বৰপেটা জিলাতো ক্ৰমাৎ সক্ৰিয় হৈ পৰিছে জালনোট সৰবৰাহী চক্ৰ। এই কথা প্ৰমাণ কৰিছে আজি বৰপেটা আৰক্ষীয়ে বৃহৎ পৰিমাণৰ জালনোটসহ এজন লোকক আটক কৰা ঘটনাই।
উল্লেকযোগ্য যে আজি এক গোপন সূত্ৰৰ পমখেদি বৰপেটা আৰক্ষীয়ে ছয়লাখ টকাৰ জালনোটসহ এজন যুৱকক আটক কৰিবলৈ সক্ষম হয়।
প্ৰাপ্ত তথ্য মতে গোপন খবৰৰ ভিত্তিত বৰপেটা আৰক্ষীৰ এটা দলে বৰপেটা-হাউলী পথৰ কাজিৰমিল চ’কাত তালাচী অভিযান চলায়। এই অভিযানকালতে এখন নম্বৰ প্লেটবিহীন স্কুটীৰে বৰপেটা অভিমুখে আহি থকা এজন যুৱকক ৰখাই সোধ-পোছ কৰে। আৰু সেই সময়তে যুৱকজনৰ স্কুটীখনত তালাচী চলোৱাত যুৱকজনৰ স্কুটীখনৰ পৰা ৬ লাখ টকাৰ জালনোট উদ্ধাৰ কৰে।
ফলত লগে লগে বৰপেটা আৰক্ষীয়ে জালনোটখিনি জব্দ কৰাৰ লগেত যুৱক জনকো আটক কৰে। আটকাধীন যুৱকজন কলগাছিয়াৰ তপেশ্বৰাৰ ছাহিল হক বুলি জানিব পৰা গৈছে। আৰ যুৱকজনে নিজেক হাউলীৰ ব্যক্তিগত শিক্ষানুষ্ঠান ‘হোমা’ত দশম শ্ৰেণীত অধ্যয়ন কৰি থকা বুলি জানিবলৈ দিয়ে।
ইফালে আৰক্ষীয়ে উদ্ধাৰ কৰা জালনোটখিনিৰ প্ৰত্যেকখনেই দুহাজাৰ টকীয়া নোট আৰু আটাইকেইখন নোটৰ নম্বৰ একে বুলি আৰক্ষীয়ে জানিবলৈ দিয়ে। আৰক্ষীয়ে জনোৱা অনুসৰি গোটেইকেইখন নোটতে ৩চিআৰ৯৭৯১৭০ বুলি উল্লেখ আছে।
