ৰাষ্ট্ৰীয় স্বয়ংসেৱক সংঘৰ প্ৰধান মোহন ভাগৱতে কাইলৈ গুৱাহাটীত ৫০০০০ স্বয়ংসেৱকৰ এক সমাৱেশ সম্বোধন কৰিব। উত্তৰ-পূৰ্বাঞ্চলত এইখনেই এইপৰ্য্যন্ত হিন্দুত্ববাদী সংগঠনটোৰ সৰ্ববৃ্হৎ সমাৱেশ হ’ব বুলি প্ৰচাৰ কৰা হৈছে।
এজন আৰ এছ এছ নেতাই দাবী কৰা অনুসৰি কেইবাশতাধিক সাধাৰণ নাগৰিকেও ভাগ ল’ব লগীয়া ‘লুইতপৰীয়া হিন্দু সমাৱেশ’ শীৰ্ষক এই অনুষ্ঠানটো অসম তথা উত্তৰ-পূৰ্বাঞ্চলত সংঘৰ এইধৰণৰ প্ৰথম আয়োজন।
ভাগৱতে খানাপাৰাৰ পশু চিকিৎসা মহাবিদ্যালয় খেলপথাৰত আৰ এছ এছ কৰ্মীসকলক সম্বোধন কৰিব।
সংঘ কৰ্মীসকলৰ মতে এই আয়োজনে সমগ্ৰ উত্তৰ-পূৰ্বাঞ্চলতে ইয়াৰ বাৰ্তা প্ৰসাৰত সহায় কৰিব আৰু অঞ্চলটোত বাস কৰা বিভিন্ন বৰ্ণ আৰু সম্প্ৰদায়ৰ লোকসকলক একত্ৰিত কৰিব।
আৰ এছ এছ অসমৰ প্ৰচাৰ প্ৰমুখ তীৰ্থ শংকৰ দাসে কয়, ‘সমাৱেশ উপলক্ষে গুৱাহাটীত দেওবাৰে প্ৰায় ৫০০০০ স্বয়ংসেৱক সমৱেত হ’ব। তাৰোপৰি সমাৱেশখনত বহু কেইজন ধৰ্মীয় নেতা আৰু জনজাতীয় মুখিয়ালেও অংশগ্ৰহণ কৰিব।’
আয়োজনটো সূচাৰুৰূপে অনুষ্ঠিত কৰাৰ বাবে আৰ এছ এছ কৰ্মীসকলে সকলো আয়োজন কৰিছে বুলি উল্লেখ কৰি তেওঁ কয় যে, ‘১৯৯৪ চনত হোৱা এক বৃ্হৎ সমাৱেশত উত্তৰ-পূবত ৪০০০ গৰাকী স্বয়্ংসেৱক গোট খাইছিল।’
দাসে জনায়, ‘সকলো স্বয়ংসেৱককে একগোট কৰাৰ বাবে আমি এই সমাৱেশৰ পৰিকল্পনা কৰিছো। আমাৰ সকলো স্বয়ংসেৱকে নিজৰ নিজৰ অঞ্চলত নীৰৱে কাম কৰি আছে। তথাপি তেওঁলোকৰ মাজত বিদ্যমান একতা আৰু নিয়মানুৱৰ্তিতাৰ মাত্ৰা আৰু অধিক বঢ়োৱাৰ বাবে আমি সকলোকে সমৱেত কৰিব খুজিছো।’
অঞ্চলটোৰ তিনিখন ৰাজ্য নাগালেণ্ড, মেঘালয় আৰু ত্ৰিপুৰাত অহা মাহত হ’ব লগা নিৰ্বাচনৰ পৰিপ্ৰেক্ষিতত আৰ এছ এছৰ এই বৃহৎ সমাৱেশ তাৎপৰ্য্যপূৰ্ণ বুলি বিবেচিত হৈছে। উল্লেখযোগ্য যে এই তিনিওখন ৰাজ্যতে বিজেপিয়ে নিজৰ খোপনি পুতিবৰ চেষ্টা কৰি আছে।
