‘’১৩ জুনতে ডাইনী কাণ্ড প্ৰতিৰোধ আইন প্ৰণয়ন হোৱাৰ পাছতো আৰু ইয়াৰ গেজেট নটিফিকেশ্যন হৈ যোৱাৰ পাছতো এই পৰ্যন্ত অসম চৰকাৰৰ কোনো এজন আৰক্ষী বিষয়াই ইয়াৰ কোনো প্ৰতিলিপি লাভ কৰা নাই। ৰাজ্য চৰকাৰৰ গৃহ আৰু ৰাজনৈতিক বিভাগৰ শীৰ্ষ বিষয়াসকলৰ হেমাহিৰ বাবেই এই আইনখন প্ৰচাৰ হোৱা নাই,”-এই মন্তব্য ডাইনী কাণ্ড প্ৰতিৰোধী আইন প্ৰণয়নৰ বাবে সুদীৰ্ঘকাল সংগ্ৰাম কৰি অহা মানৱ অধিকাৰ কৰ্মী দিব্যজ্যোতি শইকীয়াৰ।
আজি গুৱাহাটী প্ৰেছ ক্লাৱত এখন সংবাদ মেল সম্বোধন কৰি শইকীয়াই কয় যে চৰকাৰে আইনখন সম্পৰ্কে জনসধাৰণক সজাগ কৰিব লাগে যদিও এইক্ষেত্ৰত কোনো তৎপৰতা প্ৰদৰ্শন কৰা নাই।
তেওঁ লগতে প্ৰশ্ন কৰে, “সোনোৱাল চৰকাৰৰ এই বিষয়াসকলে ডাইনী হত্যা বন্ধ হোৱাটো নিবিচাৰে নেকি? নে চৰকাৰখনে অন্ধবিশ্বাসক সমৰ্থন কৰে?”
মুখ্যমন্ত্ৰীৰ আইন উপদেষ্টা শান্তনু ভৰালীকো এইক্ষেত্ৰত সমালোচনা কৰি শইকীয়াই কয়, “শান্তনু ভৰালীয়ে কিয় নাজানে এই আইনৰ বিষয়ে? তেওঁ কিয় এই ক্ষেত্ৰত গুৰুত্ব দিয়া নাই?”
অহা সোম বা মঙলবাৰৰ ভিতৰত আইনখন ৰাজহুৱা কৰাৰ দাবী কৰি মানৱ অধিকাৰ কৰ্মীগৰাকীয়ে কয় যে আইনখনৰ ৰূপায়নৰ দিশত তীক্ষ্ন নজৰ ৰখা হ’ব আৰু ৰাজ্যখনত যাতে ভৱিষ্যতে ডাইনীৰ নামত কোনোধৰণৰ ঘটনা সংঘটিত হ’ব নোৱাৰে তাৰ বাবে আইনখনৰ সঠিক প্ৰয়োগৰ দিশতো লগতে সুক্ষ্ম দৃষ্টি ৰখা হ’ব।
শইকীয়াই লগতে উল্লেখ কৰে যে তেওঁ ২০০৯ চনৰ পৰা অন্ধবিশ্বাস, ডাইনী সন্দেহ, ষড়যন্ত্ৰ আৰু ডাইনীৰ নামত হত্যাৰ বিৰুদ্ধে ৰাজ্যখনত এখন ডাইনী বিৰোধী কঠোৰ আইন প্ৰণয়নৰ দাবী উত্থাপন কৰি অহাৰ পিছত ২০১৪ চনৰ ২৫ আগষ্টত দিচপুৰ লাষ্টগেটত ডাইনীৰ নামত হত্যা প্ৰতিৰোধৰ বাবে এখন কঠোৰ আইনৰ দাবীত এক গণতান্ত্ৰিক প্ৰতিবাদী কাৰ্যসূচী ৰূপায়ন কৰিছিল।
ইয়াৰ পিছতে শইকীয়াই তদানীত্বন অসম বিধানসভাৰ অধ্যক্ষ প্ৰনব গগৈ আৰু মুখ্যমন্ত্ৰী তৰুণ গগৈক সাক্ষাৎ কৰি সুকীয়াকৈ ৯ দফীয়া এক স্মাৰক পত্ৰ প্ৰদান কৰে। ২০১৪ চনৰ ২২ অক্টোবৰ আৰু ৪ নৱেম্বৰত তদানীত্বন মুখমন্ত্রী তৰুণ গগৈয়ে শইকীয়াৰ নেতৃত্বত সামাজিক সংগঠন ‘ব্ৰাদাৰ্ছ’ৰ এটি সঁজাতি দলৰ সৈতে আলোচনাত মিলিত হৈ আইন প্ৰণয়নৰ প্ৰতিশ্ৰুতি প্ৰদান কৰে।
এইক্ষেত্ৰত উচ্চ ন্যায়ালয়েও আইন এখন প্ৰণয়নৰ বাবে ৰাজ্য চৰকাৰক নিৰ্দেশ দিয়াৰ কথা উল্লেখ কৰি শইকীয়াই কয় যে ২০১৫ চনৰ আগষ্ট মাহত চৰকাৰে ডাইনী কাণ্ড প্ৰতিৰোধী এখন বিধেয়ক প্ৰস্তুত কৰি ৰাজ্যিক কেবিনেটত অনুমোদন জনাই ১০ আগষ্টত বিধানসভাৰ মজিয়ালৈ প্ৰেৰণ কৰি বিধেয়কখন সদনৰ মজিয়াত উত্থাপন কৰে আৰু পৰৱৰ্তী ১৩ আগষ্টত বিধেয়কখন গৃহীত কৰে।
মানৱ অধিকাৰ কৰ্মী শইকীয়াই এই সমগ্ৰ প্ৰক্ৰিয়াটোত প্ৰথমৰে পৰা অবিৰতভাৱে লাগি থকাৰ পিছত আইনখন প্ৰণয়ন হোৱাত সন্তোষ প্ৰকাশ কৰে। ৰাষ্ট্ৰপতিলৈ কৃতজ্ঞতা প্ৰকাশ কৰাৰ লগতে শইকীয়াই আইনখন প্ৰণয়নৰ ক্ষেত্ৰত প্ৰাক্তন মুখ্যমন্ত্ৰী তৰুণ গগৈ আৰু বিধানসভাৰ প্ৰাক্তন অধ্যক্ষ প্ৰনব গগৈয়ে লোৱা ভূমিকাৰ বাবে তেওঁলোকক ধন্যবাদ জনায়।
দিব্যজ্যোতি শইকীয়াই লগতে আইনখনত তেওঁ বিচৰা প্ৰায় আটাইখিনি দাবীয়ে সন্নিৱিষ্ট হোৱাত সন্তুষ্টি প্ৰকাশ কৰে আৰু কয় যে দেশৰ ভিতৰতে অন্ধবিশ্বাস বিৰোধী আইনসমূহৰ ভিতৰত এইখন আটাইতকৈ কঠোৰ আইন। আইনখনৰ যথোচিত প্ৰয়োগৰ বাবে আইনখন সম্পৰ্কে আৰক্ষীক শীঘ্ৰে অৱগত কৰাৰ উপৰি জনসাধাৰণকো আইনখন সম্পৰ্কে সজাগ কৰাৰ বাবে চৰকাৰে ব্যৱস্থা গ্ৰহণ কৰিব লাগে বুলি শইকীয়াই লগতে ব্যক্ত কৰে।
