মঙলবাৰে ত্ৰিপুৰাত এগৰাকী স্থানীয় সাংবাদিকক টি এছ আৰ জোৱানে গুলীয়াই হত্যা কৰে। আগৰতলাৰ পৰা প্ৰায় ২০ কিলেমিটাৰ আঁতৰৰ আৰ কে নগৰৰ এটা অনুষ্ঠানৰ বাতৰি সংগ্ৰহ কৰিবলৈ যোৱা সাংবাদিক সুদীপ দত্ত ভৌমিকৰ সৈতে এগৰাকী টি এছ আৰ জোৱানৰ বাক-বিতণ্ডা হোৱাৰ পিছত জোৱানজনে তেওঁক গুলীয়াই হত্যা কৰে।
‘’ আমাৰ কাকতৰ এগৰাকী জ্যেষ্ঠ সাংবাদিক সুদীপ দত্ত ভৌমিকে আনুষ্ঠানিক অনুমতি লৈ আৰ কে নগৰত থকা দ্বিতীয় টি এছ আৰৰ কমাণ্ডেন্টক লগ কৰিবলৈ গৈছিল। কিন্তু তেওঁ তালৈ গৈ পোৱাৰ পিছতে কমাণ্ডেণ্টৰ গৰাকীৰ কাৰ্যালয়ৰ বাহিৰত তেওঁৰেই ব্যক্তিগত নিৰাপত্তাৰক্ষীগৰাকীৰ সৈতে কথা কটাকটি হোৱাৰ সময়তে নিৰাপত্তাৰক্ষীগৰাকীয়ে তেওঁক গুলীয়াই দিয়ে। ঘটনাস্থলীতে সুদীপৰ মৃত্যু ঘটে,’’-সাংবাদিকৰ আগত এইদৰে ঘটনাৰ বৰ্ণনা দাঙি ধৰে ছেন্দন পত্ৰিকাৰ সম্পাদক সুবল দেই।
আন এগৰাকী সাংবাদিক শান্তনু ভৌমিকৰ হত্যাৰ ঠিক দুমাহ পিছতেই ৰাজ্যখনত দ্বিতীয়টে সাংবাদিক হত্যাৰ এই ঘটনাটো ঘটে। ত্ৰিপুৰাৰ এটা স্থানীয় নিউজ চেনেলৰ সাংবাদিক ভৌমিকক যোৱা ২০ ছেপ্টেম্বৰত পশ্চিম ত্ৰিপুৰাৰ মন্দাইত ইণ্ডেজিনিয়াছ পিপ’লছ ফ্ৰণ্ট অফ্ ত্ৰিপুৰা ( আই পি এফ টি ) আৰু ত্ৰিপুৰা ৰাজেৰ উপজাতি গণমুক্তি পৰিষদ (টি আৰ ইউ জি পি) ৰ মাজত হোৱা সংঘৰ্ষৰ বাতৰি সংগ্ৰহ কৰিবলৈ যাওঁতে কোবাই হত্যা কৰিছিল। দিনৰাত চেনেলৰ এগৰাকী সাংবাদিক ২৮ বছৰীয়া শান্তনুৱে আগৰতলাৰ পৰা ৩৫ কিলোমিটাৰ আঁতৰৰ মন্দাইলৈ আই পি এফ টি আৰু চিপিআই (এম)ৰ জনজাতি সংগঠন টি আৰ ইউ জি পিৰ মাজৰ সংঘৰ্ষৰ বাতৰি সংগ্ৰহ কৰিবলৈ গৈছিল। সেই ঘটনাত আৰক্ষীয়ে উন্মত্ত লোকসকলক ছত্ৰভংগ দিয়াবলৈ লাঠীচাৰ্জ কৰিছিল যদিও আক্ৰমণকাৰীসকলে ভৌমিকক মৰিয়াই হত্যা কৰে।
আনহাতে, সুদীপ দত্ত ভৌমিকৰ মৃতদেহটো আগৰতলালৈ লৈ অনা হয়। আৰক্ষীয়ে টি এছ আৰৰ এগৰাকী কনিষ্টবল ব্যক্তিগত নিৰাপত্তাৰক্ষীগৰাকীক গ্ৰেপ্তাৰ কৰিছে। সাংবাদিক সুদীপৰ হত্যাই ৰাজ্যখনত ব্যাপক প্ৰতিক্ৰিয়াৰ সৃষ্টি কৰিছে।
আলফা স্বাধীনৰ মুখ্য সেনাধ্যক্ষ পৰেশ বৰুৱাই সাংবাদিকগৰাকীৰ হত্যাক গৰিহণা দিছে।
