“উচ্চ-নীচ ব্যৱস্থাটোকহে মাৰিব লাগে বুলি ক’ব খুজিছিলো”, ক্ষমা খুজি জুবিন গাৰ্গে ক’লে ভঙাগড় থানাত
২৬ জুলাইত গুৱাহাটীত এটা সাংস্কৃতিক কাৰ্য্যসূচীৰ সময়ত “বামুণক মাৰিব লাগে” বুলি কৰা বিতৰ্কিত মন্তব্যৰ বাবে আজি ভঙাগড় আৰক্ষী থানাত হাজিৰ হ’ব লগীয়া হয় শিল্পী জুবিন গাৰ্গ।
জানিব পৰামতে, ভঙাগড় থানাত ইন্দ্ৰজিত শৰ্মা নামৰ এজন লোকে দিয়া এজাহাৰৰ ভিত্তিত এটা গোচৰ ৰুজু হৈছিল।
ৰাজ্যৰ আন কেইবা ঠাইতো শিল্পীজনৰ বিৰুদ্ধে এজাহাৰ দাখিল কৰিছিল বিভিন্ন পক্ষই।
ঘটনাস্থল (জি এম চি এইছ প্ৰেক্ষাগৃহ) যিহেতু ভঙাগড় আৰক্ষী থানাৰ অধীনত পৰে, গতিকে আৰক্ষীয়ে জুবিনক ভঙাগড় থানাত হাজিৰ হ’বলৈ নিৰ্দেশ দিছিল।
শিল্পীজনে ভঙাগড় থানাত উপস্থিত হৈ তেওঁ নিজৰ মন্তব্যটো আকস্মিকভাৱে ভুলকৈ ওলোৱা বুলি স্বীকাৰ কৰে আৰু ব্ৰাহ্মণ সমাজে অন্তৰত দুখ পোৱা বুলি জানি কয়, “sorry আৰু ব্ৰাহ্মণ সমাজৰ ওচৰত ক্ষমা বিচাৰিছো”।
“হাই কাষ্ট, ল’ কাষ্ট যে নাইকিয়া কৰিব লাগে সেই কনচেপ্টটোত বিশ্বাস কৰো, সেই কথাটো ক’বলৈ গৈয়ে বামুণ শব্দটো ওলাই গ’ল।” শিল্পীজনে সংবাদ মাধ্যমৰ আগত কয়।
নিজে এজন সাধাৰণ লোক হিচাপে জীয়াই থকাৰ স্থিতি দোহাৰি শিল্পীজনে কয়, “মই নিজে এজন বামুণ ল’ৰা, যদিও মই বামুণ হিচাপে নাথাকো। মই বড়োৰ লগত বড়ো হৈছো, কাৰ্বিৰ সৈতে কাৰ্বি হৈছো, মিচিঙৰ লগত মিচিং হৈছো, বাগানীয়াৰ লগত বাগানীয়া হৈছো, বামুণ হিচাপে জীয়াই থকা নাই।”
“মই এখন শুদ্ধ অসমীয়া সমাজ বিচাৰো, য’ত উচ্চ আৰু নীচ নাই। এখন কাষ্টলেছ ছচাইটি বিচাৰো”, থানাত নিজৰ ভাষ্য দি উঠি সংবাদ মাধ্যমৰ আগত জুবিনৰ মন্তব্য।