকেটাৰগৰাকীয়ে টুইটাৰযোগে তেওঁৰ উদ্বিগ্নতা প্ৰকাশ কৰিছে।

দিল্লীৰ ঘটনাত নিজৰ উদ্বিগ্নতা প্ৰকাশ কৰিছে আন দুগৰাকী প্ৰাক্তন ক্ৰিকেটাৰ যুৱৰাজ সিং আৰু ইৰফান পাঠানেও।

নাগৰিকত্ব সংশোধনী আইনৰ বিৰুদ্ধে চলা প্ৰতিবাদ ক্ৰমে ৰণক্ষেত্ৰৰ ৰূপ লয়। উত্তৰ-পূব দিল্লীত সংঘটিত হোৱা সংঘৰ্ষত দিল্লী পুলিচৰ হেড কনিষ্টবল ৰতনলালকে ধৰি কেইবাজনো লোক নিহত হয়।

অৰ্দ্ধ সামৰিক বাহিনীয়েও পৰিস্থিতি চম্ভালাত বহু সংগ্ৰাম কৰিবলগীয়া হয়। অৱশেষত ৰাষ্ট্ৰীয় নিৰাপত্তা উপদেষ্টা অজিত ডোভালে পৰিস্থিতি নিয়ন্ত্ৰণৰ দায়িত্ব গ্ৰহণ কৰে আৰু কঠোৰ ব্যৱস্থা গ্ৰহণৰ জৰিয়তে পৰিস্থিতি কিছু স্বাভাৱিক কৰি তোলে।

দিল্লীত সংঘৰ্ষৰ ফলত মৃতকৰ সংখ্যা বৃদ্ধি পোৱাত উদ্বিগ্ন হৈ পৰে প্ৰাক্তন ক্ৰিকেটাৰ কেইগৰাকী।

ছচিয়েল মিডিয়াৰ জৰিয়তে নিজৰ উদ্বেগ প্ৰকাশ কৰি যুৱৰাজ সিং, বীৰেন্দ্ৰ ছেহৱাগ আৰু ইৰফান পাঠানে প’ষ্ট দিয়ে।

ছেহৱাগে লিখিছে, ‘’দিল্লীত যি হৈছে সেয়া সঁচাকৈয়ে দুৰ্ভাগ্যজনক। সকলোকে অনুৰোধ শান্ত থাকক, শান্তি বজাই ৰাখক। এই হিংসাই ৰাজধানীৰ বুকুত গভীৰ আঘাতৰ সৃষ্টি কৰিলে।‘’

একেদৰে চিন্তা ব্যক্ত কৰিছে যুৱৰাজেও। তেওঁৱো শান্তি বজাই ৰখাৰ অনুৰোধ জনাইছে। তেওঁ পৰিস্থিতি নিয়ন্ত্ৰণ কৰিবলৈ চৰকাৰে নিশ্চয় ব্যৱস্থা গ্ৰহণ কৰিব বুলি আশা ব্যক্ত কৰে।