ৰিপাব্লিক টিভিৰ পৰিচালন সঞ্চালক তথা মুখ্য সম্পাদক অৰ্ণৱ গোস্বামীৰ বিৰুদ্ধে আত্মহত্যাৰ বাবে প্ৰৰোচিত কৰাৰ অভিযোগ উত্থাপিত হৈছে।
অৰ্ণৱ গোস্বামী আৰু আন দুজন ব্যক্তিৰ বিৰুদ্ধে এগৰাকী ইন্টেৰিয়’ৰ ডিজাইনাৰৰ ওপৰত মানসিক চাপ সৃষ্টি কৰি আত্মহত্যা কৰিবলৈ প্ৰৰোচিত কৰাৰ অভিযোগ উত্থাপিত হৈছে।
শনিবাৰে পুৱা আলিবাগৰ এটি গৃহৰ ভিতৰত আত্মহত্যা কৰিছিল অনভয় নায়ক নামৰ লোকজনে। অনভয় নায়কে ৰিপাব্লিক টিভিত ইন্টেৰিয়’ৰ ডিজাইনাৰ হিচাপে কাম কৰিছিল। অনভয়ক ৰিপাব্লিক টিভিয়ে তেওঁৰ পাবলগীয়া ধনখিনি আদায় নিদিয়াৰ অভিযোগ উত্থাপিত হৈছে।
পাবলগীয়া ধন নোপোৱাৰ বাবেই ইন্টেৰিয়’ৰ ডিজাইনাৰ গৰাকীয়ে আত্মহত্যা কৰা বুলি অনভয় নায়কৰ পত্নীয়ে মহাৰাষ্ট্ৰৰ ৰায়গড় থানাত অৰ্ণৱ গোস্বামী আৰু আন দুজনৰ বিৰুদ্ধে অভিযোগ দাখিল কৰে। ৰায়গড় আৰক্ষী থানাৰ ভাৰপ্ৰাপ্ত বিষয়া সঞ্জয় পাটিলে এই অভিযোগৰ সত্যতা স্বীকাৰ কৰিছে।
অৰ্ণৱ গোস্বামী, আই কাষ্ট এক্স-ৰ ফিৰোজ শেখ তথা স্মাৰ্ট ৱৰ্কছ-ৰ নীতেশ সাৰদাৰৰ বিৰুদ্ধে ভাৰতীয় দণ্ডবিধিৰ ৩০৬ নং ধাৰাত আত্মহত্যাৰ বাবে প্ৰৰোচনা কৰাৰ অভিযোগত এটা গোচৰ ৰুজু কৰা হৈছে।
এই তিনিজন ব্যক্তিৰ নাম উল্লেখ কৰি মৃত অনভয়ে এটা আত্মহত্যাৰ টোকা লিখি থৈ যোৱা বুলি আৰক্ষীয়ে জানিবলৈ দিছে।
আনহাতে, ৰিপাব্লিক টিভিৰ তৰফৰ পৰা এই অভিযোগ খাৰিজ কৰি আত্মহত্যা কৰা ইন্টেৰিয়’ৰ ডিজাইনাৰ অনভয় নায়কক তেওঁৰ প্ৰাপ্য আদায় দিয়া হৈছিল বুলি প্ৰকাশ কৰিছে ৰিপাব্লিক টিভিৰ মুখ্য সম্পাদক তথা পৰিচালন সঞ্চালক অৰ্ণৱ গোস্বামীয়ে।
