“বিজেপিৰ মাজত অনেক বিদেশী আছে। সেয়ে তেওঁলোকে নাগৰিকত্ব সংশোধনী বিধেয়ক বিচাৰি আছে।” বিজেপি দলৰ বিৰুদ্ধে এই গুৰুতৰ অভিযোগ কৃষক মুক্তিৰ নেতা অখিল গগৈৰ।
শুকুৰবাৰে গুৱাহাটীৰ গান্ধীবস্তিত থকা কৃষক মুক্তি সংগ্ৰাম সমিতিৰ কাৰ্যালয়ত এক সংবাদমেল যোগে বৰখলা সমষ্টিৰ বিজেপি বিধায়ক কিশোৰ নাথলৈ বিদেশী ন্যায়াধিকৰণে জাননী প্ৰেৰণ কৰা প্ৰসংগটো টানি আনি কৃষক নেতাগৰাকীয়ে কয়, “বিজেপি দলটো বিদেশীৰ দ্বাৰাই গঠিত। বিদেশী ন্যায়াধিকৰণৰ পৰা বিজেপি বিধায়কলৈ জাননী যোৱা কথাটোৱে এই কথা প্ৰমাণ কৰে।”
ইফালে বিজেপি সাংসদ কামাখ্যা প্ৰসাদ তাছাই অখিল গগৈৰ বিৰুদ্ধে সৰৱ হৈ “অখিল গগৈৰ কথামতে অসম নচলে” বুলি কোৱা কথাষাৰৰ প্ৰত্যুত্তৰত কয়, “কামাখ্যা প্ৰসাদ তাছাই সঁচা কথাই কৈছে, মোৰ কথাত অসম নচলে। কিন্তু তেওঁ আৰু এটা কথা যোগ দিব লাগিছিল যে বিজেপি-আৰ এছ এছৰ কথাতো অসম নচলে।”
তেওঁ লগতে কয়, “পানীৰ পৰা উঠি অহা মাছে যেনেকৈ বামত চটফটাই থাকে, বিজেপি-আৰ এছ এছৰ মানুহকেইটাৰো এতিয়া চটফটাই থাকিব লগীয়া অৱস্থা হৈছে। বিজেপি নেতাই এতিয়া মৰিবলৈ চটফটাই আছে।”
সাংবাদিকৰ আগত তাছাক প্ৰত্যাহ্বান জনাই অখিল গগৈয়ে লগতে কয়, “কামাখ্যা প্ৰসাদ তাছা ২০১৯ৰ নিৰ্বাচনত হৰাটো নিশ্চিত হৈ আছে। আপোনালোকে লিখি থ’ব পাৰে।” ইয়াৰ উপৰি গগৈয়ে বিজেপি আৰু আৰ এছ এছৰ সকলো কথা অসমৰ মানুহে বিৰোধিতা কৰে বুলি কোৱাৰ লগতে বিজেপি-আৰ এছ এছক অসমৰ মানুহে এতিয়া শত্ৰুজ্ঞান কৰে বুলিও তিৰ্য্যক মন্তব্য কৰে।
সংবাদমেলত কৃষক নেতাগৰাকীয়ে অহা ২০ মে’ত বিজেপিৰ ৰাষ্ট্ৰীয় অধ্যক্ষ অমিত শ্বাহৰ অসম ভ্ৰমণৰ তীব্ৰ বিৰোধিতা কৰিবলৈ সমগ্ৰ অসমবাসীলৈ আহ্বান জনোৱাৰ লগতে তেওঁ কয়, “নাগৰিকত্ব সংশোধনী বিধেয়কক লৈ এতিয়া সমগ্ৰ অসমীয়া জাতি ক্ষুভিত, আৱেগিক আৰু উৎকণ্ঠিত হৈ আছে। তেনে সময়ত অমিত শ্বাহ অসমলৈ আহিব অসমৰ মানুহক আশ্বস্ত কৰিবলৈ নহয়। চলে-বলে-কৌশলে অসম তথা উত্তৰ-পূৰ্বাঞ্চলৰ মানুহৰ ভোট লাভৰ বাবে ৰণকৌশল তৈয়াৰ কৰিবলৈহে আহিব।” বিজেপিয়ে ২০১৯ৰ নিৰ্বাচনৰ ৰণকৌশল তৈয়াৰ কৰি থকাৰ কথা উল্লেখ কৰি তেওঁ কয়, “এই কথাই ’৮৩ৰ নিৰ্বাচনলৈ মনত পেলাই দিয়ে। অসমীয়া জাতিৰ জাগৰণৰ বিপৰীতে গৈ বিজেপিয়ে জাতিটোক ভাগ ভাগ কৰি অসমত ক্ষমতা দখলৰ চেষ্টা চলাই আছে।”
অমিত শ্বাহৰ ভ্ৰমণৰ বিৰোধিতা কৰি ২০ মে’ৰ দিনা গুৱাহাটীৰ লগতে অসমৰ ৰাইজক ঘৰৰ চোতাল, চাদ, গেইট, বাহন আদিৰ লগতে সকলো জাতীয়-জনগোষ্ঠীয় সংগঠন, নামঘৰ, মন্দিৰ, মছজিদ সমিতি, উন্নয়ন সমিতি, আত্মসহায়ক গোট আদিক ক’লা পতাকা উৰুওৱাৰ আহ্বান জনায়। ইতিমধ্যে কৃষক মুক্তি সংগ্ৰাম সমিতিয়ে ৰাজ্যৰ কেবাটাও পৰিবহণ সংস্থা, ই-ৰিক্সা আৰু অ’টো ৰিক্সা সন্থাৰ লগত যোগাযোগ কৰি সেইদিনা বাহনসমূহত ক’লা পতাকা উৰুৱাবলৈ অনুৰোধ জনাইছে বুলি গগৈয়ে জানিবলৈ দিয়ে।
ইফালে আজি কৃষক মুক্তি সংগ্ৰাম সমিতিৰ লগত বাংলাভাষী লোকৰ ১৫টা সংগঠনৰ যৌথ মঞ্চ বাঙালী যৌথ সমিতি, অসমৰ এক বৈঠক অনুষ্ঠিত হয় বুলি সংবাদমেলত অখিল গগৈয়ে প্ৰকাশ কৰে। বৈঠকত নাগৰিকত্ব সংশোধনী বিধেয়ক বাতিল কৰা, অসমৰ বাংলাভাষীসকলৰ জীৱন আৰু সম্পত্তিৰ সুৰক্ষাৰ ব্যৱস্থা কৰা আৰু অসমীয়া আৰু বাঙালীৰ মাজত সম্প্ৰীতি অক্ষুণ্ণ ৰখাৰ দাবীত যুটীয়া সংসদীয় সমিতি, ৰাজ্যপাল আৰু মুখ্য মন্ত্ৰীলৈ এখন স্মাৰকপত্ৰ প্ৰেৰণৰ সিদ্ধান্ত গ্ৰহণ কৰা বুলিও গগৈয়ে সংবাদ মেলত উল্লেখ কৰে।
