অসমত বদৰুদ্দিন আজমল নেতৃত্বাধীন এ আই ইউ ডি এফৰ উত্থান দেশত বিজেপিৰ উত্থানতকৈ দ্ৰুত বুলি মন্তব্য কৰিছে সেনাপ্ৰধান বিপিন ৰাৱটে।
বুধবাৰে নতুন দিল্লীত উত্তৰ-পূৰ্বাঞ্চলৰ সীমান্ত সুৰক্ষা সন্দৰ্ভত ‘North East Region of India – Bridging Gaps and Securing Borders’ শীৰ্ষক এক সন্মিলনত উক্ত মন্তব্য কৰে।
অসমত মুছলমান লোকৰ জনসংখ্যা পূৰ্বৰ তুলনাত বৃদ্ধি পাইছে বুলি ৰাৱটে সন্মিলনত মন্তব্য কৰে।
আনহাতে অঞ্চলটোলৈ বাংলাদেশৰ পৰা হৈ থকা অবৈধ অনুপ্ৰৱেশৰ সন্দৰ্ভত উল্লেখ কৰি তেওঁ
কয়, ‘বাংলাদেশীসকলৰ মাটিকালিৰ নাটনি হৈছে, তেওঁলোকৰ বেছিভাগ অঞ্চলে বানত বুৰ যোৱাৰ ফলত লোক সকলে প্ৰব্ৰজন কৰে। আনহাতে আনটো দিশ হৈছে পৰিকল্পিত অবৈধ অনুপ্ৰৱেশ’।
তেওঁ এই ক্ষেত্ৰত পাকিস্তানক জগৰীয়া কৰি কয় যে দেশৰ ‘পশ্চিম প্ৰান্তৰ চুবুৰীয়া’ পাকিস্তানে ‘উত্তৰ প্ৰান্তৰ চুবুৰীয়া’ চীনৰ সগযোগত অঞ্চলটোক অশান্ত ৰাখিবলৈ এই ‘প্ৰক্সি’ যুদ্ধ চলাই আছে।
অঞ্চলটোৰ উন্নয়নৰ ওপৰত গুৰুত্ব আৰোপ কৰি সেনাপ্ৰধান গৰাকীয়ে কেন্দ্ৰীয় চৰকাৰে উত্তৰ-পূৰ্বাঞ্চলক সঠিক দিষ্টিৰে চাই আছে বুলি উল্লেখ কৰে।
ইয়াৰ উপৰি তেওঁ উন্নয়নৰ লগতে অঞ্চলটোৰ লোকসকলক দেশৰ বাকী অংশৰ লগত একত্ৰিত কৰি সমস্যা সমূহৰ সমাধান কৰিব পৰা যাব বুলি মন্তব্য কৰে।
