নিচাসক্ত যুৱকৰ প্ৰহাৰত বোকাখাতত আহত হ’ব লগা হৈছে দুজন আৰক্ষী বিষয়াসহ দুজন আৰক্ষী কনিষ্টবল। বৃহস্পতি বাৰৰ বিয়লি বোকাখাতৰ লক্ষৌজানত পশ্চিমবংগৰ আলিপুৰ দুৱাৰৰ ৰঞ্জিত বৰ্মন নামৰ এজন যুৱকে আকস্মিক ভাৱে ৩৭ নং ৰাষ্ট্ৰীয় পথৰ ওপৰতে তাণ্ডৱ আৰম্ভ কৰে ৷
পথাচাৰীলৈ চোঁচা লৈ সন্ত্ৰাসৰ সৃষ্টি কৰাৰ সময়তেই দেৰগাঁৱৰ আৰক্ষী চক্ৰ পৰিদৰ্শক মানিক গোস্বামী, খুমটাইৰ আৰক্ষী থানাৰ বিষয়া মিলন খাটনিয়াৰ, দেৰগাওঁ আৰক্ষী থানাৰ ট্ৰেফিক কনিষ্টবল মহেশ ৰায় আৰু হাবিলদাৰ ৰুবুল দত্ত ঘটনাস্থলীত উপস্থিত হৈ ৰঞ্জিত বৰ্মনক কৰায়ত্ব কৰাৰ চেষ্টা কৰে যদিও আৰক্ষীৰ দলটোক নিচাসক্ত ৰঞ্জিত বৰ্মন নামৰ যুৱকজনে প্ৰহাৰ কৰি আহত কৰে।
যাৰ ফলত কেউজন আৰক্ষীয়েই কম-বেছি পৰিমানে আহত হয়। অৱশেষত আৰক্ষীয়ে ৰিভলভাৰ দেখুৱাইহে নিচাসক্ত যুৱকজনক কৰায়ত্ব কৰিবলৈ সক্ষম হয়। বোকাখাত আৰক্ষী থানাত যুৱকজনক হাজিৰ কৰাৰ পিছত বোকাখাত আৰক্ষীয়ে নিজাকৈ ২৬৮/১৮ নম্বৰত ভাৰতীয় দণ্ডবিধি আইনৰ ৩৩৩ ধাৰাত এটা গোচৰ ৰুজু কৰি যুৱক জনক গ্ৰেপ্তাৰ কৰি জেল হাজোতলৈ প্ৰেৰণ কৰে ৷
আৰক্ষীয়ে আটক কৰা যুৱকজন অতিপাত নিচাসক্ত হৈ থকা বুলি আৰক্ষী জনায় ৷ যুৱকজন পশ্চিমবঙ্গৰ আলিপুৰ দুৱাৰৰ সুুভাষ বৰ্মনৰ পুত্ৰ বুলি জানিব পৰা গৈছে ৷
বৰ্তমান গোলাঘাট কাৰাগাৰত থকা ৰঞ্জিত বৰ্মনৰ পৰিয়ালৰ লগত আৰক্ষীয়ে যোগাযোগ কৰিছে ৷ যুৱকজনে অত্যাধিক নিচাযুক্ত দ্ৰব্য সেৱন কৰিয়েই এই দুস্কাৰ্য সংঘটিত কৰিছিল।
