আজি ঘোষিত উচ্চতৰ মাধ্যমিকৰ বিজ্ঞান শাখাত অসমৰ বিভিন্ন স্থানৰ লগতে দেৰগাঁও ৰেদিয়েন্ট জুনিয়ৰ কলেজৰ পৰা বিজ্ঞান শাখাত অভিজ্ঞান শৰ্মা গগৈয়ে সবৰ্মুঠ ৪৭৪ নম্বৰ লাভ কৰি সপ্তমস্থান আৰু অভিপ্সা ফুকনয়ে সৰ্বমুঠ ৪৭৩ নম্বৰ লাভ কৰি অষ্টম স্থান দখল কৰিবলৈ সক্ষম হয়।
ৰঙামাটি উচ্চতৰ মাধ্যমিক বিদ্যালয়ৰ বিজ্ঞান শিক্ষক মুকুল গগৈ আৰু দেৰগাঁও বালিকা বিদ্যালয়ৰ ইংৰাজী শিক্ষক বিনীতা শৰ্মাৰ একমাত্ৰ সন্তান অভিজ্ঞানে ইংৰাজীত ৯০, বৈভাষিক ইংৰাজীত ৯৫, জীৱ বিজ্ঞানত ৯৬, ৰাসায়নিক বিজ্ঞানত ৯৬, গণিতত ৯৭ আৰু পদাৰ্থ বিজ্ঞানত ৯২ নম্বৰ লাভ কৰে।
আনহাতে দাধৰা শংকৰদেৱ বিদ্যালয়ৰ শিক্ষয়িত্ৰী জ্যোতি ৰাজখোৱা আৰু জ্যোতিৰ্ময় ফুকনৰ একমাত্ৰ সন্তান অভিপ্সা ফুকনে ইংৰাজীত ৯৩, অসমীয়াত ৯৮, পদাৰ্থ বিজ্ঞানত ৯২, জীৱ বিজ্ঞানত ৯৬, গণিতত ৯৪ আৰু ৰাসায়নিক বিজ্ঞানত ৮৬ নম্বৰ লাভ কৰে।
উল্লেখযোগ্য যে ৰেদিয়েন্ট জুনিয়ৰ কলেজে এশ শতাংশ উত্তীৰ্ণ হাৰৰে অভিলেখ স্থাপন কৰাৰ উপৰিও বিজ্ঞান শাখাত ৩২ গৰাকীয়ে ষ্টাৰ, ৫৬ গৰাকীয়ে প্ৰথম বিভাগ আৰু ৬ গৰাকীয়ে দ্বিতীয় বিভাগত উত্তীৰ্ণ হয়। কলা শাখাত ৭৫ গৰাকীৰ ১৬ গৰাকীয়ে ষ্টাৰ, ৪৪ গৰাকীয়ে প্ৰথম বিভাগ, ২৬ গৰাকীয়ে দ্বিতীয় বিভাগ আৰু ৫ গৰাকীয়ে তৃতীয় বিভাগত উত্তীৰ্ণ হয়।
আনহাতে মাত্ৰ ৩ নম্বৰৰ বাবে স্থান লাভৰ বঞ্চিত হ’বলগীয়া হ’ল দৰিদ্ৰ পৰিয়ালৰ মেধাবী ছাত্ৰী প্ৰিয়া নাথ। প্ৰিয়াৰ প্ৰতিভাৰ প্ৰতি লক্ষ্য ৰাখি ৰেদিয়েন্ট জুনিয়ৰ কলেজে প্ৰিয়াৰ অধ্যয়নৰ সকলো খৰচ বহন কৰিছিল। পেছাত এজন চালক বৈকুণ্ঠ নাথ আৰু শাৰিৰীক ভাৱে অসুস্থ মাতৃ বাবলি নাথৰ ইচ্ছা ছোৱালীক চিকিৎসক হিচাপে গঢ়ি তোলাৰ। উল্লেখযোগ্য যে প্ৰিয়া নাথ অইলৰ চুপাৰ ৩০ স্থান প্ৰাপক।
