সদৌ অসম মটৰ শ্ৰমিক যুটীয়া পৰিষদৰ সহযোগত সদৌ ভাৰত পথ পৰিবহণ সন্থাই জনোৱা ২৪ ঘণ্টীয়া দেশজোৰা চকা বন্ধৰ ফলত ৰাজ্যখনৰ লগতে আজি উজনি অসমৰ সাধাৰণ জনজীৱন স্তব্ধ হৈ পৰে।
উজনি অসমৰ আটাইকেইখন জিলাতে বন্ধটোৰ সৰ্বাত্মক প্ৰভাৱ পৰা পৰিলক্ষিত হয়। সময়ছোৱাত ব্যক্তিগত যান-বাহনৰ বাহিৰে সকলো ধৰণৰ যাত্ৰীবাহি আৰু মালবাহি গাড়ীৰ চলাচল বন্ধ আছিল।
পৰিবহণ সন্থাই জনোৱা অনুসৰি পথ পৰিবহণ আৰু সুৰক্ষা বিল, ২০১৬ক অনাৰ লগতে পৰিবহণ শ্ৰমিক সলকৰ কল্যাণৰ সুবিধা নৰখাকৈ যান-বাহন আইন, ১৯৮৮ৰ সংশোধনৰ বাবে কেন্দ্ৰই লোৱা সিধান্তৰ প্ৰতিবাদত উক্ত বন্ধ কাৰ্যসূচী হাতত লোৱা হয়।
সন্থাই পৰিবহণ শ্ৰমিক সকলৰ বাবে পেঞ্চন, পৰিয়ালৰ লোকৰ চিকিৎসা সুবিধা, সন্তানৰ শিক্ষাৰ বাবে আৰ্থিক সাহায্য আৰু গাড়ীৰ চালক তথা সহায়কাৰী সকলক প্ৰশিক্ষন প্ৰদানৰ দাবী জনাই আহিছে।
সংগঠনটোৰ এজন সদস্যই কয়, ‘আমি থাৰ্ড-পাৰ্টি ইনছুৰেঞ্চ প্ৰিমিয়াম, গাড়ীৰ পঞ্জীয়ন মাচুল তথা অনুজ্ঞাপত্ৰ নৱীকৰণৰ মাচুল বৃদ্ধিক ঘূৰাই লবলৈ দাবী জনাই আহিছো।’
আনহাতে বন্ধটোৰ ফলত গাড়ীৰ চলাচল ব্যাহত হৈ পৰা বাবে সাধাৰণ নাগৰিকে যথেষ্ট হাৰাশাস্তিৰ সন্মুখীন হ’বলগীয়া হয়।
