চূড়ান্ত এন আৰ চিত কিবা কাৰণত কোনো প্ৰকৃত ভাৰতীয়ৰ নাম অন্তৰ্ভুক্ত নহ’লে এই সম্পৰ্কীয় অভিযোগসমূহৰ দ্ৰুত নিষ্পত্তিৰ বাবে এক আপিল কৰ্তৃপক্ষ গঠনৰ পোষকতা কৰিছে অসম কংগ্ৰেছে।
চূড়ান্ত এন আৰ চিৰ পূৰ্বে এই আপিল কৰ্তৃপক্ষ গঠনৰ বাবে দলটোৱে কেন্দ্ৰীয় চৰকাৰক এক প্ৰস্তাৱ দাখিল কৰিব।
অসমৰ প্ৰাক্তন মুখ্য মন্ত্ৰী তৰুণ গগৈয়ে আজি এক সংবাদমেলত কয় যে, ‘আনকি চূড়ান্ত এন আৰ চিটো নাম অন্তৰ্ভুক্ত নোহোৱা প্ৰকৃত ভাৰতীয় সকলৰ দাবী সমূহ নিষ্পত্তি কৰাৰ বাবে এজন ন্যায়াধীশৰ অধীনত এক আপিল কৰ্তৃপক্ষ স্থাপনৰ বাবে আইন প্ৰণয়ন কৰিবলৈ ভাৰত চৰকাৰক আমি প্ৰস্তাৱ কৰিম।’
তেওঁ লগতে কয়, ‘যদি চূড়ান্ত এন আৰ চিত কাৰোবাৰ নাম নাথাকে, তেওঁ কলৈ যাব? বিদেশী ন্যায়াধীকৰণত এটা গোচৰ নিষ্পত্তি হ’বলৈ বহুত সময় লয়। সেয়ে গোচৰ সমূহৰ দ্ৰুত নিষ্পত্তিৰ বাবে এজন ন্যায়াধীশৰ অধীনত এক আপিল কৰ্তৃপক্ষ থাকিলে সুবিধা হ’ব।’
গগৈয়ে কয়, ‘চূড়ান্ত এন আৰ চিৰ পূৰ্বেই এই সন্দৰ্ভত আমি কেন্দ্ৰলৈ প্ৰস্তাৱ পঠাম।’
তেওঁ লগতে কয়, ‘মই আইদিয়াটো দিলো, ৰাইজে এতিয়া বিচাৰ কৰি চাব।’
ৰাজ্যত চলি থকা এন আৰ চিৰ কাম-কাজক লৈ গগৈ সন্তুষ্ট নহয়। এন আৰ চিৰ প্ৰথম খচৰাত আনকি নামো অন্তৰ্ভুক্ত নোহোৱা ন্যায়াধীশ আফতাৱ হুছেইন শইকীয়াৰ উদাহৰণ গগৈয়ে এই সন্দৰ্ভত দাঙি ধৰে।
প্ৰাক্তন মুখ্য মন্ত্ৰীজনে কয় যে, ‘পৰিস্থিতি যদি এনেকুৱাই হয় তেন্তে মানুহে স্বাভাৱিকতেই সন্দেহ কৰিব এইসকল লোকে শুদ্ধ এন আৰ চি প্ৰস্তুত কৰিব পাৰিব নে নোৱাৰে।’
এন আৰ চিৰ সমন্বয়ক প্ৰতীক হাজেলাক সমালোচনা কৰি গগৈয়ে কয় যে এন আৰ চিৰ প্ৰথম খচৰাখনৰ পৰা প্ৰমাণ হৈছে যে হাজেলাই আনকি উচ্চতম ন্যায়ালয়ৰ নিৰ্দেশনাকো মানি চলা নাই। এই সন্দৰ্ভত তেওঁ কয় যে, ‘উচ্চতম ন্যায়ালয়ে তেওঁক এন আৰ চিত প্ৰকৃত ভাৰতীয় সকলৰ নাম অন্তৰ্ভুক্ত কৰিবলৈ কৈছিল কিন্তু হাজেলাই ওলোটাই এন আৰ চিৰ খচৰাৰ পৰা প্ৰকৃত ভাৰতীয়ৰ নাম বাদ হে দিছে।’
গগৈয়ে লগতে তাৎপৰ্যপূৰ্ণভাৱে মন্তব্য কৰে যে খচৰা এন আৰ চিৰ বিৰুদ্ধে শিলচৰৰ সাংসদ সুস্মিতা দেবৰ ক্ষোভ স্বাভাৱিক। ‘সুস্মিতাৰ ক্ষোভ স্বাভাৱিক,’ বুলি কৈ গগৈয়ে প্ৰশ্ন কৰে, ‘এন আৰ চিৰ কাৰ্যকৰ্তাসকল ইমান অসাৱধান কেনেকৈ হ’ব পাৰে?’
তেওঁ লগতে কয় যে হিন্দীভাষীয়ে হওক বা বাংলাভাষীয়ে হওক কোনো প্ৰকৃত ভাৰতীয়ক কংগ্ৰেছে কেতিয়াও অন্য ৰাজ্যলৈ ভাগিবলৈ নিদিয়ে।
