ড০ গোহাঁইৰ বিৰুদ্ধে আক্ৰমণাত্মক মন্তব্য কৰি অহা অসম চৰকাৰৰ জ্যেষ্ঠ মন্ত্ৰী ড০ হিমন্ত বিশ্ব শৰ্মাই পুনৰ তেওঁক সমালোচনাৰ লক্ষ্য কৰি লৈছে। শনিবাৰে পলাশবাৰী সমষ্টিৰ মিৰ্জাত অনুষ্ঠিত মহিলা সমাৰোহত বিশিষ্ট অতিথিৰূপে অংশগ্ৰহণ কৰা মন্ত্ৰীগৰাকীয়ে সমাৰোহৰ পাছত সংবাদ মাধ্যমৰ আগত ড০ হীৰেন গোহাঁইক বাওঁপন্থীৰ নেতৃত্বত গভীৰ ষড়যন্ত্ৰৰ অংশীদাৰ হিচাপে বিশিষ্ট বুদ্ধিজীৱীগৰাকীয়ে অসমীয়াবিৰোধী স্থিতি গ্ৰহণ কৰা বুলি বিস্ফোৰক মন্তব্য কৰে।
সংবাদ মাধ্যমৰ আগত মন্ত্ৰী শৰ্মাই কয়, ‘’মই হীৰেন গোহাঁইৰ বিৰুদ্ধে থিয় হোৱা নাই। হীৰেন গোহাঁয়ে অসমীয়াবিৰোধী স্থিতি গ্ৰহণ কৰা বাবেই মাত মাতি আহিছো। ব্যক্তিগতভাৱে তেওঁৰ বিৰুদ্ধে ক’বলগীয়া একো নাই যদিও বাওঁপন্থীসকলৰ নেতৃত্বত অসমখনক অশান্ত কৰাৰ এক গভীৰ ষড়যন্ত্ৰ চলাই অহা কথাটো সকলোৱে জানে। মাত্ৰ এই কথা সংবাদ মাধ্যমেহে নেদেখে।‘’
উল্লেখ্য যে সংবাদ মাধ্যমকো মন্ত্ৰী ড০ শৰ্মাই আক্ৰমণৰ লক্ষ্য কৰি এই প্ৰসংগত কয়, ‘’অসমৰ সকলোৱে এই কথা দেখিছে বা জলজল পটপট হৈছে। কিন্তু সংবাদ মাধ্যমে বুদ্ধিজীৱীৰ মাজতো শ্ৰেণী বিভাজন কৰি গোহাঁইৰ ওচৰত যোৱা কথাটো গুৰুত্বৰে গ্ৰহণ কৰে। ইয়াৰ বিপৰীতে কনকসেন ডেকাৰ ঘৰলৈ যোৱা কথাটোত গুৰুত্ব প্ৰদান নকৰে বুলি তিৰ্যক মন্তব্য কৰে।ধীৰেন্দ্ৰ নাথ বেজবৰুৱাৰ ঘৰলৈ যোৱা কথাটো নকয়।‘’
ৰাষ্ট্ৰীয় নাগৰিকপঞ্জী সন্দৰ্ভত মন্ত্ৰী শৰ্মাই সংবাদ মাধ্যমক পৰোক্ষভাৱে আক্ৰমণৰ লক্ষ্য কৰি কয় যে এন আৰ চি ওলালেহে অসমত কিমান অনুপ্ৰৱেশকাৰী আছে সেই কথা গম পাম। কিন্তু ডাটা নোলোৱাকৈ অসমৰ সংবাদ মাধ্যম, বাওঁপন্থী, বিভিন্ন দল সংগঠনে শূন্যত তীৰ মৰাত পাৰ্গত বাবে শূন্যতে তীৰ মাৰি আছে বুলি মন্তব্য কৰে। অসমৰ অনুপ্ৰৱেশকাৰীৰ বিকৃত ব্যাখ্যাৰে অসমখনক অশান্ত কৰাৰ ষড়যন্ত্ৰ বাওঁপন্থীৰ নেতৃত্বত বহুদিনৰ পৰা চলি আছে। সেই কথা অসমৰ মানুহে জানে বুলি তেওঁ স্পষ্টভাৱে কয়।
উল্লেখ্য যে মহিলা সমাৰোহৰ ভাষণৰ সময়তো মন্ত্ৰী ড০ শৰ্মাই সংবাদ মাধ্যমক নীতিশিক্ষা দিয়াৰ পৰা বিৰত নাথাকিল। ভাষণ প্ৰসংগত মন্ত্ৰীগৰাকীয়ে মিডিয়াই ৰাইজৰ কামত অহা আঁচনিৰ কথা প্ৰথম পৃষ্ঠাত বৰ বৰ আখৰৰে ছপা নকৰে কিন্তু ছাত্ৰ-ছাত্ৰীয়ে ৰাজপথত আন্দোলন কৰিলে কাকত বেছিকৈ বিক্ৰী হ’ব বুলি ভাবি ডাঙৰ ডাঙৰকৈ লিখে বুলি মন্তব্য কৰে।
