মাজুলীত জলসম্পদ বিভাগৰ আগতীয়া বান প্ৰস্তুতি সন্দৰ্ভত মাজুলী জিলা প্ৰশাসনৰ উদ্যোগত আজি উপায়ুক্তৰ কাৰ্যালয়ৰ সভাকক্ষত এখন সভা অনুষ্ঠিত হয়।
উপায়ুক্ত তথা জিলা দুৰ্যোগ প্ৰশমন কৰ্তৃপক্ষৰ অধ্যক্ষ দেৱ প্ৰসাদ মিশ্ৰৰ সভাপতিত্বত অনুষ্ঠিত সভাখনত বিভাগটোৰ বিষয়া-অভিযন্তা তথা ক্ষেত্ৰ পৰ্যায়ত দায়িত্বৰত কৰ্মচাৰীসকলক আগন্তুক বাৰিষাৰ সময়ছোৱাত ল’ব লগা সতৰ্কতামূলক আৰু জৰুৰী কাৰ্যপন্থাৰ বিষয়ে জিলা প্ৰশাসন তথা ডিডিএমএৰ ফালৰ পৰা সচেষ্ট কৰা হয়।
বাৰিষাৰ সময়ছোৱাত মথাউৰিসমূহৰ স্পৰ্শকাতৰ অংশসমূহত নজৰ ৰখাৰ বাবে আৰু মথাউৰিৰ সুৰক্ষাৰে জড়িত দিশসমূহৰ বিষয়ে স্থানীয় বাসিন্দাসকলৰ মাজতো জনসজাগতা বৃদ্ধিৰ উদ্দেশ্যে ২৯ মে’ৰ পৰা ২ জুনলৈ ব্ৰহ্মপুত্ৰ আৰু সোৱণশিৰি মথাউৰিৰ দাঁতিত বাস কৰা লোকসকলৰ মাজত সচেতনতা সভা অনুষ্ঠিত কৰিবলৈ উপায়ুক্ত মিশ্ৰই বিভাগীয় বিষয়া-অভিযন্তাক নিৰ্দেশ দিয়ে।
সভাত মাজুলীৰ অতিৰিক্ত উপায়ুক্ত তথা ডিডিএমএ-ৰ মুখ্য কাৰ্যবাহী বিষয়া চিন্ময় নাথ, ৰাজহ চক্ৰ বিষয়া অজিত কুমাৰ শৰ্মা, চক্ৰ বিষয়া অনামিকা গগৈ আৰু জলসম্পদ বিভাগৰ কাৰ্যবাহী অভিযন্তা ড০ ৰাজীৱ গোস্বামী উপস্থিত থাকে।
