ৰাজ্যৰ জনপ্ৰিয় শিল্পী জুবিন গাৰ্গৰ মৃত্যুৱে সমগ্ৰ অসমক শোকস্তব্ধ কৰি ৰখাৰ সময়তে আজি তেওঁৰ পত্নী গৰিমা শইকীয়া গাৰ্গে ছ’চিয়েল মিডিয়াত এক বিস্ফোৰক পোষ্ট যোগে শিল্পীজনৰ মৃত্যুক পোনপটীয়াকৈ ‘পৰিকল্পিত হত্যাকাণ্ড’ বুলি অভিহিত কৰিছে। আৰক্ষীৰ বিশেষ তদন্তকাৰী গোট (SIT)-এ যোৱা ১২ ডিচেম্বৰত দাখিল কৰা চাৰ্জশ্বীটৰ তথ্য সদৰী কৰি গৰিমা গাৰ্গে ঘটনাৰ অন্তৰালত থকা গভীৰ ষড়যন্ত্ৰ আৰু চৰম অৱহেলাৰ কথা উল্লেখ কৰিছে।
গৰিমা শইকীয়াই অভিযোগ কৰা মতে, ছিংগাপুৰ ভ্ৰমণৰ পূৰ্বৰে পৰাই জুবিনৰ থকা-মেলাৰ ব্যৱস্থাক লৈ এক ৰহস্যজনক খেলিমেলি চলি আছিল। চাৰ্জশ্বীটত উল্লেখ থকা মতে, আয়োজক শ্যামকানু মহন্তৰ ঘৰৰ পৰা উদ্ধাৰ হোৱা তথ্য অনুসৰি জুবিনৰ বাবে প্ৰথমে অনুজ বৰুৱা নামৰ এজন ব্যক্তিৰ সৈতে এটা কোঠাৰ ব্যৱস্থা কৰা হৈছিল, যিটো জুবিনৰ দৰে এজন শিল্পীৰ বাবে এক অকল্পনীয় বিষয়। ইয়াৰ উপৰিও মেনেজাৰ সিদ্ধাৰ্থ শৰ্মা আৰু আয়োজকৰ ভাষ্যত থকা বিসংগতিয়ে ঘটনাটোৰ আঁৰত এক কু-অভিসন্ধি থকাৰ ইংগিত বহন কৰিছে বুলি তেওঁ দাবী কৰে।
আন এক চাঞ্চল্যকৰ তথ্য ফাদিল কৰি গৰিমা গাৰ্গে কয় যে মেনেজাৰ সিদ্ধাৰ্থই জুবিন বা তেওঁৰ পৰিয়ালৰ অজানিতে ‘One Last Tour’ নামেৰে জুবিনৰ অৱসৰৰ ভুৱা প্ৰচাৰ চলাইছিল আৰু তাৰ দোহাই দি বিভিন্ন কমিটিৰ পৰা অধিক মাননী সংগ্ৰহ কৰিছিল।
“জুবিনে অৱসৰৰ কথা কেতিয়াও ভবা নাছিল, মই গোটেই জীৱন তেওঁৰ নতুন কামৰ পৰিকল্পনা আৰু সপোনহে দেখিছোঁ,”— আৱেগিক হৈ তেওঁ এইদৰে লিখে।
দুৰ্ভাগ্যজনক ঘটনাটোৰ দিনা জুবিনৰ প্ৰতি দেখুওৱা চৰম অৱহেলাৰ বৰ্ণনা দি তেওঁ কয় যে চিকিৎসা অবিহনে শিল্পীগৰাকীক প্ৰায় ৭৫ মিনিট সময় পেলাই ৰখা হৈছিল। ওচৰতে চিকিৎসাৰ সুবিধা থকা স্বত্বেও কিয় ইমান দেৰি কৰা হ’ল, সেই লৈ তেওঁ প্ৰশ্ন উত্থাপন কৰে। তেওঁ অভিযোগ কৰে যে মৃগীৰোগ (Seizure) থকা জুবিনক নিচাগ্ৰস্ত অৱস্থাত লাইফ জেকেট নোহোৱাকৈ সাগৰত সাঁতুৰিবলৈ দিয়াটো আছিল এক অপৰাধ। আনকি জুবিনক ভাগৰুৱা অৱস্থাত দেখিও মেনেজাৰ সিদ্ধাৰ্থই বাধা দিয়াৰ পৰিৱৰ্তে ‘যাব দে’ বুলি ইংগিত দিয়াৰ কথাও চাৰ্জশ্বীটত উল্লেখ থকা বুলি তেওঁ জানিবলৈ দিয়ে।
জুবিনৰ মৃত্যুক সহজভাৱে ল’ব নোৱাৰা পত্নী গৰিমাই এই সমগ্ৰ ঘটনাত জড়িত ব্যক্তিসকলক ‘মানুহৰূপী দানৱ’ বুলি আখ্যা দিছে। তেওঁ চৰকাৰ আৰু ন্যায় ব্যৱস্থাৰ ওচৰত দাবী জনায় যে, এই গোচৰৰ বাবে এখন বিশেষ ফাষ্ট ট্ৰেক আদালত গঠন কৰা হওক, য’ত দৈনিক শুনানিৰ ব্যৱস্থা থাকিব। তেওঁ লগতে এটা শক্তিশালী চৰকাৰী অধিবক্তাৰ দল গঠনৰো আহ্বান জনায় যাতে দোষীয়ে কোনোপধ্যেই সাৰি যাব নোৱাৰে।
