নাগৰিকত্ব সংশোধনী বিধেয়কৰ প্ৰতিবাদত ৰাজ্যৰ আকাশ-বতাহ উত্তাল হৈ থকাৰ সময়তে খোদ মুখ্য মন্ত্ৰীৰ সমষ্টি মাজুলীতো খিলঞ্জীয়া লোকৰ অস্তিত্বৰ প্ৰতি ভাবুকিস্বৰুপ এই বিধেয়কৰ বিৰোধিতাৰে আজি অসম জাতীয়তাবাদী যুৱ-ছাত্ৰ পৰিষদে প্ৰতিবাদ সাব্যস্ত কৰে।
যুৱ-ছাত্ৰ পৰিষদৰ মাজুলী জিলা সমিতিয়ে কমলাবাৰীত সাব্যস্ত কৰা উক্ত প্ৰতিবাদত প্ৰতিবাদকাৰীসকলে ৰাজপথত বাংলাদেশী হিন্দুৰ সংস্থাপনৰ সমৰ্থনত বিতৰ্কিত মন্তব্য কৰা প্ৰাক্তন কংগ্ৰেছী মন্ত্ৰী অৰ্ধেন্দু দে আৰু ৰাজেন গোহাঁইৰ পুত্তলিকা দাহ কৰে।
ইয়াৰ উপৰি তেওঁলোকে নাগৰিকত্ব সংশোধনী বিধেয়ক ২০১৬ বাতিল কৰা, এন আৰ চিৰ কাম ক্ষীপ্ৰতাৰে সম্পন্ন কৰা দাবী তোলে।
আনহাতে যোৱা ৭ এপ্ৰিলত ৰাজেন গোহাঁইয়ে নগাৱঁৰ এখন জনসভাত এগৰাকী অৱসৰপ্ৰাপ্ত শিক্ষকক ৰাজহুৱাভাৱে অপমান কৰাৰ সংগঠনটোৱে প্ৰতিবাদ কৰে। প্ৰতিবাদকাৰীসকলে ‘শিক্ষাগুৰুক অসন্মান কৰা অলগদ্ধ ৰাজেন গোহাঁইৰ’ পদত্যাগৰ দাবী তোলে ।
