‘আমাৰ যুৱ চামৰ বহুতেই এতিয়া নিচাযুক্ত দ্ৰব্যৰ প্ৰতি অধিক আকৰ্ষিত হোৱা দেখা যায়। আগতে জনজাতীয় লোকসকলে দিনটোৰ পৰিশ্ৰমৰ অন্তত অৱসাদ গুচাবলৈ কিছু পৰম্পৰাগত পানীয় গ্ৰহণ কৰিছিল। কিন্তু এতিয়া সি কেৱল জনজাতিৰ মাজতে সীমাবদ্ধ নাথাকি সমাজত দূৰাৰোগ্য ব্যাধিৰ দৰে বিয়পিছে’।— এই মন্তব্য সমাজ কল্যান মন্ত্ৰী প্ৰমীলা ৰাণী ব্ৰহ্মৰ।
মঙলবাৰে আন্তৰ্জাতিক নিচাযুক্ত দ্ৰব্য সেৱন আৰু সৰবৰাহ বিৰোধী দিৱস উপলক্ষে পাঞ্জাবাৰীস্থিত শ্ৰীমন্ত শংকৰদেৱ কলাক্ষেত্ৰৰ মাধবদেৱ আন্তৰ্জাতিক প্ৰেক্ষাগৃহত সমাজ কল্যান বিভাগৰ উদ্যোগত আয়োজিত এক আলোচনা চক্ৰত ভাগ লৈ মন্ত্ৰী গৰাকীয়ে লগতে অসমত মাদক দ্ৰব্যৰ ফলত সৃষ্টি হোৱা বিভিন্ন পৰিস্থিতি নিৰাময়ৰ বাবে উচিত ব্যবস্থা গ্ৰহণৰ পোষকতা কৰে।
মন্ত্ৰীগৰাকীয়ে লগতে পাঠ্যক্ৰমত নীতি শিক্ষাক অন্তৰ্ভুক্ত কৰাৰ প্ৰয়োজনীয়তাৰ বিষয়েও দোহাৰে। এই ক্ষেত্ৰত চৰকাৰী উদ্যোগত পদক্ষেপ গ্ৰহণৰ বাবে ব্যৱস্থা ল’ব বুলিও তেওঁ প্ৰকাশ কৰে।
অনুষ্ঠানটোত উপস্থিত থাকি মনোৰোগ বিশেষজ্ঞ ডাঃ জয়ন্ত দাসে কয়— ‘নিচাসক্ত কেইজনমান ৰোগীক মাজতে ধৰি নিচাবন্ধ কৰিব বিচাৰিলে নিচাযুক্ত দ্ৰব্য সেৱনৰ সমস্যাটো সমাধান কৰিব পৰা নাযাব। তাৰ বাবে লাগিব এক প্ৰনালীবদ্ধ ব্যৱস্থা। কিন্তু সেইটো আমাৰ সমাজত হোৱা নাই’। তেওঁ সমাজৰ পৰা এনেধৰনৰ সমস্যা দূৰ কৰিবলৈ ব্যক্তিৰ আৱেগিক আৰু মনস্তাত্বিক পৰিপক্কতাৰ প্ৰয়োজন আছে বুলি মত প্ৰকাশ কৰে। তেওঁ এই মনস্তাত্বিক আৰু আৱেগিক পৰিপক্কতা বিদ্যালয়সমূহৰ পৰাই ল’ৰা-ছোৱালীৰ মনত গঢ় দিব লাগিব বুলিও দোহাৰে।
আনহাতে আলোচনা চক্ৰত ভাগ লৈ সাংবাদিক নিতুমণি শইকীয়াই কিছুমান দিৱস পাতিয়েই সমস্যা সমূহ সমাজৰ পৰা আঁতৰাব পৰা নাযাব বুলি উল্লেখ কৰি তেওঁ কয় যে এই দিৱস সমূহৰ তাৎপৰ্য অন্তৰেৰে গ্ৰহণ কৰি আগবাঢ়িব লাগিব। তেওঁ লগতে সুৰাৰ বিপণীসমূহ আবেলি দুই বজাৰ পৰিৱৰ্তে পুৱা ১০ বজাত খোলাৰ অনুমতি দিয়া, দেশীয় সুৰা বিক্ৰীৰ অনুজ্ঞাপত্ৰ দিয়া আদি কাৰ্যৰ দ্বাৰা চৰকাৰে কিছুমান স্ব-বিৰোধী স্থিতি লোৱা বুলিও চৰকাৰক সমালোচনা কৰে।
আজিৰ এই আলোচনা চক্ৰত সমাজ কল্যান বিভাগৰ সঞ্চালক এছ এছ মীণাক্ষিসুন্দৰম, মনোৰোগ বিশেষজ্ঞ ডাঃ চিৰঞ্জীৱ কাকতিও উপস্থিত থাকে।
বিয়লিৰ ভাগত এই দিৱস উপলক্ষে অসম আৰক্ষী, চিআৰপিএফ আৰু কেইবাটাও সংস্থাৰ উদ্যোগত দ্বিতীয়লানি আলোচনা চক্ৰ অনুষ্ঠিত হয়।
