ৰাজ্যখনৰ চাৰিওফালে বানপানীয়ে তাণ্ডৱ চলোৱাৰ সময়তে কোকৰাঝাৰ জিলাৰ দোতমা আৰক্ষী থানাৰ অন্তৰ্গত মাউৰিয়াগাঁৱত এক শোকাৱহ ঘটনা সংঘটিত হয়।
উল্লেখযোগ্য যে কোকৰাঝাৰ জিলাৰ দোতমা আৰক্ষী থানাৰ অন্তৰ্গত মাউৰিয়াগঁৱৰ গণকান্ত ব্ৰহ্মৰ কন্যা কবিতা ৰাণী ব্ৰহ্ম(৮) আৰু বিনয় মুছাহাৰীৰ কন্যা পামী মুছাহাৰী(৯) য়ে শনিবাৰে ঘৰৰ সমীপৰে লংগা নৈত গা ধুবলৈ গৈ নিৰুদ্দেশ হয়।
ফলত বহু সময় ধৰি শিশু দুটি ঘৰলৈ উভতি নহাত দুয়োটা পৰিয়ালৰ লোকে শিশু দুটিক বিচাৰ-খোচাৰ কৰে। কিন্তু নৈৰ পাৰত শিশু দুটিৰ কাপোৰ কানিৰ উদ্ধাৰ কৰাৰ বাহিৰে শিশু দুটিৰ কোনো শুংসূত্ৰ লাভ নকৰিলে। উপায়হীন হৈ পৰিয়ালৰ লোকে ঘটনা সন্দৰ্ভত আৰক্ষীক অৱগত কৰে।
আনহাতে আৰক্ষীয়ে লগে লগে নিশাই স্থানীয় লোকৰ সহায়ত শিশু দুটিৰ উদ্ধাৰৰ অভিযান চলোৱাৰ লগতে এনডিআৰএফ আৰু এচডিআৰএফক ঘটনা সন্দৰ্ভত অৱগত হৈ আজি পুৱাৰে পৰা অভিযান চলায়। কিন্তু শিশু দুটিক উদ্ধাৰ কৰিবলৈ সক্ষম নহ’ল।
ইফালে ঘটনাস্থলীৰ পৰা প্ৰায় ৩০ কি. মি. নিলগৰ তথা ধুবুৰী জিলাৰ গৌৰীপুৰ থানাৰ অধীনৰ আটানীত কবিতা ৰাণী ব্ৰহ্মৰ মৃতদেহ এজন মাছমৰীয়াই উদ্ধাৰ কৰে। পিছত আৰক্ষীৰ সহযোগত শিশুটিৰ মৃতদেহ উদ্ধাৰ কৰাৰ লগতে শিশুটিৰ মৃতদেহ পৰিয়ালৰ লোকে চিনাক্ত কৰে।
উল্লেখযোগ্য যে ঘটনাৰ বিষয়ত অৱগত হৈ কোকৰাঝাৰ পশ্চিম সমষ্টিৰ বিপিএফৰ বিধায়ক ৰবিৰাম নাৰ্জাৰী ঘটনাস্থলীত উপস্থিত হৈ গভীৰ শোক প্ৰকাশ কৰাৰ লগতে নিহতৰ পৰিয়ালবৰ্গক আৰ্থিক সাহায্য প্ৰদান কৰিবলৈ প্ৰশাসনৰ ওচৰত দাবী উত্থাপন কৰে।
আনহাতে আনগৰাকী শিশুক বৰ্তমানলৈকে উদ্ধাৰ কৰা হোৱা নাই বুলি জানিব পৰা গৈছে আৰু এনডিআৰএফ আৰু এচডিআৰএফে শিশু গৰাকী উদ্ধাৰৰ বাবে অভিযান অব্যাহত ৰাখিছে বুলি জানিব পৰা গৈছে।
