অসমৰ জনপ্ৰিয় কণ্ঠশিল্পী জুবিন গাৰ্গৰ বহু প্ৰতিক্ষিত চলচ্চিত্ৰ কাঞ্চনজংঘাৰ সংগীত কাইলৈ অৰ্থাৎ ২০ জুন বিষ্ণু ৰাভা দিৱসৰ পবিত্ৰ দিনটোত গুৱাহাটীৰ শ্ৰদ্ধাঞ্জলি কাননত মুকলি কৰা হ’ব।
মঙলবাৰে জুবিন গাৰ্গে ৰংজুলিত সংগীতানুষ্ঠান পৰিবেশন কৰাৰ সময়ত এই কথা ঘোষণা কৰে আৰু অসমৰ সকলো সংগীত তথা চলচ্চিত্ৰপ্ৰেমীক শ্ৰদ্ধাঞ্জলি কাননলৈ কাঞ্চনজংঘাৰ সংগীত মুকলি অনুষ্ঠানলৈ আমন্ত্ৰণ জনায়।
ৰংজুলি আঞ্চলিক ৰাভা ছাত্ৰ সন্থা, ৰাভা মহিলা পৰিষদ আৰু ষষ্ঠ অনুসূচী দাবী সমিতিয়ে আয়োজন কৰা বয়োখা উৎসৱৰ সাংস্কৃতিক সন্ধিয়াত সংগীত পৰিবেশন কৰি জুবিন গাৰ্গে কাঞ্চনজংঘাৰ সংগীত এটা পবিত্ৰ দিনত এটা শুভ যাত্ৰাৰ আৰম্ভণি কৰাৰ বাবে মুকলি কৰা হ’ব বুলি কয়।
আনহাতে, সংগীতানুষ্ঠানত জুবিনে বহু জনপ্ৰিয় গীতৰ লগতে মুকলি হ’বলগীয়া কাঞ্চনজংঘা চলচ্চিত্ৰৰ এটা গীতো গুণগুণাই।
উল্লেখযোগ্য যে, জুবিন গাৰ্গৰ পৰিকল্পনাৰে নিৰ্মাণ কৰা অসমীয়া চলচ্চিত্ৰ কাঞ্চনজংঘাৰ সংগীত পৰিচালনাৰ কামো জুবিন গাৰ্গে নিজে কৰিছে।
কাইলৈ সন্ধিয়া ৬ বজাত শ্ৰদ্ধাঞ্জলি কাননত কাঞ্চনজংঘাৰ সংগীত মুকলি কৰা হ’ব । এই অনুষ্ঠানত জুবিনৰ লগতে চলচ্চিত্ৰখনত অভিনয় কৰা বহু শিল্পী উপস্থিত থকাৰ সম্ভাৱনা আছে।
