“এডপ্ট এ হেৰিটেইজৰ নামত যদি ব্যক্তিগত খণ্ডক এই সমূহ সম্পদৰ ৰক্ষণাবেক্ষণৰ দায়িত্ব দিয়ে তথা মুনাফা লুটিবৰ বাবে দিয়ে তেন্তে তাই আহোম যুৱ পৰিষদে হাতত হেংদাং তুলি ল’বলৈ বাধ্য হ’ব।” -চৰকাৰে ব্যক্তিগত খণ্ডক অসমৰ ঐতিহ্যক্ষেত্ৰ চোৱাচিতা কৰাৰ নামত গতাই দিয়াত ক্ষোভ প্ৰকাশ কৰি তাই আহোম যুৱ পৰিষদৰ সভাপতি চাও দিলীপ গগৈয়ে আজি এইদৰে কয়। আজি গুৱাহাটী প্ৰেছ ক্লাবত সংবাদমেল আয়োজন কৰি তাই আহোম যুৱ পৰিষদে কেন্দ্ৰীয় চৰকাৰৰ এই হঠকাৰী সিদ্ধান্তক কঠোৰভাৱে সমালোচনা কৰে।
তদুপৰি চৰকাৰৰ প্ৰতি প্ৰশ্ন উত্থাপন কৰি দিলীপ গগৈয়ে কয়, “ব্যক্তিগত কোম্পানিৰ পৰা চৰকাৰে সাহায্য পুঁজিটো নলয় কিয়? কোম্পানিয়ে ধনখিনি দিয়াৰ ক্ষেত্ৰত চুক্তিৰ কিহৰ প্ৰয়োজন?”
আনহাতে জে টি আইৰ স্বত্বাধিকাৰী আশিস ফুকনে কাজিৰঙাৰ ২০০ বিঘা মাটি জোৰা অঞ্চলত যাদুঘৰ নিৰ্মাণ কৰাৰ সন্দৰ্ভত দিলীপ গগৈয়ে কয়, “কাজিৰঙাত উচ্ছেদ চলাই সৰু-সৰু দুখীয়া মানুহখিনিক খেদি পঠিয়ালে, তাৰ বিপৰীতে পুঁজিপতি মানুহ বিলাকক ৰঙা দলিচা পাৰি দিছে। এনেকুৱা ঘটনা হ’ব পাৰে নেকি? ১০০ জন মানুহক চৰকাৰে প্ৰাধান্য দিব নে ১জন মানুহক প্ৰাধান্য দিব? এই কথাৰ আমি ঘোৰ বিৰোধিতা কৰিছো।”
“কাজিৰঙাত গঁড় মাৰি আছে, বানপানীৰ কৱলত হাজাৰ হাজাৰ জীৱ-জন্তু মৃত্যুমুখত পৰিছে, তাক ৰোধ কৰিব পাৰিছেনে চৰকাৰে? সেইবিলাক সমস্যা ৰোধ কৰাৰ সলনি আকৌ লেট্ৰিন-বাথৰুম বনাবলৈ গৈছে। লেট্ৰিন-বাথৰুম নালাগে বুলি ক’ব খোজা নাই। কিন্তু তাৰ আগতে জীৱ-জন্তু, গছ-গচনি ৰক্ষণাবেক্ষণ দিব লাগিব।” দিলীপ গগৈয়ে কয়।
আনহাতে শনিবাৰৰ সংবাদমেলৰ জৰিয়তে চৰকাৰক জীৱ-জন্তু ৰক্ষণাবেক্ষণ দিবৰ বাবে হাইলেণ্ড নিৰ্মাণ কৰিবৰ বাবে সংস্থাৰ সভাপতিয়ে দাবী জনায়। লগতে অসমৰ খণ্ডসমূহ কাৰো পৈতৃক সম্পত্তি নহয়, ৰাজহুৱা সম্পত্তি বুলি সদৰী কৰে গগৈয়ে।
উল্লেখযোগ্য যে উক্ত সংবাদ মেলতে চৰকাৰী যন্ত্ৰৰ প্ৰতৰাণামূলক কোনো নীতিকেই অসমত বলৱৎ কৰিবলৈ দিয়া নহ’ব আৰু ঐতিহ্যক বিকৃত কৰি অসমৰ স্বাভিমানক আঘাত হানিবলৈ কোনো বেপাৰী-বহতীয়া চৰকাৰক অনুমতি দিয়া নহ’ব বুলি তাই আহোম যুব পৰিষদে স্থিতি স্পষ্ট কৰে।
