অসমীয়া জাতিৰ প্ৰাণৰ শিল্পী প্ৰয়াত জুবিন গাৰ্গৰ চিতাভস্ম আজি ব্ৰহ্মপুত্ৰ নদত বিসৰ্জন দিয়া হয়। ব্ৰহ্মপুত্ৰৰ প্ৰতি জুবিন গাৰ্গৰ অপাৰ ভালপোৱা আছিল, যাৰ বাবে শিল্পী জন অনুৰাগৰ প্ৰতি সন্মান জনাই এইদৰেই শিল্পীজনক শেষ বিদায় দিয়া হয়।
শিল্পীগৰাকীৰ চিতাভস্ম আজি পুৱা নীতি-নিয়ম অনুসৰি ব্ৰহ্মপুত্ৰত উটুৱাই দিয়া হয়।
গুৱাহাটীৰ কাছমাৰী ঘাটত জুবিন গাৰ্গৰ পত্নী গৰিমা গাৰ্গে কান্দি কান্দি শোকত বিহ্বল হৈ স্বামীৰ চিতাভস্ম বিসৰ্জন দিয়ে। এই সময়ত পৰিয়ালৰ সদস্যৰ লগতে অসংখ্য গুণমুগ্ধও উপস্থিত থাকে।
একেদৰে, জুবিন গাৰ্গে পুত্ৰজ্ঞান কৰা তথা মুখাগ্নি কৰা অৰুণ গাৰ্গেও যোৰহাটত জুবিন গাৰ্গৰ চিতাভস্ম ব্ৰহ্মপুত্ৰৰ বুকুত বিসৰ্জন দিয়ে। যোৰহাট জিলা প্ৰসাশনৰ উদ্যোগত এই অনুষ্ঠান সম্পন্ন কৰা হয়।
জীৱিত কালত জুবিন গাৰ্গে কৈছিল, “মই মৰিলে মোক ব্ৰহ্মপুত্ৰত উটুৱাই দিবা। ব্ৰহ্মপুত্ৰ মোৰ দেউতাৰ দৰে। সাগৰতকৈ মই ব্ৰহ্মপুত্ৰক ভালপাও। পৃথিৱীৰ একমাত্ৰ পুৰুষ নদ ব্ৰহ্মপুত্ৰ।”
তেওঁৰ সেই শেষ ইচ্ছা পূৰণ কৰি আজি তেওঁৰ নশ্বৰ দেহৰ শেষ অংশ ব্ৰহ্মপুত্ৰৰ বিশাল বুকুত অৰ্পণ কৰা হয়।
চিতাভস্ম বিসৰ্জন দি পত্নী গৰিমা শইকীয়া শোকত বিহ্বল হৈ হুকহুকাই কান্দি উঠে। তেওঁ কয় – জুবিন আমাৰ লগত সদায়ে থাকিব। জুবিনে আমাক এৰি ক’তো যাব নোৱাৰে । আমাৰ ওপৰত তেওঁৰ আশীৰ্বাদ সদায়ে থাকিব।”
