গোৱালপাৰা জিলাৰ কৃষ্ণাই নৈৰ দলঙত ফাট মেলাৰ পিছত জিলা প্ৰশাসন আৰু ৰাষ্ট্ৰীয় ঘাইপথ প্ৰাধিকৰণে দলঙৰ ওপৰেৰে যাতায়াত বন্ধ কৰি দিয়াত বিকল্প পথ হিচাপে দুধনৈ-মাটিয়া-গোৱালপাৰা-পঞ্চৰত্ন পথটো মুকলি কৰি দিয়া হৈছিল যদিও সেই পথটোও এতিয়া বন্ধ হোৱাৰ উপক্ৰম হৈছে।
দুধনৈ-পঞ্চৰত্ন ৰাজ্যিক ঘাইপথটো ঠিকাদাৰৰ হেমাহি আৰু গড়কাপ্টানি বিভাগৰ দুৰ্বলতাৰ বাবে বিধ্বস্ত হৈ পৰিছে। উক্ত পথছোৱা নিৰ্মাণৰ দায়িত্ব পোৱা মেছাৰ্ছ ব্ৰহ্মপুত্ৰ ইনফ্ৰাষ্ট্ৰাকচাৰ লিমিটেড, জে ভি ঠিকাদাৰ গোষ্ঠীয়ে সময়মতে পথটো নিৰ্মাণৰ কাম নকৰাৰ বাবে নতুনকৈ নিবিদা আহ্বান কৰি পথছোৱা চাৰিটা অংশত বিভক্ত কৰি অইন ঠিকাদাৰক নিৰ্মাণৰ দায়িত্ব অৰ্পন কৰা হৈছিল।
ইয়াৰে ‘চি’ অংশটো ডুবাপাৰাৰপৰা গোৱালপাৰা চহৰৰ বি অ’ চিলৈকে নিৰ্মাণৰ বিষয়টো সম্প্ৰতি উচ্চ ন্যায়ালয়ৰ মজিয়াত পৰি আছে। ‘চি’ অংশৰ কামৰ বাবে মুঠ চাৰিজন ঠিকাদাৰে নিবিদা দাখিল কৰিছিল। ইয়াৰে গুৱাহাটী এ টি ৰোডৰ ২০১ কৰ্মাচ হাউছৰ পি কে এণ্ড কোম্পানীক ‘চি’ অংশৰ কামৰ বাবে গড়কাপ্টানি বিভাগে বিগত বৰ্ষৰ ২৯ আগষ্টত প্ৰাৰম্ভিক নিৰ্দেশ দিয়ে।
এই নিৰ্দেশনাৰ বৈধতাক লৈ চি চি এল ইণ্টাৰনেচনেল লিমটেড নামৰ প্ৰতিষ্ঠানটোৱে উচ্চ ন্যায়ালয়ত গোচৰ তৰে।
দুধনৈ-মাটিয়া পথছোৱাৰ নিৰ্মাণৰ কাম ইমানেই নিম্নমানৰ যে ৰাইজে নৰক যন্ত্ৰণা ভোগ কৰিব লগা হৈছে। এই ৪৬ নং ৰাজ্যিক ঘাইপথটো বহু বছৰ ধৰি বন্ধ, সময়ে সময়ে নতুনকৈ কৰা নিৰ্মাণ কাৰ্যই হাজাৰ হাজাৰ লোকৰ আহুকালৰহে সৃষ্টি কৰিছে।
৩৭নং ৰাষ্ট্ৰীয় ঘাইপথ কৃষ্ণাইত বন্ধ কৰি দিয়াৰ পিছত দুধনৈৰ পৰা মাটিয়া-গোৱালপাৰালৈ আহিব পৰা একমাত্ৰ বিকল্প পথটোও বন্ধ হোৱাৰ উপক্ৰম হৈছে। এই পথছোৱা বন্ধ হৈ গ’লে পশ্চিম অসমৰ লগতে মেঘালয়ৰ বহু অঞ্চলৰে যোগাযোগ বন্ধ হৈ পৰিব।
এই পথছোৱাৰ ‘চি’ অংশ মেৰামতি আৰু নিৰ্মাণৰ দাবীত ৩১ মাৰ্চত ৰাইজে পথ অৱৰোধ কৰাৰ সিদ্ধান্ত গ্ৰহণ কৰিছে।
