২৭ মে’ৰ নিশা কামাখ্যাধামত অনুষ্ঠিত এটা সংগীতানুষ্ঠানত কামাখ্যাধামত চলি থকা বলিপ্ৰথাৰ ৰাজহুৱাকৈ বিৰোধিতা কৰাৰ পিছত জুবিন গাৰ্গ কামাখ্যাৰ সৈতে স্বাৰ্থজড়িত পক্ষৰ তীব্ৰ সমালোচনাৰ সন্মুখীন হৈছে। কামাখ্যাধামৰ এজন পাণ্ডাই গায়কজনক তেওঁৰ মন্তব্যৰ বাবে গৰিহণা দিয়াৰ লগতে কামাখ্যা ফ্ৰেণ্ডছ ক্লাব নামৰ বহাগী উৎসৱৰ আয়োজক পক্ষটোৱে জুবিনৰ পৰা দাবী কৰিছে ক্ষমা প্ৰাৰ্থনা।
পিছে আজি চানমাৰিৰ আছুৰ গণ-অনশনত ভাগ লোৱাৰ সময়ত স্পষ্টভাষী আৰু বিতৰ্ক ভালপোৱা শিল্পীজনে তাৰ উত্তৰ দি সংবাদ মাধ্যমৰ আগত কয় যে তেওঁ কেতিয়াও ক্ষমা নোখোজে। “মই কোনো কাৰণতে ক্ষমা নোখোজো। মই জীৱ-জন্তু ভাল পাওঁ; বলি-বিধান বেয়া পাওঁ।” এইদৰে কয় শিল্পীজনে।
আনহাতে তেওঁ এই মন্তব্যত ব্যক্তিগত মত প্ৰকাশ কৰা বুলিও স্পষ্ট কৰি দিয়ে।
আনহাতে তেওঁৰ ধৰ্মীয় স্থিতি সম্পৰ্কত সাংবাদিকৰ প্ৰশ্নৰ উত্তৰত কয়, “মোৰ কোনো ধৰ্ম নাই বুলি বহুবাৰ কৈছো।”
উল্লেখযোগ্য যে ব্ৰাহ্মণৰ লগুণ সম্পৰ্কতো কালি গায়কজনে বিতৰ্কিত মন্তব্য কৰিছিল। এই দুয়োটা কথাৰ বাবেই কামাখ্যা ফ্ৰেণ্ডছ ক্লাব নামৰ বহাগী উৎসৱৰ আয়োজক পক্ষটোৱে জুবিনে ক্ষমা নুখুজিলে তেওঁৰ কামাখ্যাত প্ৰৱেশ নিষিদ্ধ কৰাৰ হুমকি দিছে।
আজি নাগৰিকত্ব সংশোধনী বিধেয়কৰ বিৰোধিতাত চানমাৰিৰ অভিযান্ত্ৰিক প্ৰতিষ্ঠানৰ খেলপথাৰত আছু আৰু ২৮টা জনগোষ্ঠীয় সংগঠনৰ আহ্বানত হোৱা গণ-অনশনত জনপ্ৰিয় শিল্পীজনে ভাগ লৈ বিধেয়কখনৰ স্পষ্ট বিৰোধিতা কৰে।
